ރާއްޖޭގެ ރިސޯޓުތަކުގެ މެދުގައި ކުރިއަށްދާ އެންމެ ބޮޑު ފުޓްސަލް މުބާރާތް ކަމަށްވާ ރިސޯޓް ލީގު 2023 ގެ ނޯތު މާލޭ ޒޯނުގައި ރީތި ރަށާއި ހުވަފެންފުށި ބައްދަލުކުރި މެޗު 1-1 އިން އެއްވަރުވިއިރު، ވަރު މޯލްޑިވްސް 7-5 އިން ބަލިކޮށް ޕަޓީނާ ކުއާޓާ ފައިނަލާ ގާތަށް ޖެހިލައިފިއެވެ.
މުބާރާތް ބާއްވާ ރީތިރަށް އެއްވަރުވި މެޗުގައި އެންމެ ލަނޑުޖަހައި ކުރިހޯދީ ރީތިރަށުންނެވެ. މިލަނޑު ފުރަތަމަ ހާފު ފެށިގެން ދެވަނަ މިނެޓުގައި ކާމިޔާބުކޮށްދިނީ އެޓީމުގެ އަހުމަދު ނަބީލް އެވެ. ފުރަތަމަ ހާފު ނިމުނީ މި ނަތީޖާގައި އޮވެގެންނެވެ.
ދެވަަނަ ހާފުގައި ހުވަފެންފުއްޓަށް ނަތީޖާ ހަމަހަމަކޮށްދިން ލަނޑު ޖެހީ އަބްދުﷲ ސާހިލްއެވެ. މި މެޗުގެ މޮޅު ކުޅުންތެރިއަކަށް ހޮވުނީ ހުވަފެންފުށީގެ މުހައްމަދު އަތީދު އެވެ.
ވަރު އަތުން ޕަޓީނާ މޮޅުވި މެޗުގައި ފުރަތަަމަ ލަނޑުޖަހައި ކުރިހޯދީ ޕަޓީނާ އިންނެވެ. މި ލަނޑު މެޗު ފެށިގެން ތިންވަނަ މިނެޓުގައި ކާމިޔާބުކޮށްދިނީ އިބްރާހިމް ނާއިޝް އެވެ. އަދި އޭގެ ތިން މިނެޓު ފަހުން އެޓީމުގެ އިބްރާހިމް ވަޖީހު ވަނީ ލަނޑެއް ކާމިޔާބުކޮށް އެޓީމުގެ ލީޑު ފުޅާކޮށްދީފައެވެ. ވަރު އިން ފަހަތުން އަރާ ދެ ލަނޑު ޖަހާ ނަތީޖާ ހަމަހަމަކުރި އެވެ. މި ދެ ލަނޑު ޖެހީ އަހުމަދު ޒަމީމް އާއި އަހުމަދު ފިރުޝާނެވެ.
ޕަޓީނާއަށް ދެވަނަ ފަހަރަށް މެޗުގެ ލީޑު ހޯދައިދިނީ މުހައްމަދު ހާޒިމް ރިފްއަތެވެ. އަދި އޭގެ ފަސް މިނެޓު ފަހުން އެޓީމުގެ އިބްރާހިމް ރައްޒާން ވަނީ ލަނޑެއް ކާމިޔާބުކޮށް އެޓީމުގެ ލީޑު ފުޅާކޮށްދީފައެވެ. ނަމަވެސް ފުރަތަމަ ހާފު ނިމުމުގެ ކުރިން ވަރުގެ އަހުމަދު ޒަމީމް ލަނޑެއް ކާމިޔާބުކޮށް ނަތީޖާގެ ފަރަގު އެޓީމަށް ކުޑަކޮށްދިނެވެ. މިއާއެކު ފުރަތަަމަ ހާފުގެ ކުޅުން ނިމިގެންދިޔައީ 4-3 ގެ ނަތީޖާއަކުން ޕަޓީނާ ކުރީގައި އޮވެގެންނެވެ.
ދެވަަނަ ހާފުގައި އަހުމަދު ޒަމީމް ވަނީ މި މެޗުގައި އޭނާގެ ހެޓްރިކް ފުރިހަމަކޮށް، ދެވަނަ ފަހަރަށް ވަރު ޓީމަށް މެޗުގެ ނަތީޖާ އެއްވަރުކޮށްދީފައެވެ. ނަމަވެސް އޭގެ ހަތަރު މިނެޓު ފަހުން ޕަޓީނާ އިން މި މެޗުގައި ތިންވަނަ ފަހަރަށް ލީޑު ނެގިއެވެ. މިލަނޑު އެޓީމަށް ކާމިޔާބުކޮށްދިނީ އިބްރާހިމް ނާއިޝް އެވެ. މެޗުގައި ޕަޓީނާ އިން ކާމިޔާބުކުރި ހަވަނަ ލަނޑަކީ މެޗު ނިމެން މިނެޓަކަށް ވެފައިވަނިކޮށް ވަރުގެ ކީޕަރު ހަސަން މުނާޒު އަތުން ބައިކޮޅަށް ވަން ލަނޑެކެވެ. ނަމަވެސް ޖެހިގެން އައި މިނެޓުގައި ވަރުގެ އަލީ މިސްބާހް ވަނީ އަނެއްކާވެސް އިތުރު ލަނޑެއް ކާމިޔާބުކޮށް މެޗުގެ ނަތީޖާ 6-5 އަށް ބަދަލުކޮށްފައެވެ.
ޕަޓީނާ އިން މި މެޗުގައި ކާމިޔާބުކުރި ހަތްވަނަ ލަނޑު މެޗުގެ އިތުރު ވަގުތުގެ ތެރޭގައި ކާމިޔާބުކޮށްދިނީ އެޓީމުގެ އިބްރާހިމް އަފްލާހް އެވެ. މެޗުގެ މޮޅު ކުޅުންތެރިއަކަށް ހޮވުނީ ޕަޓީނާގެ އިބްރާހީމް އަފްލާހެވެ.
ރިސޯޓް ލީގު 2023 ގެ ނޯތު މާލޭ ޒޯނުގައި މިއަހަރު 17 ޓީމެއް ވަނީ ބައިވެރިވވެފައެވެ. މި ޒޯނުގެ މެޗުތައް ކުރިއަށްދަނީ ހަތަރު ގުރޫޕަކަށް ބަހާލައިގެން ކޮންމެ ގްރޫޕަކުން ވެސް އެންމެ ރަގަޅު ނަތީޖާއެއް ހޯދާ ދެޓީމު ކުއާޓާ ފައިނަލަށް ހޮވޭގޮތަށެވެ.