އިޓަލީވިލާތުގެ އައްސޭރިފަށަށް ތިން ބޯޓެއް ފެތި، ގިނަ ޢަދަދެއްގެ ބަޔަކު ކަނޑަށް ގެއްލިއްޖެއެވެ.. އެ މީހުން ސަލާމަތް ކުރުމަށް އެ ޤައުމުގެ ކޯސްޓްގާޑުން މަސައްކަތް ކުރަމުންދާއިރު، ކަނޑުވެގެން 20 ވަރަކަށް މީހުން މަރުވެފައިވާ ކަމަށް ބެލެވޭ ކަމުގައި އޮފިޝަލުން ވިދާޅުވެއެވެ. އެ މީހުންގެ ހަށިތައް ހޯދުމަށް ވެސް އެ ޤައުމުގެ ކޯސްޓްގާޑުން ދަނީ މަސައްކަތް ކުރަމުންނެވެ.
ތިން ބޯޓު ވެސް ފެތިފައި ވަނީ ފާއިތުވި 24 ވަރަކަށް ގަޑިއިރުގެ ތެރޭގައެވެ. އެއީ، ޤަވާޢިދާ ޚިލާފަށް އިޓަލީވިލާތަށް ހިޖުރަކުރަން މަސައްކަތްކުރި ރެފިޔުޖީން ގޮވައިގެން ދަތުރުކުރި ތިން ބޯޓެވެ. އޭގެ ތެރެއިން މޯލްޓާގެ އައްސޭރިފަށަށް ފެތުނު ބޯޓުން 20 މީހަކު ގެއްލިފައިވާ ކަމަށާއި، ލެންޕެދޫސާގެ އައްސޭރިފަށަށް ފެތުނު ބޯޓުން އިތުރު ތިން މީހަކު ގެއްލިފައިވާ ކަމަށް ރިޕޯޓުކޮށްފައިވާ ކަމުގައި އިޓަލީވިލާތުގެ ކޯސްޓްގާޑުން ބުނެއެވެ.
ހަ ކުޑަކުދިން ވެސް ތިބި އެ ބޯޓުގައި ދަތުރުކޮށްފައި ވަނީ ބުރްކިނާ ފާސޯއާއި، ކެމަރޫނާއި، ގިނީއާއި، އައިވަރީ ކޯސްޓުގެ އިތުރުން ސޫދާނުގެ ރެފިޔުޖީންނެވެ. ތިންވަނަ ބޯޓު ވެސް ފެތިފައި ވަނީ މޯލްޓާގެ އައްސޭރިފަށުގެ ސަރަޙައްދަކަށެވެ.
މެޑިޓެރޭނިޔަން ކަނޑުގެ ސަރަޙައްދުގެ މޫސުން ރަނގަޅުވުމާ ގުޅިގެން، ހިޖުރަކުރާ މީހުންނާ އެކު އެފްރިކާ ބައްރުން ފުރައިގެން އިޓަލީވިލާތަށް ދަތުރު ފަށާ ބޯޓުފަހަރުގެ ޢަދަދު އިތުރުވެފައިވާ ކަމުގައި އިޓަލީވިލާތުން ބުނެއެވެ. ފެތުނު ތިން ބޯޓާ އެކު ޖުމުލަ 35 ބޯޓެއްގައި ތިބި 1,200 އަށްވުރެ ގިނަ ރެފިޔުޖީން ވަނީ ސަލާމަތްކޮށް، ލެމްޕެދޫސާއަށް ގެންގޮސްފައެވެ. އިތުރު 20 ވަރަކަށް ބޯޓު އިޓަލީވިލާތުގެ އައްސޭރިފަށުން ފެނިފައިވާ ކަމުގައި ވެސް އެ ޤައުމުގެ ކޯސްޓްގާޑުން ބުނެއެވެ.
މީގެ ތެރެއިން ގިނަ ބޯޓުތައް ފުރާފައި ވަނީ ތޫނިސުން ކަމަށް ބެލެވެއެވެ. ތޫނިސާއި އިޓަލީވިލާތުގެ ލެމްޕެދޫސާއާ ދެމެދު އޮންނަނީ އެންމެ 150 ކިލޯމީޓަރުގެ ކަނޑުގެ ސަރަޙައްދެކެވެ. ތޫނިސަށް ހިޖުރަކޮށްފައިވާ އެފްރިކާ ބައްރުގެ ޤައުމުތަކަށް ނިސްބަތްވާ ގިނަ ޢަދަދެއްގެ ރެފިޔުޖީން ދަނީ ވިލާތުގެ ޤައުމުތަކަށް ހިޖުރަކުރަން މަސައްކަތް ކުރަމުންނެވެ.
ޤަވާޢިދާ ޚިލާފަށް ވިލާތުގެ ޤައުމުތަކަށް ރެފިޔުޖީން ގެންގޮސްދޭ ގުރޫޕުތަކުން ފީއެއްގެ ގޮތުގައި ބޮލަކަށް ގާތްގަނޑަށް 650 އެމެރިކާ ޑޮލަރު ނަގައެވެ. މި އަހަރުގެ މިހާތަނަށް އިޓަލީވިލާތަށް ހިޖުރަކޮށްފައިވާ ރެފިޔުޖީންގެ ޢަދަދު 36,000 އަށް އަރައެވެ. ހުސްވި 2022 ވަނަ އަހަރުގެ އެ މުއްދަތުގެ ތެރޭގައި އެ ޢަދަދު ރެކޯޑު ކުރެވިފައި ވަނީ 9,000 ގައެވެ. މެޑިޓެރޭނިޔަން ކަނޑު ހުރަސްކޮށް ކުރާ ނުރައްކާތެރި ދަތުރުގައި މި އަހަރުގެ މިހާތަނަށް 537 ރެފިޔުޖީންގެ ފުރާނަ ގެއްލިފައިވާ ކަމުގައި ހިޖުރަކުރުމާ ބެހޭ ބައިނަލްއަޤުވާމީ ޖަމުޢިއްޔާ (އައި.އޯ.އެމް)އިން ބުނެއެވެ.