އިންޑިއަން ޕްރިމިއަރ ލީގު (އައިޕީއެލް) ކްރިކެޓް މުބާރާތުގެ ފައިނަލުގެ ފުރަތަމަ ޖާގަ ޗެންނާއި ސުޕަ ކިންގްސްއިން ހޯދައިފިއެވެ.
މިމުބާރާތުގެ ފައިނަލުން ސުޕަރ ކިންގްސް ޖާގަހޯދީ ޕްލޭ އޮފްސްގެ ކޮލިފަަޔަރ ފުރަތަމަ މެޗްގައި އެންމެފަހުގެ ޗެމްޕިއަން އަދި މިފަހަރުގެ މުބާރާތުގެ އެންމެ ކާމިޔާބު ޓީމް ކަމަށްވާ ގުޖުރާތު ޓައިޓަންސް ބަލިކުރުމަށްފަހުއެވެ.
ޗެއްނާއިގެ އެމްއޭ ޗިދަމްބަރަމް ސްޓޭޑިއަމްގައި ކުޅުނު މިމެޗް ސުޕަރ ކިންގްސް ކާމިޔާބުކޮށްފައިވަނީ 15 ލަނޑުންނެވެ. މިމެޗްގެ ޓޮސް ދިމާވުމުން ޓައިޓަންސްއިން ނިންމީ އެންމެ ފުރަތަމަ ފީލްޑް ކުރާށެވެ. މިގޮތުން ސުޕަރ ކިންގްސްއިން އެންމެ ފުރަތަމަ ކުޅެން އަރާ 20 އޯވަރުގެ ތެރޭގައި ހަތް ކުޅުންތެރިން ނުބައިވެގެން 172 ލަނޑު ހެދިއެވެ. އެޓީމަށް އެންމެ ރަނގަޅަށް ކުޅުނީ 60 ލަނޑު ހަދާދިން ރުތުރާޖް ގައިކްވާޑްއެވެ. މީގެއިތުރުން ޑެވޮން ކޮންވޭވަނީ 40 ލަނޑު ހަދާދީފައެވެ. މިއީނިންގްސްގައި ޓައިޓަންސްއަށް އެންމެ ރަނގަޅަށް އުކާފައިވަނީ ހަތަރު އޯވަރު 28 ލަނޑަށް ދެވިކެޓް ނަގާދިން މުހަންމަދު ޝާމީ އާއި ހަތަރު އޯވަރު 31 ލަނޑަށް ދެވިކެޓް ނަގާދިން މޯހިތު ޝަރްމާއެވެ.
ޖަވާބުގައި ކުޅެން އަރާ ޓައިޓަންސްއަށް 20 އޯވަރުގެ ތެރޭގައި ހުރިހާ ކުޅުންތެރިން ނުބައިވެގެން ހެދުނީ 157 ލަނޑެވެ. އެޓީމަށް އެންމެ ރަނގަޅަށް ކުޅެފައިވަނީ 42 ލަނޑު ހަދާދިން ޝުބްމަން ގިލްއެވެ. މީގެއިތުރުން ރާޝިދު ހާންވަނީ 30 ލަނޑު އެޓީމަށް ހަދާދީފައެވެ. ސުޕަރ ކިންގްސްއަށް މިއީނިންގްސްގައި ހަތަރު ކުޅުންތެރިޔަކުވަނީ ދެވިކެޓް ނަގާދީފައެވެ. އެއީ ދީޕަކު ޝަހާރު އާއި މަހޭޝް ތީކްޝާނާ، ރަވީ ޖަޑޭޖާ އަދި މަތީޝާ ޕަތިރާނާއެވެ.
މިކާމިޔާބީއާއެކު ޗެއްނާއި ސުޕަރ ކިންގްސް މިވަނީ އައިޕީއެލްގެ ފައިނަލުން 10 ވަނަ ފަހަރަށް ޖާގަހޯދާފައެވެ. އަދި ޓައިޓަންސް ދިޔައީ ކޮލިފަޔަރ ދެވަނަ މެޗަށެވެ. މިމުބާރާތުގެ ޕްލޭ އޮފްސްގައި މިރޭ ކުޅުމަށް ހަމަޖެހިފައިވަނީ އެލިމިނޭޓަރ މެޗެވެ. މިމެޗްގައި ބައްދަލުކުރުމަށް ހަމަޖެހިފައިވަނީ ލަކްނައު ސުޕަރ ޖަޔަންޓްސް އާއި މުމްބާއި އިންޑިއަންސްއެވެ. މިމެޗުން މޮޅުވާ ޓީމެއް ބައްދަލުކުރާނީ ކޮލިފަޔަރ ދެވަނަ މެޗުގައި ޓައިޓަންސްއާއެވެ. އަދި ކޮލިފަޔަރ ދެވަނަ މެޗުން މޮޅުވާ ޓީމަކަށް މިމުބާރާތުގެ ފައިނަލްގެ ދެވަނަ ޖަގާ ކަށަވަރުވާނެއެވެ. ފައިނަލް މެޗް ކުޅުމަށް ހަމަޖެހިފައިވަނީ މިމަހުގެ 28 ވަނަ ދުވަހު އަހްމަދުއާބާދުގައެވެ.