ސޫދާންގެ އަސްކަރިއްޔާ އާއި ހަތިޔާރުއެޅި ރެޕިޑް ސަޕޯޓް ފޯސަސް (އާރް.އެސް.އެފް)އާ ދެމެދު ފިޠުރު ޢީދު ދުވަހު ވެސް ވެރިރަށް ޚަރްތޫމްގައި ވަރުގަދަ ޙަމަލާތަކެއް ބަދަލުކުރަމުން އެބަދެއެވެ. ދެ ފަރާތުގެ ދެމެދުގައި ފަށާފައިވާ ދާޚިލީ ހަނގުރާމަ ހަފުތާއެއްހާ ދުވަހަށް ދެމިގެން ގޮސްފައިވާއިރު، އަސްކަރިއްޔާގެ ސިފައިން ވަނީ ފުރަތަމަ ފަހަރަށް ވެރިރަށް ޚަރްތޫމަށް ފައިމަގުގައި އަރާފައެވެ. އަދި، އާރް.އެސް.އެފްގެ ފައުޖުތަކާ ދެކޮޅަށް ވަރުގަދަ ހަމަލާތަކެއް ދޭން ފަށާފައެވެ.
ސޫދާނުގައި ފަށާފައިވާ ދާޚިލީ ހަނގުރާމައިގައި މިހާތަނަށް 413 މީހުން މަރުވެފައިވާ ކަމުގައި ދުނިޔޭގެ ޞިއްޙަތު ޖަމުޢިއްޔާ (ޑަބްލިޔު.އެޗް.އޯ)އިން ބުނެއެވެ. އަދި، ޒަޚަމުވެފައިވާ މީހުންގެ ޢަދަދު 3,000 އަށްވުރެ މައްޗަށް އަރާފައިވާ ކަމުގައި ވެސް އެ ޖަމުޢިއްޔާގެ ތަފާސްހިސާބުތަކުން ދައްކައެވެ.
ޢީދު ނަމާދު ކުރިއަށްދިޔަ ވަގުތުގައި ވެސް އަސްކަރިއްޔާއާއި އާރް.އެސް.އެފްގެ ފައުޖުތަކާ ދެމެދު ހަމަލާތައް ބަދަލުކޮށްފައިވާ ކަމުގައި މަންޒަރު ފެނުނު މީހުން ބުނެއެވެ. ޚަރްތޫމްގައި ކުރަމުންދާ ހަނގުރާމަ ވަގުތީ ގޮތުން މެދުކަނޑައިލާ، އެ ރަށުގައި ދިރިއުޅޭ ޢާންމުންނަށް ރައްކާތެރި ހިސާބުތަކަށް ބަދަލުވުމުގެ ފުރުޞަތު ހޯދައިދިނުމަށް އ.ދ.ގެ ސެކްރެޓަރީ ޖެނެރަލް އެންޓޯނިޔޯ ގުތެރޭޝް ވަނީ މަސައްކަތް ފައްޓަވާފައެވެ.
ނަމަވެސް، އެ ކަން އަދި ވަނީ ކާމިޔާބުވާ ގޮތް ނުވެފައެވެ. އަދި، ސޫދާނުގައި ތިބި ބޭރު ޤައުމުތަކުގެ ރައްޔިތުންނާއި ޚާރިޖީ ދާއިރާގައި މަސައްކަތް ކުރާ މީހުން އެ ޤައުމުން ބޭލުމަށް ވެސް ވަނީ ހުރަސްއެޅިފައެވެ. އެ ޤައުމުގައި ތިބި އެމެރިކާ ރައްޔިތުން އެ ޤައުމުން ބޭލުމަށް އެ ޤައުމުން ވެސް ދަނީ މަސައްކަތް ކުރަމުންނެވެ.
ހަނގުރާމައިގެ ތެރޭގައި ހޮސްޕިޓަލްތަކަށް ވެސް ހަމަލާދެމުންދާ ކަމުގައި މަންޒަރު ފެނުނު މީހުން ބުނެއެވެ. އަދި، މި ކަމާ ގުޅިގެން ގިނަ ހޮސްޕިޓަލްތައް ބަންދުކޮށްފައިވާ ކަމަށާއި، ހަނގުރާމައިގެ ސަބަބުން ޒަޚަމުވެފައިވާ ގިނަ ޢަދަދެއްގެ ޢާންމު ރައްޔިތުންނަށް ފަރުވާ ދިނުމަށް ހުރަސް އެޅިފައިވާ ކަމުގައި ވެސް އެ ފަރާތްތަކުން ބުނެއެވެ. މަރުވެފައިވާ މީހުންނާއި ޒަޚަމުވެފައިވާ މީހުންގެ ތެރޭގައި ގިނަ ޢަދަދެއްގެ ކުޑަކުދިން ވެސް ހިމެނެއެވެ.
ސޫދާނުގައި ދާޚިލީ ހަނގުރާމަ ފެށުނީ އާރް.އެސް.އެފްގެ ފައުޖުތަކުން ޚަރްތޫމަށް އަރައި ރިޔާސީ ގަނޑުވަރާއި އަސްކަރިއްޔާގެ އިސްވެރިޔާގެ ގެކޮޅު ހިސާރުކުރަން މަސައްކަތް ފެށުމުންނެވެ. ހަނގުރާމަ ފެށި ފަހުން ފުރަތަމަ ފަހަރަށް ވާހަކަފުޅު ދައްކަވަމުން އަސްކަރިއްޔާގެ އިސްވެރިޔާ ޖެނެރަލް ޢަބްދުލް ފައްތާޙް އަލް-ބުރްހާން ވިދާޅުވީ އާރް.އެސް.އެފްގެ ފައުޖުތަކާ ހަނގުރާމަކޮށް، އެ ޖަމާޢަތް ބަލިކުރުން ނޫން އިތުރު ގޮތެއް އަސްކަރިއްޔާއަށް ނެތް ކަމުގައެވެ. ނަމަވެސް، ސޫދާންގައި މަދަނީ ސަރުކާރެއް އެކުލަވައިލުމަކީ އަދިވެސް އަސްކަރިއްޔާގެ ބޭނުން ކަމުގައި އޭނާ ވިދާޅުވިއެވެ.
ސޫދާނުގައި މި ވަގުތު ވެރިކަން ކުރަނީ އަސްކަރިއްޔާއާއި އާރް.އެސް.އެފްގެ އިތުރުން ސިޔާސީ ޕާޓީތަކުން ގުޅިގެން އެކުލަވައިލާފައިވާ އިންތިގާލީ ކައުންސިލަކުންނެވެ. އެ ކައުންސިލުގައި އެންމެ އިސް ދައުރެއް އަދާކުރައްވަނީ ޖެނެރަލް އަލް-ބުރްހާނެވެ. އަދި، އޭނާގެ ދަށުން ހުންނަވަނީ އާރް.އެސް.އެފްގެ އިސްވެރިޔާ ޖެނެރަލް މުޙައްމަދު ހަމްދާން ދަގަލޯއެވެ. މި ހަނގުރާމަ މެދުނުކެނޑި ކުރިއަށްދާ ނަމަ، ސޫދާންގެ އަވައްޓެރިންގެ އިތުރުން އެމެރިކާއާއި ރަޝިޔާއިން މި ހަނގުރާމައިގެ ތެރެއަށް ވަނުމަކީ އެކަށީގެންވާ ކަމެއް ކަމުގައި މަސްރަޙު ދިރާސާކުރާ ފަރާތްތަކުން ގަބޫލުކުރެއެވެ.
ސޫދާނުގައި ހިނގަމުންދާ ދާޚިލީ ހަމަނުޖެހުމުގެ ސަބަބުން އެ ޤައުމަށް ވަނީ އިންސާނީ މުސީބާތެއް ކުރިމަތިވެފައެވެ. އެ ޤައުމުގެ އާބާދީގެ ބޮޑު ބައެއް ދިރިއުޅެމުން ދަނީ ބަނޑުހައިހޫނު ކަން މަތީގައެވެ. އ.ދގެ ކާބޯތަކެއްޗާ ބެހޭ ޕުރޮގުރާމުން ސޫދާނުގައި ހިންގަމުންދާ އޮޕަރޭޝަންގައި ހަރަކާތްތެރިވާ ތިން މުވައްޒަފުން މަރުވުމާ ގުޅިގެން، އެ ޕުރޮގުރާމް ވެސް ވަނީ ހުއްޓިފައެވެ. އަދި، ހުސްވި ހަފުތާގައި ފެށި ދާޚިލީ ހަނގުރާމައާ ގުޅިގެން 20,000 އަށްވުރެ ގިނަ ރައްޔިތުން މިހާރު ވެސް އަވައްޓެރި ޗާޑަށް ހިޖުރަކޮށްފައިވާ ކަމުގައި ޑަބްލިޔު.އެޗް.އޯއިން ބުނެއެވެ.
ސޫދާނުގައި އިންތިގާލީ ކައުންސިލެއް އުފައްދާފައި ވަނީ ކުރީގެ ރައީސް އުމަރު އަލް-ބަޝީރުގެ ސަރުކާރު ވައްޓައިލުމަށް ފަހުއެވެ. އެއީ، މީގެ ހަތަރު އަހަރު ކުރިންނެވެ. އޭގެ ފަހުން ސޫދާނުގައި އަސްކަރީ ބަޣާވާތެއް ވެސް ކޮށްފައިވެއެވެ. މަދަނީ ސަރުކާރެއް އެކުލަވައިލުމަށް ކުރަމުންދާ މަސައްކަތަށް އާރް.އެސް.އެފުން ހުރަސްއަޅަމުންދާ ކަމުގައި އަސްކަރިއްޔާއިން ތުހުމަތު ކުރެއެވެ.