އެމެރިކާގެ އިރުދެކުނުގައިވާ ސްޓޭޓެއް ކަމުގައިވާ ފްލޮރިޑާއަށް ބޯކޮށް ވާރޭވެހި، ބައެއް ރަށްތަކުގައި ފެންބޮޑުވުމާ ގުޅިގެން ގިނަ ޢަދަދެއްގެ ބަޔަކު ހާލުގައި ޖެހި، ބޮޑެތި ގެއްލުންތަކެއް ލިބިއްޖެއެވެ. ވިއްސާރައިގެ އަސަރު އެންމެ ބޮޑަށް ކޮށްފައި ވަނީ ފްލޮރިޑާގެ ބަނދަރުމަތީ ރަށް މަޔާމީއާއި ފޯޓް ލޯޑަރޑޭލަށެވެ.
ފެންބޮޑުވުމާ ގުޅިގެން މަޔާމީގެ މަގުތަކުގައި އެއްގަމު އުޅަނދުފަހަރު ތާށިވެފައިވާއިރު، އެ ރަށުގެ ސްކޫލްތައް ވެސް ވަނީ ވަގުތީ ގޮތުން ބަންދުކޮށްފައެވެ. އަދި، ފޯޓް ލޯޑަރޑޭލްގައި ފެންބޮޑުވުމުގެ ސަބަބުން ވައިގެ އުދުހުންތައް ވަނީ މެދުކަނޑައިލާފައެވެ. އެއީ، 180,000 މީހުންގެ އާބާދީއެއް ދިރިއުޅޭ ރަށެކެވެ.
ފާއިތުވި 24 ގަޑިއިރުގެ ތެރޭގައި ފޯޓް ލޯޑަރޑޭލަށް 635 މިލިމީޓަރުގެ ވާރޭ ވެހިފައިވާ ކަމުގައި އެ ޤައުމުގެ މޫސުމާ ބެހޭ ޤައުމީ އިދާރާ (އެން.ޑަބްލިޔު.އެސް)އިން ބުނެއެވެ. އެ ސަރަޙައްދަށް އެންމެ ފަހުން އެހާ ބޯކޮށް ވާރޭވެހިފައި ވަނީ 1979 ވަނަ އަހަރެވެ. އެ ރަށުގެ ވައިގެ ބަނދަރަށް ދަތުރުކުރެވެން އޮތް ހުރިހާ މަގެއްގައި ފެންބޮޑުވެފައިވާ ކަމަށާއި، ރަންވޭ މަތީގައި ވެސް ފެންބޮޑުވެ، ކުނިތައް ޖަމާވެފައިވާ ކަމުގައި އޮފިޝަލުން ވިދާޅުވެއެވެ.
ފެންބޮޑުވުމާ ގުޅިގެން ފޯޓް ލޯޑަރޑޭލްގައި ކުއްލި ހާލަތެއް އިޢުލާނުކޮށްފައިވާއިރު، އެ ރަށުގެ ގިނަ ރައްޔިތުން ތިބީ އެ މީހުންގެ ގެދޮރުގައި ތާށިވެފައެވެ. އެ ކަމާ މެދު ބައެއް ޢާންމު ރައްޔިތުން ހިތްހަމަނުޖެހުން ފާޅުކޮށްފައިވާ ކަމަށް ރިޕޯޓުތައް ބުނެއެވެ. އަދި، ވައިގެ އުދުހުންތައް މެދުކަނޑައިލުމާ ގުޅިގެން ވެސް ގިނަ ޢަދަދެއްގެ ބަޔަކު ނުރުހުން ފާޅުކޮށްފައިވެއެވެ. ކުރިއަށް އޮތް ދުވަސްތަކުގައި ވެސް މަޔާމީއާއި ފޯޓް ލޯޑަރޑޭލް އޮންނަ ސަރަޙައްދަށް ބޯކޮށް ވާރޭ ވެހޭނެ ކަމަށް އެން.ޑަބްލިޔު.އެސް.އިން ލަފާ ކުރެއެވެ.