އަންނަ ސެޕްޓެމްބަރު މަހު ބާއްވާ ރިޔާސީ އިންތިޚާބުގައި ވޯޓު ދިނުމުގެ ހައްޤުލިބިފައިވާ މީހުންގެ ލިސްޓު އަންނަ މަހުގެ ފުރަތަމަ ހަފްތާގައި ޢާންމު ކުރާނެކަމަށް އިލެކްޝަންސް ކޮމިޝަނުން ވިދާޅުވެއްޖެއެވެ.
ރިޔާސީ އިންތިޚާބަށް ވަމުން އަންނަ ތައްޔާރީތަކާއި ގުޅޭގޮތުން ޕީއެސްއެމް ނިއުސްއަށް މަޢުލޫމާތު ދެއްވަމުން އިލެކްޝަންސް ކޮމިޝަންގެ ސެކެޓްރީ ޖެނެރަލް ޙަސަން ޒަކަރިއްޔާ ވިދާޅުވީ، އިލެކްޝަންސް އިލެކްޝަނުން ކަނޑައަޅާފައިވާ ޓައިމްލައިނާއި، އެއްގޮތަށް ހުރިހާ މަސައްކަތްތަކެއް ކުރެވެމުންދާކަމަށެވެ. މިވަގުތު ކޮމިޝަނުން އެންމެ އިސްކަމެއް ދެއްވައިގެން ކުރަމުންދާ މަސައްކަތަކީ އިންތިޚާބުގައި ވޯޓުލާ މީހުންގެ ލިސްޓު ޢާންމު ކުރުންކަމަށް ޙަސަން ވިދާޅުވިއެވެ. އަދި ވޯޓާސް ލިސްޓު މިފެށޭ މޭމަހުގެ ފުރަތަމަ ހަފްތާގައި ޢާންމު ކުރެވޭނެކަމަށްވެސް ޙަސަން ވިދާޅުވިއެވެ. ލިސްޓު ޢާންމު ކުރުމަށްފަހު ޝަކުވާއަށް 30 ދުވަހުގެ މުއްދަތެއް އިލެކްޝަނުން ދިނުމަށް ވަނީ ނިންމަވާފައެވެ.
މީގެ އިތުރުން ރިޔާސީ އިންތިޚާބުގެ މައި މަރުކަޒުގެ ގޮތުގައި ކަނޑައަޅާފައިވާ ދަރުބާރުގެ، މިހާރު ކޮމިޝަނަށް ލިބި، މަސައްކަތްތައް ފެށުމަށްޓަކައި ދަރުބާރުގެ ތައްޔާރު ކުރުމުގެ މަސައްކަތް ކުރަމުންދާކަމަށް ޙަސަން ވިދާޅުވިއެވެ. އަދި އިންތިޚާބަށް ކޮމިޝަނަށް ބޭނުންވާ މުވައްޒިފުން ހޯދުމުގެ މަސައްކަތްވެސް ކުރަމުންދާކަމަށް ހަސަން ވިދާޅުވިއެވެ.
ގާނޫނުއަސާސީގެ 110 ވަނަ މާއްދާ ބުނާ ގޮތުން، ހިނގަމުންދާ ރިޔާސީ ދައުރު ހަމަވުމުގެ 120 ދުވަހާއި 30 ދުވަހާ ދެމެދު ރިޔާސީ އިންތިޚާބު ބާއްވަން ޖެހޭނެއެވެ. ރިޔާސީ އިންތިޚާބުގެ ޤާނޫނު ބަޔާންކުރާ ގޮތުގައި، ހިނގަމުންދާ ރިއާސީ ދައުރުގެ މުއްދަތު ހަމަވާން 120 ދުވަހަށް ވުމާ އެކު ގިނަވެގެން 10 ދުވަހުގެ ތެރޭގައި ރިޔާސީ އިންތިޚާބަށް ކުރިމަތިލުމުގެ ފުރުޞަތު ހުޅުވާލައި އެކަން އިޢުލާން ކުރަންޖެހޭނެއެވެ.
ރިޔާސީ އިންތިޚާބުގައި ކެނޑިޑޭޓުންގެ ގޮތުގައި ވާދަކުރުމަށް ހުޅުވާލާނީ 23 ޖުލައި އިން 3 އޯގަސްޓުގެ ނިޔަލަށެވެ. އަދި ކެނޑިޑޭޓުންގެ ނަންތައް ތަރުތީބުކޮށް 9 އޯގަސްޓްގައި އިއުލާންކުރާނެއެވެ. ކެންޑިޑޭޓުން ކެމްޕެއިން ކުރުމަށް 10 އޯގަސްޓުން ފެށިގެން 8 ސެޕްޓެމްބަރާއި ހަމައަށް ފުރުޞަތު ދިނުމަށްވެސް ކޮމިޝަނުން ވަނީ ނިންމަވާފައެވެ.
ރިޔާސީ އިންތިޚާބުގައި ވެރިކަން ކުރާ މައި ޕާޓީން ވާދަކުރައްވަނީ ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހެވެ. އިދިކޮޅު ޕީޕީއެމްއިން ވާދަކުރަން ނިންމާފައިވަނީ ކުރީގެ ރައީސް ޢަބްދުﷲ ޔާމީނެވެ. ނަމަވެސް އެމަނިކުފާނު ގެންދަނީ 11 އަހަރުގެ ޖަލު ހުކުމެއް ތަންފީޒު ކުރައްވަމުންނެވެ. އެހެންކަމުން އެމަނިކުފާނަށް އިންތިޚާބުގައި ވާދަކުރެވިދާނެކަމާމެދު ވަނީ ސުވާލެއްގެ ތެރޭގައެވެ. ޙުކުމް އިސްތިއުނާފުކޮށްފައިވާއިރު، މަތީކޯޓުން މިމައްސަލާގައި ނިންމާ ގޮތަކުން ރައީސް ޔާމީނަށް ވާދަކުރުމުގެ ފުރުޞަތުވެސް ލިބިދާނެއެވެ. އިންތިޚާބުގައި ދެން ވާދަކުރައްވާނެކަމަށް އިޢުލާން ކުރައްވާފައިވަނީ އެމްއެންޕީގެ ފަރާތުން އެޕާޓީގެ ރައީސް މުހައްމަދު ނާޒިމާއި، ޖުމްހޫރީ ޕާޓީގެ ލީޑަރު ޤާސިމް އިބްރާހިމްއާއި، މިނިވަން ކެނޑިޑޭޓުންގެ ގޮތުގައި ޑރ.މުޙައްމަދު މުނަވަރުގެ އިތުރުން ޢުމަރު ނަޞީރެވެ.