ނ.މަނަދޫގައި މަރުވެފައި އޮއްވާ ފެނުނު އެރަށު އަންނާރުމާގެ 62އ، ނައީމާ މޫސާގެ ހަށިގަނޑު ވަޅުލައިފިއެވެ. އޭނާގެ މައްޗަށް ކަށުނަމާދުކޮށްފައިވަނީ ހަވީރު 04:45ގައެވެ. ނައީމާގެ ހަށިގަނޑު ވަޅުލާފާފައިވަނީ ހަވީރު 05:30 ހާއިރުއެވެ.
މަނަދޫގައި އުމުރުން ދުވަސްވީ އަންހެނަކު މަރުވެފައި އޮއްވާ ފެނުނު މައްސަލާގައި، ފުލުހުންގެ ސީރިއަސް އެންޑް އޮގަނައިޒްޑް ކްރައިމް ޑިޕާޓްމަންޓްގެ ޓީމުން އެރަށުގައި އަންނަނީ ހަރަކާތްތެރިވަމުންނެވެ.
މަޢުލޫމާތު ލިބޭގޮތުގައި ނަޢީމާ މަރުވެފައި އޮތްއިރު، ހަށިގަނޑުގައި ބޮޑެތި ޒަޚަމުތަކެއް ހުއްޓެވެ. އެގޮތުން ހަޑިގަނޑުގެ 21 ތަނަކަށް ވަޅިން ހަމަލާދީފައި ހުރިކަމަށް މަޢުލޫމާތު ލިބިފައިވެއެވެ.
އެ އަންހެން މީހާ މަރުވެފައި އޮއްވާ ފެނުނީ، ޚަބަރެއް ނުވެގެން، އޭނާ ހޯދުމަށް ފުލުހުންނަށް ރިޕޯޓްކޮށްގެން ހޯދަމުން ދަނިކޮށެވެ. އޭނާ ނުފެނިގެން ފުލުހުންނަށް ރިޕޯޓްކުރީ ހުކުރު ދުވަހު 18:13 ހާއިރު އޭނާގެ އާއިލާއިންނެވެ. މިރިޕޯޓާއި ގުޅިގެން ފުލުހުން އެ އަންހެންމީހާ ދިރިއުޅޭ ގެއަށް ގޮސް ކޮޓަރީގެ ދޮރު ވައްޓާލައިގެން ކޮޓަރިއަށް ވަތްއިރު އޭނާ ކޮޓަރި ތެރޭގައި ނިޔާވެފައި އޮތްވާ ފެނިފައިވާކަމަށް ފުލުހުން ވިދާޅުވެފައިވެއެވެ.
މި މައްސަލައާއި ގުޅިގެން ފުލުހުންގެ ސީރިއަސް އެންޑް އޮގަމައިޒްޑް ކްރައިމް ޑިޕަރޓްމަންޓްގެ ޓީމުން އަންނަނީ މަނަދޫގައި ހަރަކާތެރިވަމުންނެވެ. އެގޮތުން އެމީހާ ދިރިއުޅެމުން އައި ގެއާއި، އެ ގެ ހިމެނޭ ބޮޑު ސަރަޙައްދެއް ވަނީ ބަންދުކޮށްފައެވެ. އަދި ފުލުހުންގެ ތަޙުޤީގަށް ބޭނުންވާ މަޢުލޫމާތު ރަށުން ނެގުމުގެ މަސައްކަތް ދަނީ ކުރިއަށެވެ.
ޕީއެސްއެމް ނިއުސްއަށް މަޢުލޫމާތު ދެއްވަމުން ނ. މަނަދޫ ކައުންސިލްގެ ރައީސް ޢަބްދުއް ރަޙުމާން ސަބީހް ވިދާޅުވީ ނިޔާވެފައިވާ އަންހެން މީހާއަކީ ކައުންސިލްގެ މުވައްޒަފެއްކަމަށެވެ. އޭނާ ބުރާސްފަތި ދުވަހު މަސައްކަތަށް ނިކުމެފައިނުވާތީ އެކުގައި މަސައްކަތްކުރާ މީހުން އެގެއަށް ދިޔަކަމަށާއި، އެހެންނަމަވެސް ދޮރު ނުހުޅުވާކަމަށް ކައުންސިލްގެ ރައީސް ވިދާޅުވިއެވެ. އަދި ހުކުރު ދުވަހުވެސް ޚަބަރެއް ނުވާތީ އެގެއަށް ގޮސް ދޮރުގައި ޓަކި ޖެހުމުން ދޮރު ނުހުޅުވާތީ ޢާއިލާއަށް އެކަން އެންގިކަމަށް ކައުންސިލް ރައީސް ވިދާޅުވިއެވެ.
ކައުންސިލްގެ ރައީސް ވިދާޅުވީ އަންހެން މީހާގެ މަރާއި ގުޅިގެން ބަލަންޖެހޭ އިތުރު ކަންތައްތަކެއް ހުރިކަމަށް ފުލުހުން އަންގާފައިވާތީ، އެކަމުގެ މަޢުލޫމާތު ހިއްސާނުކޮށް އަދި އެއްވެސް ފަރާތަކުން އެރަށަށް އަރައި ނުފޭބުމަށް މިހާރު ޢާއްމުކޮށް އަންގާފައިވާކަމަށެވެ. އެއަންހެން މީހާ ނިޔާވިއިރު އެގޭގައި ދިރިއުޅެނީ އޭނާ އެކަނިކަމަށް ކައުންސިލުން ވިދާޅުވެއެވެ. ޢާއިލާގެ އެހެން މީހުން ރަށުގައި އުޅުނުނަމަވެސް ނިޔާވި މިހާގެ 3 ކުދިން ދިރިއުޅެނީ ރަށުން ބޭރުގައިކަމަށްވެސް ކައުންސިލުންވަނީ ފާހަގަކޮށްފައެވެ.