މެކްސިކޯގެ ހައިވޭއެއްގައި ހިނގި ނުރައްކާތެރި އެކްސިޑެންޓެއްގައި 13 މީހުން މަރުވެއްޖެއެވެ. މި ހާދިސާ ހިނގާފައި ވަނީ އެ ޤައުމުގެ އިރުއުތުރުގައިވާ ޓަމައުލިޕާސް ސްޓޭޓްގެ ދެ ރަށް ކަމުގައިވާ ޒަރަގޯޒާއާއި ހިދާލްގޯއާ ދެމެދު އޮންނަ ހައިވޭގައެވެ. ޖެހިފައި ވަނީ ފަސިންޖަރުން އުފުލާ ވޭނަކާއި ބޮޑު ސެމައި-ޓްރަކެކެވެ.
މި ހާދިސާގައި ގިނަ ޢަދަދެއްގެ ބަޔަކު މަރުވެފައި ވަނީ ދެ އުޅަނދުގައި އަލިފާން ރޯވުމުގެ ސަބަބުން ކަމަށް ޓަމައުލިޕާސްގެ އޮފިޝަލުން ވިދާޅުވެއެވެ. ދެ އުޅަނދު ވެސް ވަނީ އަނދައި ހުލިވެފައެވެ. މަރުވި ގިނަ މީހުން ތިބީ ފަސިންޖަރުން އުފުލާ ވޭންގައެވެ.
މި ހާދިސާގައި މަރުވި މީހުންގެ ޢަދަދު އިތުރުވާނެ ކަމަށް ބެލެވޭ ކަމުގައި އޮފިޝަލުން ވިދާޅުވެއެވެ. ކުރިން ބެލުނު ގޮތުގައި މިހާދިސާ ހިނގި ވަގުތު ސެމައި-ޓްރަކްގައި އިނީ ހަމައެކަނި އެ އުޅަނދުގެ ޑްރައިވަރެވެ. ނަމަވެސް، އޭނާގެ ޢާއިލާ ވެސް އެ ވަގުތު އެ އުޅަނދުގައި ތިބި ކަމަށް ބެލެވޭތީ، އެ މީހުންގެ ހަށިތައް ހޯދަން އޮފިޝަލުން މިހާރު ދަނީ މަސައްކަތް ކުރަމުންނެވެ. އެކްސިޑެންޓުވުމުން އެ އުޅަނދުގެ ޑްރައިވަރު ފިލާފައިވާ ކަމަށް ވެސް ބައެއް ރިޕޯޓުތައް ބުނެއެވެ.
މި ހާދިސާގައި މަރުވި މީހުންގެ ޢަދަދު 20 އަށް އަރާފައިވާ ކަމަށް ޓަމައުލިޕާސްގެ މީޑިޔާތަކުން ރިޕޯޓު ކުރި ނަމަވެސް، އެ ސްޓޭޓްގެ އެއްވެސް ރަސްމީ އިދާރާއަކުން އެ ކަން ކަށަވަރު ކޮށްދީފައެއް ނުވެއެވެ. މި ހާދިސާ ހިނގި ވަގުތު ފަސިންޖަރުން އުފުލާ ވޭންގައި ދަތުރުކޮށްފައި ވަނީ އެއް ޢާއިލާއެއްގެ މެންބަރުންނެވެ. ކުއްޔަށް ހިފާފައިވާ އެ އުޅަނދު ދުއްވަން އިނީ އެ ޢާއިލާގެ މެންބަރެކެވެ. މި ހާދިސާ ހިނގަން މެދުވެރިވި ސަބަބު ދެނެގަތުމަށް އޮފިޝަލުން މިހާރު ދަނީ ތަހުޤީޤު ކުރަމުންނެވެ.