އެންބީއޭ ބާސްކެޓްބޯޅަ މުބާރާތުގެ އީސްޓަން ކޮންފަރެންސް ފައިނަލްސްގެ ހަތަރުވަނަ މެޗު ބޮސްޓަން ސެލްޓިކްސްއިން ކާމިޔާބުކޮށްފިއެވެ.
މައޭމީގައި ކުޅުނު މިމެޗު ސެލްޓިކްސް ކާމިޔާބުކޮށްފައިވަނީ 116 ޕޮއިންޓް 99 ޕޮއިންޓުންނެވެ.
ސެލްޓިކްސްގެ މި ކާމިޔާބީއާއެކު މިސީރީޒް މިވަނީ މިހާރު ފަސްވަނަ މެޗަކަށް ގޮސްފައެވެ. މިއަދު ހެނދުނު ކުޅުނު ހަތަރުވަނަ މެޗްގައި ފުރަތަމަ ދެ ކުއާޓަރ ނިމުނުއިރު ހަ ޕޮއިންޓްގެ ތަފާތުން ކުރީގައި އޮތީ ހީޓްއެވެ.
މި މެޗްގައި ސެލްޓިކްސްއިން ލީޑު ނަގާފައިވަނީ ތިންވަނަ ކުއާޓަރގައެވެ. އަދި ހަތަރުވަނަ ކްއާޓާގައި މޮޅަށް ކުޅެފައިވަނީވެސް ސެލްޓިކްސްއިންނެވެ. މިމެޗްގައި ސެލްޓިކްސްގެ ޖޭސަން ޓެޓުމްވަނީ 33 ޕޮއިންޓް ހޯދާދީ 11 ރީބައުންޑް ނަގާދީ ހަތް އެސިސްޓް ކޮށްފައެވެ. އަދި ޖޭލެން ބްރައުންވަނީ 17 ޕޮއިންޓް ހޯދާދީފައެވެ. މިމެޗްގައި ހީޓްއަށް އެންމެ ރަނގަޅު ކުޅުމެއް ދެއްކީ 29 ޕޮއިންޓް ހޯދާދީ 9 ރީބައުންޑް ނަގާދީ 5 އެސިސްޓް ދިން ޖިމީ ބަޓްލަރއެވެ.
މި ކާމިޔާބީއާއެކު މިސީރީޒް ފަސްވަނަ މެޗަކަށް ސެލްޓިކްސްއިން ގެންދިޔަ ނަމަވެސް އަދިވެސް ތިން މެޗް އެއް މެޗުން އެޓީމް އޮތީ ފަހަތުގައެވެ. އެޓީމަށް އޮތް މިހާރު އޮތް އެންމެ ބޮޑު ހިތްހަމަ ޖެހުމަކީ ފަސްވަނަ މެޗް ބޮސްޓަންގައި އަމިއްލަ ކޯޓްގައި އެޓީމްގެ ކުޅިބެލުންތެރިންގެ ކުރިމަތީ ކުޅެވުމެވެ. އެއީވެސް މިސީރީޒް އިތުރަށް ކުރިއަށް ގެންދަން ބޭނުންނަމަ ސެލްޓިކްސްއަށް މޮޅުވާން މަޖްބޫރު މެޗެކެވެ.
ހީޓް އަށް ބަލާލާއިރު ފަސްވަނަ މެޗް ކާމިޔާބުކޮށްފިނަމަ އީސްޓަން ކޮންފަރެންސްގެ ޗެމްޕިއަންކަން ލިބި އެން.ބީ.އޭ. ފައިނަލްސްއަށް އެޓީމް ދަތުރު ކުރާނެއެވެ. އެން.ބީ.އޭ. ފައިނަލްސްއިން ވެސްތަން ކޮންފަރެންސްގެ ޗެމްޕިއަނުންގެ ހައިސިއްޔަތުން ޑެންވަރ ނަގެޓްސް މިހާރު ވަނީ ޖާގަ ހޯދާފައެވެ.