ގުޅިފައިވާ ކޯލިޝަނެއް އެކުލަވައިލުމަށް ތައިލެންޑުގެ ޢާންމު އިންތިޚާބު ކާމިޔާބުކުރި އިދިކޮޅު މައި ދެ ޕާޓީން އެއްބަސްވެއްޖެއެވެ. މޭ 14 ވަނަ ދުވަހު ތައިލެންޑުގައި ބޭއްވި ޢާންމު އިންތިޚާބުގައި ކުރި ހޯދާފައި ވަނީ އިދިކޮޅު ދެ ޕާޓީ ކަމުގައިވާ "މޫވް ފޯވަރޑް" އާއި "ޕޫއާ ޓާއީ" ޕާޓީންނެވެ.
އިންތިޚާބުގައި އެންމެ ގިނަ ވޯޓު ކާމިޔާބުކޮށްފައި ވަނީ 42 އަހަރުގެ ޕީޓާ ލިމްޖަރޮއެންލާތްގެ މޫވް ފޯވަރޑުންނެވެ. އިންތިޚާބުގައި ލިބުނު ކާމިޔާބީއަށް ފަހު އޭނާ ވަނީ ކޯލިޝަން ސަރުކާރެއް އެކުލަވައިލުމުގެ ދަޢުވަތު އިންތިޚާބުގައި ވާދަކުރި އެހެން އިދިކޮޅު ޕާޓީތަކަށް ދީފައެވެ. މި ދަޢުވަތު ގަބޫލުކޮށް، ޕޫއާ ޓާއީ ޕާޓީން ވަނީ މޫވް ފޯވަރޑާ އެކު ކޯލިޝަނެއް ހެދުމަށް އެއްބަސްވެފައެވެ. އިންތިޚާބުގައި ދެވަނައަށް އެންމެ ގިނަ ގޮނޑި ކާމިޔާބު ކޮށްފައި ވަނީ ޝިނަވަޓްރާ ޢާއިލާގެ ޕޫއާ ޓާއީ ޕާޓީންނެވެ.
އިންތިޚާބުގައި ލިބުނު ކާމިޔާބީ ފާހަގަ ކުރައްވަމުން ލިމްޖަރޮއެންލާތް ވަނީ ބޮޑުވަޒީރު ކަމުގެ މަގާމާ ހަވާލުވަޑައިގަންނަވަން ތައްޔާރަށް ހުންނެވި ކަން އިޢުލާނު ކުރައްވާފައެވެ. ނަމަވެސް، ތައިލެންޑުގެ ޤާނޫނު އަސާސީއަށް 2014 ވަނަ އަހަރު ގެނެސްފައިވާ އިސްލާޙުތަކާ އެކު، އަދިވެސް ބާރު އޮތީ އަސްކަރިއްޔާގެ ނުފޫޒު އޮންނަ ޕާޓީތަކަށެވެ. އެހެންކަމުން، ބޮޑުވަޒީރު ކަމުގެ މަގާމު ހޯދުމަކީ ލިމްޖަރޮއެންލާތަށް ފަސޭހަ ކަމަކަށް ނުވާނެއެވެ.
ބޮޑުވަޒީރު ކަމުގެ މަގާމު ހޯއްދަވަން ތައިލެންޑުގެ ޤާނޫނު ހަދާ މަޖިލީހުގެ ތިރިގެއާއި މަތިގޭގައި ހިމެނޭ ޖުމުލަ 750 ގޮނޑީގެ ތެރެއިން 376 މެންބަރުންގެ ތާޢީދު ލިމްޖަރޮއެންލާތް ހޯއްދަވަން ޖެހިވަޑައިގަންނަވާނެއެވެ. އޭނާއަށް އެ ކަން ކާމިޔާބު ކުރެއްވޭނީ އިދިކޮޅު ހުރިހާ ޕާޓީތަކެއް އެކުވެ ކޯލިޝަންގައި ބައިވެރިވެއްޖެ ނަމައެވެ. އިދިކޮޅު ހަ ޕާޓީން އޭނާގެ ކޯލިޝަނާ ގުޅުމުން ވެސް އޭނާއަށް ލިބޭނީ 309 ވޯޓު ކަމުގައި މަސްރަޙު ދިރާސާ ކުރާ ފަރާތްތަކުން ބުނެއެވެ.
މޫވް ފޯވަރޑް ޕާޓީއަކީ ޒުވާނުންގެ ބޮޑު އާބާދީއެއް ތާޢީދުކުރާ، ވަރަށް އައު ޕާޓީއެކެވެ. އެ ޕާޓީން މަސައްކަތް ކުރަމުން ދަނީ ޒަމާނުއްސުރެ ތައިލެންޑުގައި އަމަލުކުރަމުންދާ ޤާނޫނުތަކާއި ގޮތްތަކަށް ބޮޑެތި ބަދަލުތަކެއް ގެންނާށެވެ. މީގެ ތެރޭގައި، ތައިލެންޑުގެ ޝާހީ ޢާއިލާގެ ޢިއްޒަތާއި އަބުރު ރައްކާތެރި ކުރުމަށް ހަދާފައިވާ ޤާނޫނުތައް އިސްލާޙު ކުރުން ވެސް ހިމެނެއެވެ. އެ ފަދަ ޤާނޫނުތައް ބޭނުންކޮށްގެން، ޚިޔާލުފާޅު ކުރުމުގެ ހައްޤުތައް ހަނިކޮށްފައިވާ ކަމަށް އެ ޤައުމުގެ ގިނަ ޒުވާނުން ގަބޫލު ކުރެއެވެ.