ނ.މަނަދޫގައި މަރުވެފައި އޮއްވާ ފެނުނު އެރަށު އަންނާރުމާގެ، ނަޢީމާ މޫސާގެ ހަށިގަނޑު ވަޅުލާފައިވަނީ، ބޭނުންވާ ސާމްޕަލްތައް ނެގުމަށް ފަހު، އިތުރަށް ޕޯސްޓްމޯޓަމް ހަދަން ޖެހޭ ސަބަބެއް ނެތްކަމަށް ފުލުހުންގެ ފޮރެންސިކް ޓީމުން ނިންމުމުންކަމަށް ފުލުހުން ވިދާޅުވެއްޖެއެވެ. ޚަބަރެއް ނުވެގެން ހޯދަމުންދަނިކޮށް، ނަޢީމާ މޫސާ މަރުވެފައި އޮއްވާ ފެނުނީ އޭނާ ދިރިއުޅޭ ކޮޓަރިތެރޭގައި އޮއްވައެވެ.
މަޢުލޫމާތު ލިބޭގޮތުގައި އޭނާގެ ގައިގައި ބޮޑެތި ޒަޚަމްތައް ހުއްޓެވެ. އެގޮތުން ނަޢީމާގެ ގައިގެ 21 ތަނަކަށް ވަޅިން ޙަމަލާދީފައިވާކަމަށް މަޢުލޫމާތުލިބިފައިވެއެވެ. ނަމަވެސް މިކަމުގެ އެއްވެސް މަޢުލޫމާތެއް ފުލުހުން ހާމަކޮށްފައެއް ނުވެއެވެ.
ފުލުހުން ވިދާޅުވީ ނަޢީމާ މޫސާގެ މަރުގައި ތުހުމަތު ކުރެވޭ ކަންތައްތަކެއް ފާހަގަކުރެވިފައިވާތީ އެ މައްސަލައިގެ ތަހުގީގު ކުރިއަށް ގެންދަނީ ހޮމިސައިޑް އިންވެޓިގޭޝަނެއްގެ ގޮތުގައިކަމަށެވެ. އެގޮތުން ފުލުހުންގެ ސީރިއަސް އެންޑް އޮގަނައިޒްޑް ކްރައިމް ޑިޕާރޓްމަންޓްގެ ޚާއްސަ ތަހުގީގު ޓީމަކާއި ފޮރެންސިކް ތަޙުގީގު ޓީމެއްގެ އިތުރުން ފޮރެންސިކް ޕެތޮލޮޖިސްޓެއް ނ.މަނަދޫގައި ހަރަކާތްތެރިވަމުންދާކަމަށް ފުލުހުން ވިދާޅުވިއެވެ.
ފުލުހުން ވިދާޅުވީ ނަޢީމާ މޫސާގެ ހަށިގަނޑު އާއިލާއާއި ހަވާލުކުރީ، ތަހުލީލުތަކަށް ބޭނުންވާ ސާމްޕަލް ނެގުމަށްފަހު އިތުރަށް ޕޯސްޓްމޯޓަމް ހަދަންޖެހޭ ސަބަބެއް ނެތްކަމަށް ފުލުހުންގެ ފޮރެންސިކް ޕެތޮލޮޖިސްޓް ނިންމުމުންކަމަށެވެ. ނަޢީމާ މޫސާގެ ހަށިގަނޑު މިއަދު ހަވީރު ވަނީ ވަޅުލާފައެވެ.
ނަޢީމާގެ މަރާ ގުޅޭ އެއްވެސް މަޢުލޫމާތެއް ޙިއްސާކުރައްބޭނުންވާ ފަރާތެއްނަމަ ފުލުހުންގެ ސީރިއަސް އެންޑް އޮގަނައިޒްޑް ކްރައިމް ޑިޕަރޓްމަންޓްގެ ނަންބަރު 9911099އަށް ގުޅާ ޙިއްސާކުރުމަށް ފުލުހުން ވަނީ އެދިފައެވެ.