ރަޝިޔާއާއި ޔޫކްރެއިން ގުޅޭ ސަރަޙައްދީ ރޮނގު ކައިރިއަށް ރަޝިޔާގެ އަސްކަރިއްޔާގެ ދެ މަތިންދާބޯޓާއި ދެ ހެލިކޮޕްޓަރު ވައްޓައިލައިފިއެވެ. އެ އުޅަނދުތައް ވައްޓައިލާފައި ވަނީ ރަޝިޔާގެ ބްރްޔަންސް ސަރަޙައްދުން ދަތުރުކުރަމުން ދަނިކޮށެވެ. އެ އުޅަނދުތަކަށް ޙަމަލާދީ ވައްޓައިލުމުގެ ފަހަތުގައި ވަނީ ޔޫކްރެއިން ކަމަށް ބެލެވުނު ނަމަވެސް، ޔޫކްރެއިނުން އެ ކަމުގެ ޒިންމާ އުފުލާފައެއް ނުވެއެވެ.
ރަޝިޔާގެ އަސްކަރީ އުޅަނދުތައް ވައްޓައިލާފައިވާ ކަން އެންމެ ފުރަތަމަ ހާމަކޮށްފައި ވަނީ ރަޝިޔާގެ ނޫހެއް ކަމުގައިވާ ކޮމެރްސާންތުންނެވެ. ވައްޓައިލާފައި ވަނީ "ސުޚޯއީ އެސް.ޔޫ-34" މަރުކާގެ ބޮންއަޅާ އަސްކަރީ މަތިންދާބޯޓަކާއި، "އެސް.ޔޫ-35" މަރުކާގެ އަސްކަރީ މަތިންދާބޯޓަކާއި، "އެމް.އައި-8" މަރުކާގެ ދެ ހެލިކޮޕްޓަރު ކަމަށް އެ ނޫހުން ރިޕޯޓުކުރެއެވެ. އެ އުޅަނދުތައް ވައްޓައިލާފައި ވަނީ ޔޫކްރެއިނުގެ ޗަރނީހިވް ސަރަޙައްދަށް ޙަމަލާތަކެއް ދިނުމަށް ދަތުރުކުރަމުން ދިޔަ މަގުމަތީގައެވެ.
ރަޝިޔާގެ އަސްކަރީ އުޅަނދުތަކެއް ވައްޓައިލާފައިވާ ކަން ކޮމެރްސާންތުން ރިޕޯޓުކުރި ނަމަވެސް، އެ ކަން ކަށަވަރު ކޮށްދިނުމަށް އެއްވެސް ހެއްކެއް ދައްކާފައެއް ނުވެއެވެ. ނަމަވެސް، ރަޝިޔާގެ އަސްކަރީ ދާއިރާގެ ބައެއް ބްލޮގަރުން ވަނީ ޙަމަލާތަކެއްގައި ރަޝިޔާގެ އަސްކަރީ އުޅަނދުތަކެއް ވައްޓައިލާފައިވާ ކަން ރިޕޯޓުކޮށްފައެވެ. މި ކަމާ ގުޅޭ ގޮތުން ރަޝިޔާގެ ދިފާޢީ ވުޒާރާއިން އަދި ވަކި އެއްޗެއް ހާމަކޮށްފައެއް ނުވެއެވެ.
ރަޝިޔާގެ ސަރަޙައްދުގައި ދޭ މި ފަދަ ޙަމަލާތަކުގެ ޒިންމާ ނެގުމަށް ޔޫކްރެއިނުން ދެކޮޅު ހަދާ ކަން ފާހަގަކޮށްލަން ޖެހެއެވެ. ރަޝިޔާގެ އެކި ސަރަޙައްދުތަކުގައި މީގެ ކުރިން ދީފައިވާ ތަފާތު އެކި ޙަމަލާތަކުގައި ޔޫކްރެއިނުގެ ބައިވެރިވުމެއް ނެތް ކަމުގައި ވެސް އެ ޤައުމުން ދަނީ ބުނަމުންނެވެ. މި ހާދިސާގައި ރަޝިޔާގެ އަސްކަރީ އުޅަނދުތަކުގެ ހުރިހާ ފަޅުވެރިން މަރުވެފައިވާ ކަމުގައި ކޮމެރްސާންތުން ރިޕޯޓު ކުރެއެވެ.
ޔޫކްރެއިންގެ ރައީސް ވޮލޮޑޮމީރް ޒެލެންސްކީގެ އިސް މުޝީރެއް ކަމުގައިވާ މިޚައީލް ޕޮޑޮލްޔާކް ވަނީ ޔޫކްރެއިނުގެ ޗަރނީހިވް ސަރަޙައްދަށް ޙަމަލާދިނުމަށް ދަތުރުކުރަނިކޮށް ރަޝިޔާގެ އަސްކަރީ އުޅަނދުތަކެއް ވައްޓައިލާފައިވާ ކަމަށް ބުނެފައެވެ. ނަމަވެސް، އެ ކަމުގެ ފަހަތުގައި ވަނީ ކޮން ބަޔެއް ކަން ސާފު ނޫން ކަމުގައި އޭނާ ވިދާޅުވިއެވެ. އަދި، އެ އުޅަނދުތައް ވައްޓައިލުމާ ގުޅިގެން އޭނާ ވަނީ އުފާ ފާޅުކުރައްވާފައެވެ.
ރަޝިޔާގެ އަސްކަރީ މަތިންދާބޯޓެއް ވެއްޓިފައިވާ ކަމަށް އެ ޤައުމުގެ ޓީ.އޭ.އެސް.އެސް. ނޫހުން ވެސް ރިޕޯޓު ކުރިއެވެ. ނަމަވެސް، އެ ބޯޓު ވެއްޓުނީ ކޮން ސަބަބާ ގުޅިގެން ކަން ހާމަކޮށްފައެއް ނުވެއެވެ. އަދި، ރަޝިޔާގެ އަސްކަރީ ހެލިކޮޕްޓަރަކަށް ޓެކްނިކަލް މައްސަލައެއް ދިމާވެގެން ވެއްޓިފައިވާ ކަމުގައި ވެސް އެ ނޫހުން ރިޕޯޓުކޮށްފައިވެއެވެ. އެ ހެލިކޮޕްޓަރު ވެއްޓުނީ ބްރްޔަންސް ސަރަޙައްދުގެ ރަށެއް ކަމުގައިވާ ކްލިންޓްސީއަށް ކަމަށް ޓީ.އޭ.އެސް.އެސްއިން ރިޕޯޓުކުރެއެވެ.
އެމެރިކާގެ އިންސްޓިޓިއުޓް ފޯރ ދަ ސްޓަޑީ އޮފް ވޯއިން ބުނީ ރަޝިޔާގެ އަސްކަރީ އުޅަނދުތައް ވައްޓައިލާފައި ވަނީ ޔޫކްރެއިނުގެ ސަރަޙައްދީ ރޮނގާ 51 ކިލޯމީޓަރު ދުރުގައިވާ ރަށަކަށް ކަމުގައެވެ. އަދި، އެ އުޅަނދުތައް ވައްޓައިލާފައި ވަނީ ޔޫކްރެއިންގެ ވައިގެ ދިފާޢީ ނިޒާމު ބޭނުންކޮށްގެން ކަމަށް ރަޝިޔާގެ ބްލޮގަރުން ބުނާ ކަމަށް ވެސް އެ މަރުކަޒުން ބުނެއެވެ.
ރަޝިޔާގެ އަސްކަރީ މަތިންދާބޯޓުތަކެއް ވައްޓައިލާފައި މި ވަނީ، ޔޫކްރެއިންގެ ހުޅަނގުގައިވާ ކްމެލްނިޓްސްކީއަށް ރަޝިޔާއިން ވަރުގަދަ ޑްރޯން ޙަމަލާތަކެއް ދެމުންދިޔަ ދަނޑިވަޅެއްގައެވެ. އެ ޙަމަލާތަކުގައި އެ ރަށުގެ ޢުމްރާނީ ވަސީލަތްތަކާއި ޢިމާރާތްތަކަށް ބޮޑެތި ގެއްލުންތަކެއް ލިބިފައިވާއިރު، 11 މީހުން ޒަޚަމުވި ކަމުގައި އެ ސަރަޙައްދުގެ މޭޔަރު ވިދާޅުވިއެވެ. އެ ޙަމަލާތަކުގައި އެ ސަރަޙައްދުގެ ރޭލު ދަތުރުފަތުރުގެ ވިއުގައަށް ވަނީ ގެއްލުން ލިބިފައެވެ. އެ ސަރަޙައްދަށް ޙަމަލާދޭން ރަޝިޔާއިން ބޭނުންކުރި 22 ޑްރޯންގެ ތެރެއިން 18 ޑްރޯނެއް ދިފާޢު ކޮށްފައިވާ ކަމުގައި ޔޫކްރެއިނުގެ އަސްކަރިއްޔާއިން ބުނެއެވެ.