ޔޫކްރެއިނުގައި ހަނގުރާމަ ކުރަމުންދާ ރަޝިޔާގެ އިސްތިޢުމާރީ ސިފައިންގެ އަތްދަށުން އެ ޤައުމުގެ އުތުރުގައި އޮންނަ ބަޚްމުތް މިނިވަން ކުރަން ފަށާފައިވާ މަސައްކަތްތަކުގައި ކޮންމެ ވެސް ވަރެއްގެ ކުރިއެރުންތަކެއް ލިބިފައިވާ ކަމަށް ޔޫކްރެއިނުގެ އަސްކަރިއްޔާއިން ބުނެފިއެވެ. ބަޚްމުތަކީ އެ ޤައުމުގެ އިރުމަތީގައި އޮންނަ ދޮންބާސްގެ މައި ދެ ސަރަޙައްދުގެ ތެރެއިން ޑޮނެޓްސްކުގައި އޮންނަ ރަށެކެވެ.
ރަޝިޔާ ސިފައިން އެ ރަށް ހިފުމަށް މަސައްކަތް ފަށާފައި ވަނީ މީގެ 10 ވަރަކަށް މަސް ކުރިންނެވެ. ނަމަވެސް، އެ ރަށް ދިފާޢު ކުރަން ޔޫކްރެއިނުގެ ފައުޖުތަކުން ދަނީ ހަނގުރާމަ ކުރަމުންނެވެ. އެ ރަށުގެ ބޮޑު ބައެއް މި ވަގުތު އޮތީ ރަޝިޔާގެ ސިފައިންގެ އަތްދަށުގައެވެ. ރަޝިޔާއިން އެ ރަށް ހިފުމަށް ހަނގުރާމައިގެ ކުރީ ސަފަށް ފޮނުވާފައި ވަނީ ވެގްނަރ ގުރޫޕުގެ ކުލީ ސިފައިންނެވެ.
ރަޝިޔާގެ އަތްދަށުން ބަޚްމުތް މިނިވަން ކުރަން ފަށާފައިވާ މަސައްކަތްތަކުގައި ކޮންމެ ވެސް ވަރެއްގެ ކާމިޔާބީތަކެއް ހޯދިފައިވާ ކަމަށް ޔޫކްރެއިނުގެ އަސްކަރިއްޔާއިން ބުނެފައިވާއިރު، މިއީ އެ އެރަށް މިނިވަން ކުރަން ޔޫކްރެއިނުން މަސައްކަތް ފަށާފައިވާ ކަން އިޢުލާނު ކުރި ފުރަތަމަ ފަހަރެވެ. މި ކަން އިޢުލާނު ކޮށްފައި މި ވަނީ ޔޫކްރެއިނަށް އަރާފައިވާ ރަޝިޔާގެ ފައުޖުތަކާ ދެކޮޅަށް ވަރުގަދަ އަސްކަރީ ކެމްޕޭނެއް ފެށުމަށް ތައްޔާރުވަމުންދާ ކަން ޔޫކްރެއިނުން އިޢުލާނު ކޮށްފައިވާ ދަނޑިވަޅެއްގައެވެ.
ޔޫކްރެއިނުން ބުނީ ބަޚްމުތް ހިފުމަށް ކުރަމުންދާ ހަނގުރާމައިގެ ކުރީ ސަފަށް ރަޝިޔާއިން އިތުރު ސިފައިންގެ ފައުޖުތައް ފޮނުވަމުންދާ ކަމުގައެވެ. އަދި، އެ ރަށް ދިފާޢު ކުރަން ޔޫކްރެއިނުގެ ފައުޖުތަކުން ކުރަމުން ދަނީ ދަތި، އުނދަގޫ ހަނގުރާމައެއް ކަމުގައި ވެސް އެ ޤައުމުން ބުނެއެވެ. ރަޝިޔާ ފައުޖުތަކުން އަތްގަދަ ކޮށްފައިވާ ބަޚްމުތްގެ އުތުރުގެ ބައެއް ސަރަޙައްދުތަކުން އެ މީހުން ފަހަތަށް ޖައްސައި، ކުރިއެރުންތަކެއް ހޯދާފައިވާ ކަމުގައި ޔޫކްރެއިނުގެ އަސްކަރިއްޔާއިން ބުނެއެވެ.
"ޔޫކްރެއިނުގެ ސިފައިން ދަނީ ރަޝިޔާގެ ފައުޖުތައް ފަހަތަށް ޖައްސަމުން. މިއީ، ބަޚްމުތަށް އަރާފައިވާ ރަޝިޔާގެ ފައުޖުތަކުގެ މައްޗަށް ކުރިއެރުންތަކެއް ހޯދުނު ފުރަތަމަ ފަހަރު. ފާއިތުވި ދުވަސްތަކުގެ ތެރޭގައި ޔޫކްރެއިނުގެ ސިފައިން ވާނީ ކުރިއެރުންތައް ހޯދާނެ ކަމާއި، ރަޝިޔާ ސިފައިން ފަހަތަށް ޖެއްސޭނެ ކަން އެ މީހުންނަށް ސާބިތުކޮށްދީފައި. ރަޝިޔާގެ ބާރުގަދަ ފައުޖުތަކާ އަޅައިބަލާއިރު ޔޫކްރެއިންގެ ސިފައިންގެ އަތުގައި ހަތިޔާރާއި ވަސީލަތްތައް މަދު. ނަމަވެސް، އެ މީހުން އެ ދަނީ ރަޝިޔާގެ ރޭވުންތައް ރޫޅައިލަމުން،" ޔޫކްރެއިންގެ އަސްކަރިއްޔާގެ އިސް އޮފިސަރެއް ކަމުގައިވާ އޮލެގްޒެންޑަރ ސީރްސްކީ ވިދާޅުވިއެވެ.
ޔޫކްރެއިނަށް އަރާފައިވާ ރަޝިޔާގެ އިސްތިއުމާރީ ސިފައިންނާ ދެކޮޅަށް ވަރުގަދަ އަސްކަރީ ކެމްޕޭނެއް ފެށުމަށް ޔޫކްރެއިނުން ތައްޔާރުވަމުންދާ ކަން އިޢުލާނުކޮށްފައިވީ ނަމަވެސް، އެ ކެމްޕޭން ފަށާނެ ވަކި ތާރީޚެއް އިޢުލާނުކޮށްފައެއް ނުވެއެވެ. ބަޚްމުތުގައި ޔޫކްރެއިނުން ހޯދަމުންދާ ކުރިއެރުންތަކަކީ އެ ކެމްޕޭނުގެ ބައެއް ނޫން ކަމުގައި ވެސް ޔޫކްރެއިނުން ދަނީ ބުނަމުންނެވެ. ނަމަވެސް، ބަޚްމުތާއި އެ ރަށް ވަށައިގެންވާ ސަރަޙައްދުތަކުގައި ޔޫކްރެއިނުގެ ފައުޖުތަކުން ރަޝިޔާގެ ސިފައިންނާ ދެކޮޅަށް ވަރުގަދަ ޙަމަލާތަކެއް ދެމުންދާ ކަމުގައި އެ ޤައުމުގެ ދިފާޢީ ވަޒީރުގެ ނައިބު ހެނާ މާލިއާރް ވިދާޅުވިއެވެ.
ރަޝިޔާގެ ރައީސް ވްލަޑިމިޔަރ ޕުޓިން އޭނާގެ އަސްކަރިއްޔާ ޔޫކްރެއިނަށް ފޮނުވައިގެން ހަނގުރާމަ ފައްޓަވާފައި ވަނީ 2022 ވަނަ އަހަރުގެ ފެބުރުވަރީ މަހުގެ 24 ވަނަ ދުވަހުއެވެ. މި ހަނގުރާމައަށް 15 މަސް ފުރުމާ ގާތްވެފައިވާއިރު، ޔޫކްރެއިނުގެ އިރުމަތީގައިވާ ދޮންބާސްގެ ޑޮނެޓްސްކާއި ލުހާންސްކުގެ އިތުރުން ދެކުނުގައިވާ ޒަޕޮރީޜިޔާއަށް ރަޝިޔާ ސިފައިން ވަނީ އަތްގަދަކޮށްފައެވެ. އަދި، އެންމެ ދެކުނުން އޮންނަ ކްރައިމިޔާއަކީ 2014 ވަނަ އަހަރު ރަޝިޔާއިން އަތްގަދަކޮށްފައިވާ ސަރަޙައްދެކެވެ.