ރައްޔިތުންގެ މަޖިލީހުގެ މަތިވެރި ދާއިރާގެ މެންބަރު ޙަސަން ޒަރީރަށް ދިން ޙަމަލާގެ ތަޙްޤީޤު ކުރިއަށްދާ ކަމަށާއި، މިހާތަނަށް އަދި އެއްވެސް މީހަކު ޙައްޔަރުކޮށްފައި ނުވާކަމަށް ފުލުހުން ވިދާޅުވެއްޖެއެވެ.
މެންބަރު ޒަރީރަށް ބަޔަކު ޙަމަލާދީފައިވަނީ ނުރައްކާތެރި ހަތިޔާރެއްގެ ގޮތުގައި ބޭނުންކުރާ އެއްޗެއް ބޭނުންކޮށްގެންކަމަށް ފުލުހުން ވަނީ ވިދާޅުވެފައެވެ. ނަމަވެސް ޙަމަލާދިނީ ކޮން އެއްޗަކުން ކަމެއް ފުލުހުން ވިދާޅެއް ނުވެއެވެ. މެންބަރު ޒަރީރަށް ޙަމަލާދީފައިވަނީ ހަބީބީ ކެފޭ އެންޑް ބިސްޓްރޯ ތެރޭގައި އިންނަވަނިކޮށް އާދީއްތަ ދުވަހުގެރޭ ފަތިހު 05:08 ހާއިރުއެވެ.
މިޙާދިސާއާ ގުޅިގެން ފުލުހުން ވިދާޅުވީ ތަޙްޤީޤު މިހާރުވެސް ކުރިއަށްދާ ކަމަށެވެ. އަދި މިހާތަނަށް އެއްވެސް މީހަކު މި މައްސަލާގައި ހައްޔަރުކުރައްވައިފައި ނުވާކަމަށް ފުލުހުން ވިދާޅުވިއެވެ.
މި ޙަމަލާގައި މެންބަރު ޒަރީރަށް ލިބިވަޑައިގެންނެވި އަނިޔާއަށް އޭޑީކޭ ހޮސްޕިޓަލްގައި ވަނީ ފަރުވާވެސް ހޯއްދަވާފައެވެ.
މެންބަރު ޒަރީރަށް ދިން ޙަމަލާ އެމްޑީޕީން ވަނީ ހަރުކަށި އިބާރާތުން ކުށްވެރިކޮށްފައެވެ. އަދި މި ހަމަލާ ސީރިއަސް މައްސަލައެއްގެ ގޮތުގައި ދިވެހި ފުލުހުން ތަޙްޤީޤުކުރައްވައި، މި ނުރައްކާތެރި ކުށްކުރި މީހުން އިންސާފުގެ ކުރިމައްޗަށް ގެނައުމަށް ވަނީ ގޮވާލާފައެވެ.