ޤައުމީ ޓައިމް ޓަރަޔަލްސްގައި ދުވެ، ފަސޫހާ އަޙްމަދު 800 މީޓަރުގެ ދުވުމުގެ ރިކޯޑު މުގުރާލައިފިއެވެ.
އިއްޔެ ކުރިއަށްދިޔަ ޓައިމް ޓްރަޔަލްސްގައި އަންހެނުންގެ 800 މީޓަރު ދުވުމުގައި ވާދަކޮށް ފަސޫހާ ރޭސް ނިންމާފައިވަނީ 2 މިނެޓު 27.92 ސިކުންތުންނެވެ. މިއީ ފާއިތުވެދިޔަ 13 އަހަރު ވަންދެން މުގުރާނުލެވި އޮތް ރެކޯޑެކެވެ.
މީގެ ކުރިން މި ރެކޯޑް އޮތީ 2009 ވަނަ އަހަރު ޖަރުމަނުގެ ބާލިންގައި ކުރިއަށްދިޔަ ވޯލްޑް ޗެމްޕިއަންޝިޕްގައި ވާދަކުރި އައިޝަތު ރީޝާ އަތުގައެވެ. އެ ފަހަރު ރީޝާ ރެކޯޑް ހެދީ 2 މިނެޓު 28.00 ސިކުންތުން ރޭސް ނިންމައިގެންނެވެ.
އެތުލެޓިކްސް އަށް މިއީ ބައިނަލްއަގުވާމީ ލެވަލްގައި ބަލާއިރު ބޮޑު އަހަރެކެެވެ. އެ ގޮތުން، އަންނަ އޮގަސްޓް މަހު މަޑަގަސްކަރާގައި ފަށާ އިންޑިއަން އޯޝަން އައިލެންޑް ގޭމްސްް (އައިއޯއައިޖީ) އާއި ސެޕްޓެމްބަރު މަހު ޗައިނާގެ ހަންޒޫގައި ކުރިއަށްދާ އޭޝިއަން ގޭމްސް އަކީ ރާއްޖޭގެ ގައުމީ އެތުލީޓުން މި ވަގުތު ރާއްޖޭން ބޭރުގައި އެންމެ ބޮޑަށް ތައްޔާރުވަމުން އަންނަ ދެ ގޭމްސް އެވެ.