ޕާކިސްތާނުގެ ކުރީގެ ބޮޑުވަޒީރު އިމްރާން ޚާން ހައްޔަރުކޮށްފައި ވަނީ ޤާނޫނާ ޚިލާފަށް ކަމަށް އެ ޤައުމުގެ ސުޕްރީމް ކޯޓުން ކަނޑައަޅައިފިއެވެ. އެ ކޯޓުން މި ގޮތަށް ކަނޑައަޅާފައިވާ ކަން ހާމަކޮށްފައި ވަނީ ޚާންގެ ޤާނޫނީ ވަކީލެވެ. ޚާން ހައްޔަރުކޮށްފައި ވަނީ ޤާނޫނާ ޚިލާފަށް ކަމަށް ކަނޑައަޅާފައި މި ވަނީ، އޭނާ ހައްޔަރުކުރިތާ ދެ ދުވަސް ފަހުންނެވެ.
ޚާން ހައްޔަރުކޮށްފައި ވަނީ އޭނާއާ ދެކޮޅަށް އުފުލާފައިވާ ކޮރަޕްޝަންގެ ތުހުމަތުގެ ދަޢުވާތަކުގެ އަޑުއެހުމަކަށް ހާޒިރުވުމަށް ވެރިރަށް އިސްލާމްއާބާދުގައި ހުންނަ ހައި ކޯޓަށް ހާޒިރުވުމުން މޭ މަހުގެ 9 ވަނަ ދުވަހުއެވެ. ޕެރެމިލިޓަރީ ރޭންޖަރސްގެ ފުލުހުން ޚާން ހައްޔަރުކުރަން އުޅުމުގެ ތެރޭގައި އޭނާގެ ބޮލަށް ޒަޚަމުތަކެއް ލިބިފައިވާ ކަމުގައި ވެސް އޭނާ ޤާނޫނީ ވަކީލުންގެ ޓީމުން ބުނެއެވެ. ޚާން ހައްޔަރުކުރުމާ ގުޅިގެން ޕާކިސްތާނުގެ މަސްރަޙު ވަނީ ހަލަބޮލިވެފައެވެ.
"ސުޕްރީމް ކޯޓުން ވަނީ ޚާންއާ ދެކޮޅަށް އުފުލާފައިވާ މައްސަލަތަކުގެ ޝަރުޢީ މަސައްކަތްތައް ހުއްޓުވާފައި. އަދި، މޭ 12 ވަނަ ދުވަހު ހައި ކޯޓަށް ހާޒިރުވުމަށް ޚާނަށް ދަންނަވާފައި،" އުމުރުފުޅުން 70 އަހަރުގެ ޚާންގެ ޤާނޫނީ ވަކީލު ބާބަރް އަވާން ބުންޏެވެ. އަދި، ކޮރަޕްޝަންގެ މައްސަލަތައް ބަލާ ޕާކިސްތާނުގެ ކޮމިޝަން ކަމުގައިވާ ނޭޝަނަލް އެކައުންޓެބިލިޓީ ބިޔުރޯ (އެން.އޭ.ބީ)ގެ ހައްޔަރުން ޚާން މިނިވަން ކޮށްފައިވާ ކަމުގައި ވެސް އަވާން ބުންޏެވެ.
ނަމަވެސް، ޚާން އަދިވެސް ހުންނެވީ އިސްލާމްއާބާދުގައި ހުންނަ ފުލުހުންގެ މައި އިދާރާގައި ހުންނަ ގެސްޓްހައުސްއެއްގައި ފުލުހުންގެ ބެލުމުގެ ދަށުގައެވެ. އެން.އޭ.ބީގެ ހައްޔަރުން ޚާން ސުޕްރީމް ކޯޓުގެ ބެލުމުގެ ދަށަށް ގެންގޮސްފައިވާ ކަމުގައި އަވާން ބުންޏެވެ. އަދި، އޭނާއަށް ބައެއް ރަޙުމަތްތެރިންނާއި ޢާއިލާގެ މެންބަރުންނާ ބައްދަލުކުރުމުގެ ފުރުޞަތު ސުޕްރީމް ކޯޓުން ދީފައިވާ ކަމަށް ވެސް އަވާން ބުނެއެވެ. ނަމަވެސް، އޭނާ މިނިވަންކޮށް ގެއަށް ދިޔުމުގެ ފުރުޞަތު ދީފައެއް ނުވެއެވެ.
ސުޕްރީމް ކޯޓުގައި ބޭއްވި އަޑުއެހުމަށް ޚާން ހާޒިރުކޮށްފައި ވަނީ ވަރުގަދަ ސަލާމަތީ ފިޔަވަޅުތަކާ އެކުގައެވެ. އޭނާއާ އެކު ފުލުހުންގެ އެންމެ އިސް އޮފިޝަލުން ވެސް ވަނީ ކޯޓަށް ހާޒިރުވެފައެވެ. އޭނާ ހައްޔަރުކޮށްފައި ވަނީ ޤާނޫނު ޚިލާފަށް ކަމުގައި ސުޕްރީމް ކޯޓުން ކަނޑައެޅުމުން، އޭނާއަށް ތާޢީދުކުރާ އެތަކެއް ހާސް ބަޔަކު ދަނީ މަގުތަކުގައި އުފާ ފާޅުކުރަމުންނެވެ.
ޚާން ހައްޔަރުކުރުމާ ގުޅިގެން ޕާކިސްތާނުގެ ހާލަތު ހަލަބޮލިވެފައިވާއިރު، އޭނާއަށް ތާޢީދުކުރާ މީހުންނާއި، އޭނާގެ ތަހްރީކް އަލް-އިންސާފް (ޕީ.ޓީ.އައި) ޕާޓީގެ މެންބަރުން ވަނީ އިސްލާމްއާބާދުގެ އިތުރުން ބޮޑެތި އެހެން ރަށްތަކުގެ މަގުތަކަށް ނިކުމެ މުޒާހަރާ ކުރަން ފަށާފައެވެ. ޚާން މިނިވަން ކުރުމަށް ގޮވައިލާ މުޒާހަރާ ކުރަމުންދާ މީހުންނާއި ފުލުހުންނާއި ދެމެދު ވަރުގަދަ ކުރިމަތިލުންތަކެއް ވެސް ވަނީ ހިނގާފައެވެ. އަދި، މުޒާހަރާ ކުރާ މީހުން ދަނީ ސަރުކާރާއި ސަލާމަތީ ބާރުތަކުގެ ޢިމާރާތްތަކާއި މުދަލަށް ގެއްލުންދީ ހުޅުޖަހަމުންނެވެ.
މި ހަމަނުޖެހުންތައް ހުއްޓުވުމަށް ފުލުހުން ކުރަމުންދާ މަސައްކަތްތަކުގެ ތެރެއިން މިހާތަނަށް 2,000 އަށްވުރެ ގިނަ މީހުން ހައްޔަރުކޮށްފައިވާއިރު، ކުރިމަތިލުންތަކުގައި މަރުވެފައިވާ މީހުންގެ ޢަދަދު ވަނީ އަށަކަށް އަރާފައެވެ. ޕާކިސްތާނުގެ ވެރިކަމާ ޚާން ހަވާލުވެވަޑައިގަތީ 2018 ވަނަ އަހަރުއެވެ. ނަމަވެސް، 2022 ވަނަ އަހަރުގެ އޭޕްރިލް މަހު ޚާނާ ދެކޮޅަށް އިތުބާރު ނެތް ކަމުގެ ވޯޓެއް ނެގުމަށް ފަހު އޭނާ ވަނީ ވެރިކަމުން ދުރުކޮށްފައެވެ. އަދި، އޭނާގެ މައްޗަށް ކޮރަޕްޝަންގެ ގިނަ ތުހުމަތުތަކެއްގައި ވަނީ ދަޢުވާ އުފުލާފައެވެ.