ޔޫކްރެއިނުގެ މިނިވަން ކަމުގެ ދިފާޢުގައި އެ ޤައުމުގެ ސިފައިން ކުރަމުންދާ ހަނގުރާމައަށް އަސްކަރީ އެހީތެރިކަން ފޯރުކޮށްދިނުމުގެ ގޮތުން އެ ޤައުމަށް ގިނަ ޢަދަދެއްގެ މިސައިލާއި ދުރު ރާސްތާ ޑްރޯން ފޮނުވާނެ ކަމަށް އިނގިރޭސިވިލާތުގެ ބޮޑުވަޒީރު ރިޝީ ސުނަކް ވިދާޅުވެއްޖެއެވެ. އޭނާ މި ކަން އިޢުލާނު ކުރައްވާފައި ވަނީ ޔޫކްރެއިނުގެ ރައީސް ވޮލޮޑޮމީރް ޒެލެންސްކީ އިނގިރޭސިވިލާތަށް ވަޑައިގެންނެވުމުން، އޭނާއާ ބައްދަލު ކުރައްވައި ވާހަކަފުޅު ދައްކަވަމުންނެވެ.
އިނގިރޭސިވިލާތަށް ވަޑައިގެންނެވުމުގެ ކުރިން ޒެލެންސްކީ ވަނީ ފަރަންސޭސިވިލާތާއި ޖަރުމަނުވިލާތަށް ވެސް ވަޑައިގަންނަވާފައެވެ. އެ ޤައުމުތަކުގެ އިސްވެރިން ވެސް ވަނީ ޔޫކްރެއިނަށް އިތުރު އަސްކަރީ އެހީތެރިކަން ފޯރުކޮށްދޭނެ ކަން އިޢުލާނު ކޮށްފައެވެ.
އިނގިރޭސިވިލާތަކީ ޔޫކްރެއިނަށް އަސްކަރީ އެހީތެރިކަން ފޯރުކޮށްދިނުމުގައި މުޅި ދުނިޔެއަށް މިސާލު ދައްކަމުންދާ ޤައުމެއް ކަމުގައި ޒެލެންސްކީ ސިފަ ކުރައްވައެވެ. އަދި، ކުރިއަށް އޮތް ދުވަސްތަކުގައި ދެ ޤައުމުގެ ދެމެދުގައި އޮތް ގުޅުންތައް އިތުރަށް ބަދަހިވަމުން ދާނެ ކަމުގައި ވެސް އޭނާ ވިދާޅުވިއެވެ.
ޒެލެންސްކީ އިނގިރޭސިވިލާތަށް ވަޑައިގަންނަވާފައި މި ވަނީ، ވިލާތުގެ ކައުންސިލްގެ އިސްވެރިންގެ ބައްދަލުވުމަކާއި އެންމެ ބޮޑެތި އިޤުތިޞާދުތަކުގެ މައްޗަށް އެކުލެވިގެންވާ ގްރޫޕް އޮފް ސެވަން (ޖީ7)ގެ ބައްދަލުވުމެއް ބޭއްވުމަށް ތައްޔާރުވަމުންދާ ދަނޑިވަޅެއްގައެވެ. އެ ދެ ބައްދަލުވުމުގައި ވެސް ވީޑިޔޯ މެދުވެރިކޮށް ޒެލެންސްކީ ތަޤުރީރު ކުރައްވާނެއެވެ.
ޔޫކްރެއިންގެ ދިފާޢުގައި އެ ޤައުމުގެ ސިފައިން ކުރަމުންދާ ހަނގުރާމައިގައި މިއީ ވަރަށް މުހިންމު ދަނޑިވަޅެއް ކަމުގައި ސުނަކް ވިދާޅުވިއެވެ. އަދި، ރަޝިޔާއިން ޔޫކްރެއިނަށް އަރައި ހަނގުރާމަ ފަށާފައި ވަނީ ޔޫކްރެއިންގެ އެއްވެސް ކުށެއް އޮވެގެން ނޫން ކަން ފާހަގަކުރައްވައި ސުނަކް ވިދާޅުވީ، ޔޫކްރެއިނަށް އެހީތެރިކަން ފޯރުކޮށްދިނުމުގައި އިނގިރޭސިވިލާތުން ދެމިއޮންނާނެ ކަމުގައެވެ.
"ރަޝިޔާއިން އަރައި ހަނގުރާމަ ކުރަމުން ދަނީ ޔޫކްރެއިނުގެ ބިމުގައި. ނަމަވެސް، މި ހަނގުރާމައިގެ އަސަރު ދުނިޔޭގެ ހުރިހާ ބައްރަކާއި ކަންކޮޅުތަކަށް ދަނީ ކުރަމުން. ރަޝިޔާގެ އިސްތިއުމާރީ ސިފައިންގެ މައްޗަށް ޔޫކްރެއިނުން ކުރިހޯދުމަކީ އެންމެން ވެސް ދެކެން ބޭނުންވާ ދުވަސް،" ސުނަކް ވިދާޅުވިއެވެ.
އިނގިރޭސިވިލާތުން ޔޫކްރެއިނަށް އިތުރު ހަތިޔާރު ފޯރުކޮށްދޭން ނިންމާފައިވާއިރު، އޭގެ ތެރޭގައި ހިމެނެނީ މިސައިލާއި ދުރު ރާސްތާގެ ޑްރޯނެވެ. އެ މިސައިލަކީ ވައިގެ ދިފާޢީ ނިޒާމަށް ބޭނުންވާ މިސައިލެވެ. އަދި، ޔޫކްރެއިނަށް ފޯރުކޮށްދޭ ޑްރޯންތަކަކީ 200 ކިލޯމީޓަރުގެ ރާސްތާގެ ހަތިޔާރުތަކެއް ކަމުގައި އިނގިރޭސިވިލާތުން ބުނެއެވެ. ކުރިއަށް އޮތް މަސްތަކުގެ ތެރޭގައި މި ހަތިޔާރުތައް ޔޫކްރެއިނަށް ފޮނުވާނެ ކަމަށް ވެސް އެ ޤައުމުން ބުނެއެވެ.
ޔޫކްރެއިނަށް ދުރު ރާސްތާގެ މިސައިލް ފޮނުވާނެ ކަމަށް ވެސް އިނގިރޭސިވިލާތުން ވަނީ ދާދިފަހުން އިޢުލާނުކޮށްފައެވެ. އިނގިރޭސިވިލާތަކީ ޔޫކްރެއިނަށް ދުރު ރާސްތާ މިސައިލް ފޮނުވާނެ ކަން އިޢުލާނުކޮށްފައިވާ ފުރަތަމަ ޤައުމެވެ. އެ ޤައުމުން ޔޫކްރެއިނަށް ފޮނުވަން ނިންމާފައި ވަނީ "ސްޓޯމް ޝެޑޯ" މަރުކާގެ ކްރޫޒް މިސައިލެވެ.
2022 ވަނަ އަހަރުގެ ފެބުރުވަރީ މަހުގެ 24 ވަނަ ދުވަހު ރަޝިޔާ ސިފައިން ޔޫކްރެއިނަށް އަރައި ހަނގުރާމަ ފެށުމާ އެކު ޒެލެންސްކީ ވަނީ އެންމެ ފަހުގެ ޒަމާނީ އަސްކަރީ މަތިންދާބޯޓު ހޯދަން މަސައްކަތް ފައްޓަވާފައެވެ. ވިލާތުގެ ދެ ޤައުމަކާއި އިނގިރޭސިވިލާތަށް ކުރެއްވި ދަތުރުފުޅުގައި ވެސް އަސްކަރީ މަތިންދާބޯޓު ހޯދަން އޭނާ ވަނީ މަސައްކަތް ކުރައްވާފައެވެ. ނަމަވެސް، އެއްވެސް ޤައުމަކުން ޒަމާނީ މަތިންދާބޯޓު ޔޫކްރެއިންގެ އަސްކަރިއްޔާއަށް ފޯރުކޮށްދޭން އެއްބަސްވެފައެއް ނުވެއެވެ.