ރަޝިޔާގެ ޚާރިޖީ ވަޒީރު ސަރްގޭ ލެވްރޮފް އަރިހުގައި ބަހައްޓަވައިގެން، އޭނާގެ ޤައުމުގެ ސިފައިން ޔޫކްރެއިނަށް އަރައި ކުރަމުންދާ ހަނގުރާމަ ކުށްވެރިކުރައްވައި އ.ދގެ ސެކްރެޓަރީ ޖެނެރަލް އެންޓޯނިޔޯ ގުތެރޭޝް ވާހަކަފުޅު ދައްކަވައިފިއެވެ. ރަޝިޔާއިން ޔޫކްރެއިނަށް އަރައި ކުރަމުންދާ ހަނގުރާމައިގައި ޔޫކްރެއިނަށް ދެމުންދާ ގެއްލުންތައް ކުށްވެރިކުރައްވައި ގުތެރޭޝް ވާހަކަފުޅު ދައްކަވާފައި ވަނީ، ލެވްރޮފް ރިޔާސަތު ބެލެހެއްޓެވި އ.ދގެ ސަލާމަތީ މަޖިލީހުގެ ބައްދަލުވުމެއްގައެވެ.
ގުތެރޭޝް ވިދާޅުވީ ރަޝިޔާއިން ޔޫކްރެއިނަށް ސިފައިން ފޮނުވައިގެން ކުރަމުންދާ ހަނގުރާމައަކީ ބައިނަލްއަޤުވާމީ ޤާނޫނުތަކާ ޚިލާފު ހަނގުރާމައެއް ކަމުގައެވެ. އަދި، މި ހަނގުރާމައިގެ ސަބަބުން ޔޫކްރެއިނުގެ ޢާންމު ރައްޔިތުންނަށް ވަރަށް ނިކަމެތި ހާލެއް ޖެހިފައިވާ ކަމުގައި ވިދާޅުވެ، ގުތެރޭޝް ވަނީ ކޮވިޑް-19އާ ގުޅިގެން ދުނިޔެއަށް ކުރިމަތިވި އިޤުތިޞާދީ ހީނަރުކަން ރަޝިޔާގެ ހަނގުރާމައާ ގުޅިގެން އިތުރަށް ހީނަރުވެފައިވާ ކަމުގައި ވިދާޅުވެފައެވެ.
ގުތެރޭޝް މި މޭރުމުން ވާހަކަފުޅު ދައްކަވާފައިވާ ބައްދަލުވުމަކީ، އ.ދގެ ޗާޓަރާ އެއްގޮތަށް ޤައުމުތައް ގުޅިގެން މަސައްކަތް ކުރުން އިތުރަށް ހަރުދަނާ ކުރުމާ ގުޅޭ ގޮތުން މަޝްވަރާކުރުމަށް ބޭއްވި ބައްދަލުވުމެކެވެ. އެ ކަމަށް އަލިއަޅުއްވައިލައްވައި ގުތެރޭޝް ވިދާޅުވީ، ދުނިޔޭގެ އަދުގެ ހާލަތާ އެކު ޤައުމުތައް އެކުވެ ގުޅިގެން މަސައްކަތް ކުރުމަށް ބޮޑެތި ގޮންޖެހުންތަކެއް ކުރިމަތިވަމުންދާ ކަމުގައެވެ.
އަދި، ދުނިޔޭގެ ބޮޑެތި ބާރުތަކުގެ މެދުގައި އުފެދިފައިވާ ނުތަނަވަސް ކަން، ތާރީޚުގައި ވެސް ނުދެކޭ މިންވަރަކަށް އިތުރުވެފައިވާ ކަމުގައި އޭނާ ވިދާޅުވިއެވެ. އެ ނުތަނަވަސް ކަން ހަމަނުޖެހުމަކަށް ބަދަލުވުމުގެ ނުރައްކާ އޮތް ކަން ވެސް އޭނާ ފާހަގަކުރެއްވިއެވެ.
މި ބައްދަލުވުން ބާއްވާފައި ވަނީ އ.ދގެ ސަލާމަތީ މަޖިލީހުގެ ރިޔާސަތު އޭޕްރިލް މަހު ބަލަހައްޓާ ރަޝިޔާއިން އިސްނަގައިގެންނެވެ. ރަޝިޔާއިން އެ މަޖިލީހުގެ މެންބަރު ޤައުމުތަކަށް ފޮނުވި ނޯޓުގައި ބުނެފައި ވަނީ، ފިނި ހަނގުރާމައަށް ފަހު އެއް ޤައަމަކުން ބާރާއި ނުފޫޒު ގަދަކޮށްފައިވާ ކަމަށާއި، އެ ކަން ހުއްޓުވަން ހުރިހާ ޤައުމުތައް ގުޅިގެން މަސައްކަތް ކުރަން ޖެހޭ ކަމުގައެވެ. އިޝާރާތްކޮށްފައި އެ ވަނީ ދުނިޔޭގެ ހުރިހާ މަސްރަޙަކަށް ބާރާއި ނުފޫޒު ފޯރުވަން އެމެރިކާއިން ކުރަމުންދާ މަސައްކަތްތަކަށެވެ. އެއީ، އ.ދގެ ނިޒާމަށް އޮތް ބޮޑު ނުރައްކަލެއްގެ ގޮތުގައި ވެސް ރަޝިޔާގެ ނޯޓުގައި ސިފަކުރިއެވެ.
ރަޝިޔާއިން ފޮނުވި ނޯޓަށް ވިލާތުގެ އިއްތިހާދު (އީ.ޔޫ)އިން އ.ދއަށް ކަނޑައަޅާފައި ހުންނަވާ ސަފީރު އޯލޮފް ސްކޫގް ވަނީ ވަރަށް ބޮޑަށް ފާޑުވިދާޅުވެފައެވެ. މިއީ ވަރަށް ހީލަތްތެރި ނިޔަތެއްގައި ކޮށްފައިވާ އަމަލެއްގެ ގޮތުގައި އޭނާ ސިފަކުރެއްވިއެވެ. އަދި، އ.ދގެ ޗާޓަރާއި ބައިނަލްއަޤުވާމީ ގުޅުންތައް ހިމާޔަތްކުރާކަމަށް ދެއްކެން ރަޝިޔާއިން މަސައްކަތް ކުރަމުންދާ ކަމުގައި ވެސް އޭނާ ތުހުމަތު ކުރެއްވިއެވެ.