ހަނގުރާމަކުރަމުންދާ ރަޝިޔާއާއި ޔޫކްރެއިނާ ދެމެދު 200 އަށްވުރެ ގިނަ އަސީރުން ބަދަލުކޮށްފިއެވެ. މިއީ، 2022 ވަނަ އަހަރުގެ ފެބުރުވަރީ މަހުގެ 24 ވަނަ ދުވަހު ރަޝިޔާ ސިފައިން ޔޫކްރެއިނަށް ފޮނުވައިގެން ފަށާފައިވާ ހަނގުރާމައިގެ ތެރެއިން އަތުލައިގަނެފައިވާ ސިފައިންނެވެ. މީގެ ކުރިން ވެސް ދެ ޤައުމުގެ ދެމެދުގައި އަސީރުން ބަދަލުކޮށްފައިވެއެވެ.
ޔޫކްރެއިނުގެ ރައީސް އޮފީހުގެ ޗީފް އޮފް ސްޓާފް އަންޑްރީ ޔަރްމަކް ވިދާޅުވީ އެ ޤައުމުގެ ސިފައިން ހައްޔަރުކޮށްފައިވާ ރަޝިޔާގެ 106 މީހުން މިނިވަންކޮށް، އެ ޤައުމާ ހަވާލުކޮށްފައިވާ ކަމުގައެވެ. އޭގެ ތެރޭގައި ހިމެނެނީ ރަޝިޔާގެ ސިފައިންނާއި، ކަނޑުގެ ސިފައިންނާއި، ސަރަޙައްދީ ރޮނގު ބަލަހައްޓާ ގާޑުން ކަމަށް އޭނާ ވިދާޅުވިއެވެ.
ރަޝިޔާއިން ވެސް ވަނީ އެ ޤައުމުން ހައްޔަރުކޮށްފައިވާ ޔޫކްރެއިނުގެ 100 މީހުން މިނިވަންކޮށް، އެ ޤައުމާ ހަވާލުކޮށްފައެވެ. އޭގެ ތެރޭގައި، ޔޫކްރެއިނުގެ އިރުމަތީގައިވާ ޑޮނެޓްސްކުގެ ދެކުނުގައި އޮންނަ ބަނދަރުމަތީ ރަށް – މަރިޔުޕޯލްގެ ދިފާޢުގައި ރަޝިޔާ ސިފައިންނާ ހަނގުރާމަކުރި ސިފައިން ހިމެނޭ ކަމުގައި ޔަރްމަކް ވިދާޅުވިއެވެ. މިނިވަން ކޮށްފައިވާ ބައެއް މީހުންނަށް ބޮޑެތި އަނިޔާތައް ލިބިފައިވާ ކަމުގައި ވެސް އޭނާ ވިދާޅުވިއެވެ.
ޔޫކްރެއިނުން މިނިވަންކޮށްފައިވާ ރަޝިޔާ ސިފައިން މޮސްކޯއަށް ގެންގޮސް، އެ މީހުންނަށް ބޭނުންވާ ޞިއްޙީ ފަރުވާ ފޯރުކޮށްދެވޭނެ ކަމުގައި ރަޝިޔާއިން ބުނެއެވެ. އަދި، ނަފްސާނީ އެހީއަށް ބޭނުންވާ މީހުން ދެނެގަނެ، އެ މީހުންނަށް އެ ޚިދުމަތް ވެސް ފޯރުކޮށްދެވޭނެ ކަމުގައި ރަޝިޔާގެ ދިފާޢީ ވުޒާރާއިން ބުންޏެވެ.
ހުސްވި މާރިޗު މަހުގެ ތެރޭގައި ވެސް ދެ ޤައުމުގެ ދެމެދުގައި އަސީރުން ބަދަލުކޮށްފައިވެއެވެ. މި ގޮތުން، މާރިޗު 7 ވަނަ ދުވަހު ރަޝިޔާއިން ވަނީ ޔޫކްރެއިނުގެ 130 މީހުން މިނިވަން ކޮށްފައެވެ. އަދި، ޔޫކްރެއިނުން ވަނީ ރަޝިޔާގެ 90 ސިފައިން މިނިވަންކޮށް، އެ ޤައުމާ ހަވާލުކޮށްފައެވެ.