ރަޝިޔާގެ އުފެއްދުންތައް އެކްސްޕޯޓް ކުރުމުގެ ފުރުޞަތު އެ ޤައުމަށް ނުލިބޭ ނަމަ، ޔޫކްރެއިނުގައި ހައްދާ ގޮވާމުގެ ބާވަތްތައް އެކްސްޕޯޓް ކުރުމަށް ހަދާފައިވާ އެއްބަސްވުމަށް ހުރަސްއަޅާނެ ކަމަށް ވިދާޅުވެ، ރަޝިޔާގެ ޚާރިޖީ ވަޒީރު ސަރްގޭ ލެވްރޮފް އިންޒާރު ދެއްވައިފިއެވެ. އޭނާ މި ގޮތަށް އިންޒާރު ދެއްވާފައި ވަނީ މިހާރު ތުރުކީވިލާތަށް ކުރައްވަމުން ގެންދަވާ ދަތުރުފުޅުގައި އެ ޤައުމުގެ ޚާރިޖީ ވަޒީރު މޭވްލުތް ޗަވުޝޯލޫއާ އެކު ބޭއްވެވި ބައްދަލުކުރެއްވުމެއްގައި ވާޙަކަފުޅު ދައްކަވަމުންނެވެ.
2022 ވަނަ އަހަރުގެ ފެބްރުވަރީ މަހުގެ 24 ވަނަ ދުވަހު ރަޝިޔާ ސިފައިން ޔޫކްރެއިނަށް އަރައި ފެށި ހަނގުރާމައާ ގުޅިގެން ޔޫކްރެއިނުގައި ހައްދާ ގޮވާމުގެ ބާވަތްތައް އެކްސްޕޯޓު ކުރުމަށް ހުރަސް އެޅުނެވެ. އަދި، އެ ކަމާ ގުޅިގެން ދުނިޔޭގެ ބާޒާރުގައި ކާބޯތަކެތީގެ އަގުތައް އިންތިހާއަށް އުފުލިގެން ގޮސް، އެތަކެއް މިލިޔަން މީހުންނަށް ބަނޑުހައިހޫނުކަމާ ކުރިމަތިލާން ޖެހުނެވެ. އެ ކަން ހައްލު ކުރުމަށް ޔޫކްރެއިނުގައި ހައްދާ ގޮވާން އެކްސްޕޯޓް ކުރުމުގެ ފުރުޞަތު ދިނުމަށް ރަޝިޔާއިން އެއްބަސްވީ ތުރުކީވިލާތާއި އ.ދ.އިން އިސްނަގައިގެން ކުރި މަސައްކަތުންނެވެ.
އެ އެއްބަސްވުމުގެ ދަށުން ޔޫކްރެއިނުގެ އިތުރުން ރަޝިޔާގައި ހައްދާ ގޮވާމާއި ގަސްކާނާގެ އުފެއްދުންތައް އެކްސްޕޯޓް ކުރުމުގެ ފުރުޞަތު އެ ޤައުމަށް ލިބިދޭން ޖެހެއެވެ. ނަމަވެސް، ޔޫކްރެއިނުން ގޮވާން އެކްސްޕޯޓް ކުރުމަށް ހުރަސް އަޅާނެ ކަމަށް ލެވްރޮފް ވިދާޅުވެފައި މި ވަނީ، އެ އެއްބަސްވުމުގެ ދަށުން ރަޝިޔާއަށް ތަކެތި އެކްސްޕޯޓް ކުރުމުގެ ފުރުޞަތު ނުލިބޭތީ ކަމަށް ބެލެވޭ ކަމުގައި މަސްރަޙު ދިރާސާކުރާ ފަރާތްތަކުން ބުނެއެވެ. ޔޫކްރެއިން ހަނގުރާމައާ ގުޅިގެން ހުޅަނގާއި އެމެރިކާއިން ވަނީ ރަޝިޔާއާ ދެކޮޅަށް ދަތިކުރުމުގެ ހަރުކަށި ފިޔަވަޅުތަކެއް އަޅާފައެވެ.
"
ރަޝިޔާގައި ހައްދާ ގޮވާމާއި ގަސްކާނާ އެކްސްޕޯޓް ކުރުމަށް ހުރި ހުރަސްތައް ނައްތައިލާފައެއް ނުވޭ. އެ ހުރަސްތައް ނައްތައިލަން ދެކޮޅު ހަދާ ނަމަ، ޔޫކްރެއިނުން ވެސް ގޮވާން އެކްސްޕޯޓް ކުރުމުގެ ފުރުޞަތެއް ނުދޭނަން،" ލެވްރޮފް ވިދާޅުވިއެވެ. މީގެ އިތުރުން ޔޫކްރެއިން ހަނގުރާމައާ ގުޅޭ ގޮތުން ވެސް ލެވްރޮފް ވާހަކަފުޅު ދެއްކެވިއެވެ.
ބައިނަލްއަޤުވާމީ މަސްރަޙުގެ ހަމަޖެހުމާ ގުޅޭ ކަންކަން ރޭވިފައިވާ ގޮތް ބަދަލުކުރުމާ މެދު މަޝްވަރާ ކުރުމަށް ރަޝިޔާއަށް ފުރުޞަތު ނުދޭ ނަމަ، ޔޫކްރެއިން ހަނގުރާމަ ހުއްޓައިލުމާ ގުޅޭގޮތުން އެ ޤައުމާ އެކު މަޝްވަރާކުރަން ބޭނުން ނުވާ ކަމުގައި ވެސް ލެވްރޮފް ވިދާޅުވިއެވެ. "އެއްވެސް ކަމަކާ. މަޝްވަރާ ކުރެވޭނީ ރަޝިޔާގެ މަސްލަޙަތު ވެސް ހިމާޔަތް ކުރުމުގެ ފުރުޞަތު ދޭ ނަމަ. ބައިނަލްއަޤުވާމީ މަސްރަޙުގެ ކަންކަން ބަދަލު ކުރުމާ ގުޅޭ އަސާސްތަކާ މެދު ވެސް މަޝްވަރާ ކުރެވެން ޖެހޭނެ،" ލެވްރޮފް ވިދާޅުވިއެވެ.
ބައިނަލްއަޤުވާމީ މަސްރަޙުގެ ކަންކަން ނިންމުމުގެ ބާރު އެންމެ ޤައުމަކަށް ދީފައި އޮތް އޮތުމަށް ބަދަލު ގެންނަން ޖެހޭ ކަމަށާއި، އެ ހާލަތު ބަދަލުކުރަން ރަޝިޔާއިން ބޭނުންވާ ކަމުގައި ވެސް ލެވްރޮފް ވިދާޅުވިއެވެ. އޭނާ އިޝާރާތް ކުރައްވާފައި އެ ވަނީ، ބައިނަލްއަޤުވާމީ މަސްރަޙުގެ ކަންކަން ނިންމުމަށް އެމެރިކާއިން ބާރާއި ނުފޫޒު ބޭނުންކުރަމުންދާ ކުރުމަށެވެ. ޔޫކްރެއިން ހަނގުރާމައަކީ ވެސް އެމެރިކާގެ ބާރާއި ނުފޫޒު ކަނޑުވައިލަން ކުރަމުންދާ ހަނގުރާމައެއް ކަމުގައި ރަޝިޔާއިން ބުނެއެވެ.
ކްރެމްލިންއިން ބުނީ ޔޫކްރެއިން ހަނގުރާމައަށް ޑިޕްލޮމެޓިކް ނުވަތަ ހުރިހާ ފަރާތަކަށް ފައިދާވާ ފަދަ ހައްލެއް ފެންނަން ނެތް ކަމަށާއި، ހަނގުރާމަ ކުރިއަށް ގެންދިޔުން ނޫން އިތުރު މަގެއް އެ ޤައުމަށް ފެންނަން ނެތް ކަމުގައެވެ.
ލެވްރޮފް ތުރުކިވިލާތަށް ކުރެއްވި ދަތުރުފުޅުގެ ކުރިން ރަޝިޔާއިން ވަނީ ޔޫކްރެއިނާ އެކު ހަދާފައިވާ ގޮވާން އެކްސްޕޯޓް ކުރުމުގެ އެއްބަސްވުމުގެ މުއްދަތު އިތުރު 60 ދުވަހަށް އިތުރު ކުރަން ނިންމާފައެވެ. ނަމަވެސް، ތުރުކީވިލާތުން ބޭނުން ވަނީ އެ މުއްދަތު 120 ދުވަހަށް އިތުރު ކުރުމަށެވެ. 2022 ވަނަ އަހަރުގެ ޖުލައި މަހު އެކުލަވައި އެއްބަސްވުމުގެ ދަށުން 25 މިލިޔަން ޓަނުގެ ގޮވާމުގެ ބާވަތްތައް ޔޫކްރެއިނުން ވަނީ ބޭރުކޮށްފައެވެ.