ދުނިޔޭގައި މިހާތަނަށް ޤާއިމްކުރާ އެންމެ ބޮޑު ކަނޑު އަޑީގެ ރެސްޓޯރެންޓް، ޅ. އަތޮޅު ހުރަވަޅީގައި ބެހެއްޓުމުގެ މަސައްކަތް ފަށައިފިއެވެ.
މި ރިސޯޓްގައި ޤާއިމްކުރާ މި ރެސްޓޯރެންޓްގައި އެއް ފަހަރާ 24 މީހުންނަށް ޚިދުމަތް ދެވޭނެއެވެ.
އަދި މި ރެސްޓޯރެންޓަށް ދާން ހަދާފައިވާ ސިޑިބަރީގައި ތޭރަ މީޓަރު ހުންނަ އިރު، މި ރެސްޓޯރެންޓްގެ ބަދިގެ ހުންނާނީ ރެސްޓޯރެންޓާއި ވަކިން ހިކިފަސްތަނުގައެވެ.
ފުރަތަމަ އެތަން ހަމައެކަނި ބޭނުން ކުރަން ހަމަޖެހިފައިވަނީ މޫދު އަޑީގެ ރެސްޓޯރެންޓެއްގެ ގޮތުގައި ކަމަށްވިޔަސް، އެ ރެސްޓޯރެންޓްގައި ކައިވެނީގެ ހަފްލާތައް ބޭއްވުމާއި އެތަން ހަނީމޫން ސުއިޓެއްގެ ގޮތުގައި ބޭނުން ކުރެވޭނެ ކަމަށް އެ ރެސްޓޯރެންޓް ތަރައްޤީކޮށްފައިވާ ނިއުޒިލޭންޑްގެ ފުރިޓްސް ރޯއީ އިންޖީނިއަރިންގުން މައުލޫމާތުދެއެވެ.
މި ރިސޯޓް ތަރަައްޤީކުރާ ފަރާތްކަމުގައިވާ ޗަންޕާލަރސް ހޯލްޑިންގ ޕްރައިވެޓް ލިމިޑެޓުން މައުލޫމާތުދޭ ގޮތުގައި މި ރެސްޓޯރެންޓްގެ މައިގަނޑުގައި ގެނެސްފައިމިވަނީ ނިއުޒިލޭންޑުން ކާގޯ ޝިޕެއްގެ އެހީގައެވެ.
ޗަންޕާލަރސް ހޯލްޑިންގ ޕްރައިވެޓް ލިމިޑެޓާއި ބޭރުގެ ކުންފުންޏަކާއި ގުޅިގެން ތަރައްޤީކުރާ މި ރިސޯޓް މިއަހަރުގެ ސެޕްޓެމްބަރު ހާ ތާނގައި ހުޅުވުމަށް މަސައްކަތް ކުރަމުން ދާ އިރު މި ރިސޯޓަކީ 90 ކޮޓަރީގެ ރިސޯޓެއް ކަމަށް ޗަންޕާލަރސް ހޯލްޑިންގްސް އިން މައުލޫމާތުދެއެވެ.