އޮސްޓްރޭލިޔާގެ ހުޅަނގުގެ ސަރަޙައްދުތަކަށް ކެޓެގަރީ ފަހެއްގެ ބާރުގަދަ ތޫފާނެއް ކަމުގައިވާ އިލްސާ އެރުމުގެ ސަބަބުން ބޮޑެތި ގެއްލުންތަކެއް ލިބިއްޖެއެވެ. ތޫފާން ފުރަތަމަ އަރާފައި ވަނީ އޮސްޓްރޭލިޔާގައި އޮންނަ އަޔަން އޯ ނުވަތަ ދަގަނޑު އުފެއްދުމަށް ބޭނުންކުރާ ރޯ މެޓީރިޔަލް އެކްޕޯޓްކުރާ މަރުކަޒު އޮންނަ ޕޯޓް ހެޑްލެންޑް ސަރަޙައްދަށެވެ. އެއީ ދުނިޔޭގެ އެ ފަދަ އެންމެ ބޮޑު މަރުކަޒެވެ.
މި ތޫފާނާ އެކު ރެކޯޑު ބާރު މިނެއްގައި ވައިޖެހިފައިވީ ނަމަވެސް، ޢާންމުން ދިރިއުޅޭ ސަރަޙައްދުތަކަށް ބޮޑެތި ގެއްލުންތަކެއް ލިބިފައި ނުވާ ކަން ފާހަގަކުރެވެއެވެ. އަދި، ތޫފާނުގެ ނުރައްކާތެރިކަން މިހާރު ވަނީ ކެޓެގަރީ ތިނަކަށް ދަށްކޮށްފައެވެ. ނަމަވެސް، އޮސްޓްރޭލިޔާގެ ހުޅަނގުގެ ސަރަޙައްދުތަކުގައި މީހުން ދިރިއުޅޭ ސަރަޙައްދުތަކުގައި އަދިވެސް އޮތީ ރަތް ސަމާލު އިޢުލާނުކޮށްފައެވެ.
ތޫފާން އިލްސާއަކީ ފާއިތުވި 14 އަހަރުގެ ތެރޭގައި އޮސްޓްރޭލިޔާއަށް އަރާފައިވާ އެންމެ ބާރުގަދަ އަދި އެންމެ ނުރައްކާތެރި ތޫފާނެވެ. ތޫފާނާ އެކު ޖެހެމުންދާ ބާރު ވައިގެ ސަބަބުން ބޮޑެތި ގެއްލުންތަކެއް ލިބުނު ނަމަވެސް، އެއްވެސް މީހެއްގެ ފުރާނައަށް ނުރައްކާވިކަމުގެ ރިޕޯޓެއް ކޮށްފައި ނުވާ ކަމުގައި ޕޯޓް ހެޑްލެންޑުގެ މޭޔަރު ޕީޓަރ ކާޓަރ ވިދާޅުވިއެވެ. ޕޯޓް ހެޑްލެންޑަކީ މައިން ކުރުމުގެ ސިނާޢަތުގެ ކުރީ ސަފުގައި ހަރަކާތްތެރިވާ ސަރަޙައްދެކެވެ. އޭގެ ތެރޭގައި ރަން ނަގާ މައިންތައް ވެސް ހިމެނެއެވެ.
ތޫފާން އިލްސާ އެރި ވަގުތު އޮސްޓްރޭލިޔާގެ ހުޅަނގު ފަރާތުގައި އޮންނަ ބެޑޫޓް އައިލެންޑްސްއަށް ވައި ޖެހިފައި ވަނީ ގަޑިއަކު 218 ކިލޯމީޓަރުގެ ބާރުމިނުގައެވެ. މިއީ، އޮސްޓްރޭލިޔާގެ ސަރަޙައްދަކަށް މިހާ ބާރުމިނުގައި ވައިޖެހިފައިވާ ފުރަތަމަ ފަހަރެވެ. އަދި، ރެކޯޑު ޢަދަދެކެވެ. އޭގެ ކުރިން އެންމެ ވައިބާރުވެފައި ވަނީ 2007 ވަނަ އަހަރު ތޫފާން ޖޯޖްގެ ސަބަބުންނެވެ. އެ ފަހަރު ވައިގެ ބާރުމިން ރެކޯޑު ކުރެވިފައި ވަނީ ގަޑިއަކު 194 ކިލޯމީޓަރުގައެވެ.
މި ތޫފާނަށް ތައްޔާރުވުމުގެ ގޮތުން އޮސްޓްރޭލިޔާގެ ހުޅަނގުގެ ސަރަޙައްދުތަކުގައި ރައްކާތެރި ކަމުގެ ފިޔަވަޅުތައް އަޅާފައިވެއެވެ. އަދި، ތޫފާނާ ގުޅިގެން އެންމެ ބޮޑަށް ނުރައްކާވާނެ ކަމަށް ބެލެވުނު ސަރަޙައްދުތަކުގައި ދިރިއުޅޭ ރައްޔިތުން ވަނީ ރައްކާތެރި ހިސާބުތަކަށް ބަދަލުކޮށްފައެވެ. ހޯޓް ހެޑެލްންޑުގައި ހުންނަ އަޔަން އޯ އެކްސްޕޯޓްކުރާ މަރުކަޒުގައި ބަނދަރުކޮށްފައިވާ އާގުބޯޓުތައް ވެސް ވަނީ އެހެން ސަރަޙައްދުތަކަށް ބަދަލުކޮށްފައެވެ.
އޮސްޓްރޭލުޔާގެ ހުޅަނގުގެ ސަރަޙައްދަށް އެންމެ ފަހުން ކެޓެގަރީ ފަހެއްގެ ބާރުގަދަ ތޫފާނެއް އަރާފައި ވަނީ 2009 ވަނަ އަހަރެވެ. އެއީ، ތޫފާން ލޯރެންސެވެ. އޭގެ ދެ އަހަރު ކުރިން އެރި ތޫފާން ޖޯޖްއާ ގުޅިގެން ހިނގި އެކި ހާދިސާތަކުގައި ތިން މީހުން ވަނީ މަރުވެފައެވެ. އެ ތޫފާނުގައި އެންމެ ބޮޑަށް ގެއްލުންލިބިފައި ވަނީ ޕޯޓް ހެޑްލެންޑުގެ ދެކުނުން އޮންނަ މައިންތަކެއް ހުންނަ ސަރަޙައްދަކަށެވެ.