އިންޑޮނީޝިޔާއަށް އައި ބިންހެލުމާއިގުޅިގެން ރާއްޖެއަށް ސުނާމީ އަރާފާނެކަމުގެ ބިރެއް އަދި ނެތްކަމަށް ޑިފެންސް މިނިސްޓަރ ވިދާޅުވެއްޖެއެވެ.
ޕީއެސްއެމްއަށް މަޢުލޫމާތު ދެއްވަމުން މިނިސްޓަރ އާދަމް ޝަރީފް އުމަރު ވިދާޅުވީ، ސުނާމީގެ ހާލަތެއް އަތުވެއްޖެނަމަ މިހާރު ނެރުއްވާފައިވާ ޔެލޯ އެލާޓް ރެޑް އެލާޓަކަށް ބަދަލުވާނެކަމަށާއި އަދި މިފަދަ ޙާލަތަކަށް، ޑިޒާސްޓަރ މެނޭޖްމަންޓް ސެންޓަރ ތައްޔާރަށް އޮތްކަމަށެވެ.
އިންޑޮނީޝިޔާގެ ސުމަޓްރާގެ ހުޅަނގު ދެކުނަށް 7.9ގެ ބާރުމިނުގައި ބިންހެލުމެއް އައިސްފައިވަނީ މިއަދު އިރުއޮއްސި ހައެއްޖަހާ އެހާކަންހާއިރުއެވެ.
މިބިންހެލުމާގުޅިގެން ސުނާމީއެއް އުފެދިދާނެ ކަމަށް އިންޑިއާގެ ސުނާމީ އިންޒާރުދޭ މަރުކަޒުން ބުނެފައިވެއެވެ. މި ބިންހެލުމުގެ އަސަރު ރާއްޖެއަށް ކުރާނެ ކަމަށް ލަފާކުރެވިފައި ނުވި ނަމަވެސް އެކަމަށް ސަމާލުވުމަށް ރާއްޖޭގެ މޫސުމާއިބެހޭ ޤައުމީ އިދާރާއިންވަނީ ޔެލޯ އެލާޓެއްވެސް ނެރެފައެވެ. ޔެލޯ އެލާރޓް ނެރެފައިވަނީ އިންޑިޔާ ކަނޑުގެ ޤައުމުތަކަށްވެސް ސުނާމީ އައިސްދާނެކަމަށް ބެލެވިފައިވުމާއިއެކު ރާއްޖެއަކީވެސް އިންޑިޔާ ކަނޑުގެ ޤައުމަކަށް ވާތީކަމަށް މެޓް އޮފީހުން މަޢުލޫމާތުދެއެވެ. އަދި މި ބިންހެލުން އައި ބާރުމިނަކީ ސުނާމީއެއް އުފެދިދާނެ ފަދަ ބާރު މިނެއް ކަމަށް މެޓް އޮފީހުން ވިދާޅުވިއެވެ. އެހެން ކަމުން މިކަމަށް ސަމާލުވެ، ދިމާވެދާނެ ކަމަކަށް ރައްޔިތުން ތައްޔާރުވެތިބުމަށްވެސް މެޓް އޮފީހުން ވަނީ އިލްތިމާސް ކުރައްވާފައެވެ.