ރަޝިޔާއިން ޔޫކްރެއިނަށް އަރައި ކުރަމުންދާ ހަނގުރާމަ ހުއްޓުމަކަށް ގެނައުމަށް ކުރަމުންދާ މަސައްކަތްތަކުގައި ޗައިނާގެ ބައިވެރިވުމާއި އެހީތެރިކަން ބޭނުންވާ ކަމުގައި ފަރަންސޭސިވިލާތުގެ ޚާރިޖީ ވަޒީރު ކެތެރީން ކޮލޯނާ ވިދާޅުވެއްޖެއެވެ. ފަރަންސޭސިވިލާތަށް ވަޑައިގެން އުޅުއްވާ ޗައިނާގެ ޚާރިޖީ ވަޒީރު ޗިން ގަންގްއާ ބައްދަލުކުރައްވައި ވާހަކަފުޅު ދައްކަވަމުން ކޮލޯނާ ވިދާޅުވީ، ބައިނަލްއަގުވާމީ ސުލްޙައާއި ހަމަޖެހުން ދެމެހެއްޓުމަށް ކުރަމުންދާ މަސައްކަތްތަކުގައި ޗައިނާއަށް މުހިންމު ދައުރެއް އަދާކުރެވޭނެ ކަމަށް ގަބޫލުފުޅު ކުރައްވާ ކަމުގައެވެ.
ވިލާތުގެ ތިން ޤައުމަކަށް ކުރައްވާ ދަތުރުފުޅުގައި ފަރަންސޭސިވިލާތުގެ އިތުރުން ޗިން ޖަރުމަނުވިލާތާއި ނޯވޭއަށް ވެސް ވަޑައިގަންނަވާނެއެވެ. ޗިންއާ އެކު ބޭއްވެވި ބައްދަލުވުމުގައި ކޮލޯނާ ވަނީ ރަޝިޔާ ސިފައިން ޔޫކްރެއިނަށް ފޮނުވައިގެން ފަށާފައިވާ ހަނގުރާމަ ހުއްޓުވުމަށް އިތުރަށް މަސައްކަތް ކުރެއްވުމަށް ޗިންއަށް ގޮވައިލައްވާފައެވެ.
ކޮލޯނާ ވިދާޅުވީ ހަނގުރާމަ ހުއްޓައިލުމަށް ރަޝިޔާއަށް ބާރުއެޅުމަށް ޗައިނާއަށް ގިނަ މަސައްކަތްތަކެއް ކުރެވޭނެ ކަމަށް ގަބޫލުކުރައްވާ ކަމަށާއި، އ.ދގެ ޗާޓަރާ އެއްގޮތަށް އަމަލުކުރުމަށް ރަޝިޔާއަށް ބާރުއެޅުމަށް އެދިވަޑައިގަންނަވާ ކަމުގައެވެ. "ޗައިނާއަކީ ރަޝިޔާއާ އެކު ވަރަށް ގާތް ގުޅުމެއް ބާއްވަމުން ޤައުމެއް. މި ގުޅުމުގެ ބޭނުން ހިފައި، ޔޫކްރެއިން ހަނގުރާމައާ ގުޅޭ ގޮތުން ރަޝިޔާއަށް ވިސްނައިދީ، ހަމަމަގަށް ގެންނަން ޗައިނާއިން މަސައްކަތް ކުރަންޖެހޭ،" ކޮލޯނާ ވިދާޅުވިއެވެ.
ފަރަންސޭސިވިލާތުގެ ރައީސް އެމަނުއެލް މެކްޚޯން ވެސް ދާދިފަހުން ވަނީ ޗައިނާއަށް ވަޑައިގަންނަވައި، އެ ޤައުމުގެ ރައީސް ޝީ ޖިންޕިންގްއާ ބައްދަލުކުރައްވާފައެވެ. އެ ބައްދަލުކުރުމުގައި ވެސް މެކްޚޯން ވަނީ ރަޝިޔާ-ޔޫކްރެއިން ހަނގުރާމަ ހުއްޓުވުމަށް ޗައިނާގެ އިސް ދައުރެއް އޮތް ކަން ފާހަގަކުރައްވައި، އެ ކަމުގައި އެހީތެރިވުމަށް ޝީއަށް ގޮވައިލައްވާފައެވެ. މެކްޚޯން ބެއިޖިންގަށް ވަޑައިގަންނަވާފައި ވަނީ ހުސްވި އޭޕްރިލް މަހުއެވެ.
އެ ބައްދަލުވުމުގައި މެކްޚޯން ދެއްކެވި ބައެއް ވާހަކަފުޅުތަކާ ގުޅިގެން އޭނާ ވަނީ ހޫނުފެނަށް ވެއްޓިވަޑައިގަންނަވާފައެވެ. މެކްޚޯން ވިދާޅުވެފައި ވަނީ، ތައިވާނުގެ މިނިވަންކަމާ ގުޅޭ މައްސަލައިގައި އެމެރިކާއާއި ޗައިނާގެ ސިޔާސަތުތަކަށް ވިލާތުން ބޯލަނބަން ނުޖެހޭ ކަމުގައެވެ. އަދި، އެ ބަހުސްގެ ތެރެއަށް ވިލާތުން ވަންނަން ނުޖެހޭ ކަމުގައެވެ. މި ކަމާ ގުޅިގެން ވިލާތުގެ ބައެއް ޤައުމުތަކުގެ އިސްވެރިން ވަނީ މެކްޚޯނަށް ފާޑުވިދާޅުވެފައެވެ. އޭގެ ތެރޭގައި ޖަރުމަނުވިލާތުގެ ދިފާޢީ ވަޒީރު ބޮރިސް ޕިސްޓޯރިޔަސް ހިމެނިވަޑައިގަންނަވައެވެ.
ރަޝިޔާ-ޔޫކްރެއިން ހަނގުރާމައާ ގުޅޭ ގޮތުން ޗައިނާއިން ގެންގުޅެނީ މެދުމިނުގެ ސިޔާސަތެއް ކަމުގައި އެ ޤައުމުން ބުނެއެވެ. ނަމަވެސް، ޗައިނާއިން ދަނީ އެކި ދާއިރާތަކުން ރަޝިޔާއާ އެކު ގާތް ގުޅުމެއް ބާއްވަމުންނެވެ. ހުސްވި އޭޕްރިލް މަހުގެ ތެރޭގައި ޝީ ވަނީ ޔޫކްރެއިނުގެ ރައީސް ވޮލޮޑޮމީރް ޒެލެންސްކީއާ ފޯނުން ގުޅުއްވައި ވާހަކަފުޅު ދައްކަވާފައެވެ. އެއީ، 2022 ވަނަ އަހަރުގެ ފެބުރުވަރީ މަހުގެ 24 ވަނަ ދުވަހު ރަޝިޔާ ސިފައިން ޔޫކްރެއިނަށް އަރައި ހަނގުރާމަ ފެށި ފަހުން އެ ދެ ބޭފުޅުން ވާހަކަފުޅު ދައްކަވާފައިވާ ފުރަތަމަ ފަހަރެވެ.
ރަޝިޔާ-ޔޫކްރެއިން ހަނގުރާމައިގެ އިތުރުން އުތުރު ކޮރެޔާގެ ނިއުކްލިޔަރ ޕުރޮގުރާމާއި މިސައިލް ޕުރޮގުރާމާ ގުޅޭ ގޮތުން ވެސް ޗިންއާ ކޮލޯނާގެ ބައްދަލުވުމުގައި މަޝްވަރާ ކުރެއްވިއެވެ. އުތުރު ކޮރެޔާއިން ފަހަކަށް އައިސް ގިނަ ޢަދަދެއްގެ މިސައިލް ޓެސްޓުތަކެއް ހަދަމުންދާތީ، ސަރަޙައްދީ ސުލްޙައާއި ހަމަނުޖެހުމަށް ވަނީ ނުރައްކާވެފައެވެ. މި ކަމާ މެދު ފުންކޮށް ވިސްނާވަޑައިގެންނެވުމަށް ކޮލޯނާ ވަނީ ޗިންގެ ކިބައިން އެދިވަޑައިގަންނަވާފައެވެ.