ވ. ކެޔޮދޫގައި މިސްކިތަށް ގެއްލުން ދިން މައްސަލާގައި ހައްޔަރުކުރި މީހާ ޝަރީޢަތް ނިމެންދެން ބަންދުކުރުމަށް ކޯޓުން ޢަމުރުކޮށްފިއެވެ. މިސްކިތަށް ގެއްލުންދިން މައްސަލާގައި ހައްޔަރުކޮށްފައިވަނީ ޢުމުރުން 27 އަހަރުގެ ދިވެހި ފިރިހެނެކެވެ. އޭނާގެ ބަންދުކޮށްދިނުން އެދިވަޑައިގެން ކެޔޮދޫ މެޖިސްޓްރޭޓް ކޯޓަށް ޙާޟިރުކުރުމުން ވަނީ ޝަރީޢަތް ނިމެންދެން ބަންދުކުރުމަށް ޢަމުރުކުރައްވާފައެވެ.
އޭނާ ބަންދުކުރުމަށް ކޯޓުން ނެރުނު ޢަމުރުގައިވާ ގޮތުން، އޭނާ ވަނީ އދ.މަހިބަދޫ ފުލުހުންގެ މަރުކަޒަށް ގެންގޮސް އެތަނުގައި ބަންދުކޮށްފައެވެ. އޭނާ މަހިބަދުއަށް ފޮނުވާލާފައިވަނީ ދިގު މުއްދަތަކަށް ބަންދުގައި ބަހައްޓާނެ އެކަށީގެންވާ ތަނެއް ވ.އަތޮޅުގައި ނެތުމުންނެވެ.
ފުލުހުން އޭނާ ހައްޔަރުކޮށްފައިވަނީ، ކެޔޮދޫ މިސްކިތުގެ މައި ދޮރުގެ ބިއްލޫރި ގަނޑު ތަޅައިލި މައްސަލާގައެވެ.
މިސްކިތަށް ގެއްލުންދިން މައްސަލާގައި މީހަކު ހައްޔަރުކޮށްފައި މިވަނީ، އެރަށު މިސްކިތުގައި ހުރި މުސްޙަފްތަކެއް ވިދާ މައްސަލައެއް ވެސް ފެންމަތިވެފައިވަނިކޮށެވެ. ނަމަވެސް ހައްޔަރުކުރި މީހާގެ މައްޗަށް އެ ތުހުމަތު ނުކުރެވޭކަމަށް ކައުންސިލުން ކުރިން ވިދާޅުވެފައިވެއެވެ. މުސްޙަފްތައް ވީދި މައްސަލަވެސް ކައުންސިލުން ވަނީ ފުލުހުންނަށް ހުށައަޅުއްވާފައެވެ.