ދެކުނު އޭޝިއާގެ ފުޓްބޯޅައިގެ މައި އިދާރާ ކަމަށްވާ ސާފުގެ ހުސްވެފައިވާ ނައިބު ރައީސްގެ މަގާމަށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ނައިބު ރައީސްގެ މަގާމުގައި ހުންނެވި އަލީ އުމަރު ހޮވިވަޑައިގެންފިއެވެ.
ބަންގްލަދޭޝްގެ ވެރިރަށް ޑާކާގައި ބޭއްވި އިންތިޚާބުގައި ނައިބު ރައީސްގެ މަޤާމު ރާއްޖޭގެ ކުރީގެ އެއްވަނަ ކުޅުންތެރިޔާ އަލީ އުމަރަށް ލިބުނީ އެ މަޤާމަށް އަލީ އުމަރާއި ނޭޕާލު ކެންޑިޑޭޓުގެ އިތުރުން އިތުރު ކެންޑިޑޭޓެއް ކުރިމަތިނުލުމުންނެވެ. ސާފްގެ ނައިބު ރައީސުންގެ ގޮތުގައި ތިބެނީ ދެ ބޭފުޅެކެވެ.
މި ސަރަހައްދުގެ ރައީސްގެ މަޤާމުގައި ހުންނެވީ ބަންގްލަދޭޝްގެ ޣާޒީ ސަލާހުއްދީނެވެ. ޖެހިޖެހިގެން ދެވަނަ ދައުރަކަށް އޭނާ ހޮވިވަޑައިގެންނެވީ 2021 ވަނަ އަހަރު ރާއްޖޭގައި ބޭއްވި ސާފް ޗެމްޕިއަންޝިޕުގެ ހަވާސާއިން ބޭރުން ބޭއްވި ސާފްގެ ކޮންގްރެސްގެ ތެރެއިންނެވެ.
މީގެއިތުރުން އޭއެފްސީގެ އެކްސްކޯއަށް ސާފުން ކަނޑައަޅާ މެންބަރުގެ ގޮތުގައި އިންޑިޔާގެ ޖެނެރަލް ސެކެޓްރީ ޝާޖީ ޕްރަބާކަރަން ވަނީ ކަނޑައަޅާފައެވެ. ކުރިން މި މަޤާމުގައި ހުރީ ސްރީލަންކާގެ ފުޓްބޯޅަ ފެޑަރޭޝަންގެ ކުރީގެ ރައީސް ޖަސްވާރު އުމަރެވެ. ނަމަވެސް ފީފާއިން ލަންކާ ސަސްޕެންޑުކުރުމާ އެކު އޭނާއަށް އެ މަޤާމުގެ ޒިންމާ އަދާނުކުރެވޭނެ އެވެ.