ފަރަންސޭސިވިލާތުގެ ދެކުނުގައިވާ ބަނދަރުމަތީ ރަށެއް ކަމުގައިވާ މަޚްސޭގައި ވެއްޓުނު ޢިމާރާތުގެ ދަށުން މަރުވެފައިވާ ދެ މީހެއްގެ ހަށިގަނޑު ފެނިއްޖެއެވެ. ވެއްޓިފައިވާ ހަތަރު ބުރިއަށް ނަގާފައިވާ ޢިމާރާތް ހުންނަނީ މަޚްސޭގެ ލަ ޕްލެން ސަރަޙައްދުގައި ހުންނަ ޢާންމުން ދިއިރުޅޭ އެޕާޓްމަންޓްތައް ހުންނަ ޢިމާރާތެކެވެ. ވެއްޓިފައިވާ ޢިމާރާތުގެ ދަށުގައި އިތުރު ހަ މީހަކު ތާށިވެފައިވާ ކަމަށް ބެލެވޭ ކަމުގައި މީހުން ސަލާމަތްކުރާ ޓީމުތަކުން ބުނެއެވެ.
އެ ޢިމާރާތް ވެއްޓިފައި ވަނީ ބާރުގަދަ ގޮވުމަކަށް ފަހުއެވެ. އަދި، ވެއްޓިފައިވާ ޢިމާރާތުގެ އެއް އެޕާޓްމަންޓުގައި ބޮޑު އަލިފާންގަނޑެއް ރޯވުމުގެ ސަބަބުން، ޢިމާރާތުގެ ދަށުގައި ތާށިވި މީހުން ސަލާމަތް ކުރުމަށް ކުރަމުންދިޔަ މަސައްކަތްތަކަށް ހުރަސް އެޅުނެވެ. އެ މަސައްކަތް ފެށުނީ، 100 މީހުންގެ މަސައްކަތުން އަލިފާންގަނޑު ކޮންޓްރޯކް ކުރެވުނު ފަހުންނެވެ.
ޢިމާރާތުގެ ކޮންކްރީޓްތަކާއި ގައުކުނޑިތަކުގެ ދަށުގައި ތާށިވެފައިވާ ކަމަށް ބެލެވޭ ހަ މީހުން ހޯދުމަށް އޮފިޝަލުން ދަނީ އެކްސްކަވޭޓަރ ފަދަ ސާމާނު ބޭނުންކޮށްގެން ހުއްޓުމެއް ނެތި މަސައްކަތް ކުރަމުންނެވެ. ޢިމާރާތުގެ ދަށުން ދެ މީހެއްގެ ހަށިގަނޑު ފެނުމުގެ ކުރިން އެ ސަރަޙައްދުގެ ޕްރޮސިކިޔުޓަރ ޑޮމިނީކް ލޯރެންސް ވަނީ، އެ ޢިމާރާތުގައި ދިރިއުޅޭ ކަމަށް ބެލެވޭ އަށް މީހަކަށް ފޯނުން ގުޅަން ކުރަމުންދިޔަ މަސައްކަތްތައް ފޭލުވެފައިވާ ކަމަށް ބުނެފައެވެ. އަދި، އެ އެންމެން ވެސް ޢިމާރާތުގެ ދަށުވެފައިވާ ކަމަށް ބެލެވޭ ކަމުގައި އޭނާ ވިދާޅުވިއެވެ.
ޢިމާރާތް ވެއްޓުނު ހާދިސާގައި، އެ ޢިމާރާތާ އިންވެގެން ހުރި އެހެން ޢިމާރާތްތަކުގައި ދިރިއުޅޭ ފަސް މީހަކު ޒަޚަމުވިއެވެ. އެ މީހުންނަށް އަނިޔާވެފައި ވަނީ ވެއްޓުނު ޢިމާރާތުގައި ގޮވި ބާރުގަދަ ގޮވުމުގެ ސަބަބުން ކަމުގައި އޮފިޝަލުން ވިދާޅުވެއެވެ. ޢިމާރާތް ވެއްޓެން މެދުވެރިވި ސަބަބު ދެނެގަތުމަށް ތަހުޤީޤު ފަށާފައިވާއިރު، މިއީ ގޭސް ލީކުވުމުގެ ސަބަބުން ގޮވި ގޮވުމަކާ ގުޅިގެން ހިނގި ހާދިސާއެއް ކަމަށް ބެލެވޭ ކަމުގައި އޮފިޝަލުން ވިދާޅުވެއެވެ.
މި ހާދިސާގައި ވެއްޓުނު ޢިމާރާތާއި ޖެހިގެން ހުރި ދެ ޢިމާރާތަކަށް ގެއްލުންވެ، އޭގެ ތެރެއިން އެއް ޢިމާރާތް ވަނީ ވެއްޓިފައެވެ. މި ހާދިސާއާ ގުޅިގެން އެ ސަރަޙައްދުގައި ދިރިއުޅޭ 200 އަށްވުރެ ގިނަ މީހުން ވަނީ ރައްކާތެރި ހިސާބުތަކަށް ބަދަލުކޮށްފައެވެ. ފަރަންސޭސިވިލާތުގެ ދާޚިލީ ވަޒީރު ޖެރާލްޑް ޑާރްމަނިން ވަނީ އެ ސަރަޙައްދަށް ޒިޔާރަތް ކުރައްވާފައެވެ. އަދި، ހައުސިންގ މިނިސްޓަރ އޮލިވިޔަރ ކެލައިން ވެސް އެ ސަރަޙައްދަށް ވަޑައިގަންނަވާނެ ކަމުގައި ވެސް އޮފިޝަލުން ވިދާޅުވިއެވެ.