ދެކުނު އެމެރިކާގެ ޤައުމެއް ކަމުގައިވާ ބްރެޒިލްގެ ދެކުނުގައިވާ ރަށެއްގެ ޕްރީސްކޫލަކަށް މީހަކު ވަދެ، ކޯރާޑިއަކުން ހަމަލާދީ، ހަތަރު ކުޑަކުދިން މަރައިލައިފިއެވެ. ހަމަލާދީފައި ވަނީ ބްލޫމެނާއޫގައި ހުންނަ އަމިއްލަ ފަރާތަކުން ހިންގާ ސްކޫލެއް ކަމުގައިވާ ގުޑް ޝެފަރޑް ސެންޓަރުގައެވެ. ހަތަރު ކުދިން މަރައިލުމަށް ފަހު އޭނާ ވަނީ އިތުރު ހަތަރު ކުއްޖަކަށް ހަމަލާދީ ޒަޚަމުކޮށްލާފައެވެ.
މި ހަމަލާގައި މަރުވީ ތިން ފިރިހެން ކުދިންނާއި އަންހެން ކުއްޖެކެވެ. އެއީ، އުމުރުން ފަސް އަހަރާއި ހަތް އަހަރާއި ދެމެދުގެ އުމުރުފުރައިގެ ކުދިންނެވެ. ހަމަލާދިން މީހަކީ އުމުރުން 25 އަހަރުގެ މީހެކެވެ. އޭނާ ސްކޫލަށް ވަދެފައި ވަނީ ފާރުމަތިން ފުންމައިލައިގެންނެވެ. އަދި، ހަމަލާއަށް ފަހު އޭނާ ވަނީ އަމިއްލައަށް ފުލުހުންނާ ހަވާލުވެފައެވެ.
މި ހާދިސާއާ ގުޅިގެން ބްލޫމެނާއޫގެ ސްކޫލުތައް ވަނީ ބަންދުކޮށްފައެވެ. އަދި، ގިނަ ޢަދަދެއްގެ ބަޔަކު ދަނީ މި ހާދިސާއާ ގުޅިގެން ހިތާމަ ފާޅުކުރަމުންނެވެ. ބްރެޒިލްގެ ރައީސް ލުއީޒް އިނާސިޔޯ ލޫލާ ޑެ ސިލްވާ ވިދާޅުވީ ކުޑަކުދިންތައް ޤަތުލުކުރި މީހަކީ އިންސާނެއް ނޫން ކަމަށާއި އެއީ "ފުރޭތައެއް" ކަމުގައެވެ.
"އަމިއްލަ ދަރިޔަކު، ނުވަތަ މާމަ ނުވަތަ ކާފަ ދަރިޔަކު މަރުވުމަކީ ޢާއިލާއަކަށް ލިބޭނެ އެންމެ ބޮޑު ހިތާމަ. ދިފާޢުވާނެ އެއްވެސް ގޮތެއް ނެތް ކުށެއް ނެތް ތުއްތު ކުދިންތަކެއް މަރައިލުމަކީ އަދި އެއަށްވުރެ ބޮޑު ހިތާމައެއް،" ސިލްވާ ވިދާޅުވިއެވެ.
މި ހަމަލާގައި ޒަޚަމުވެފައި ވަނީ ދެ އަންހެން ކުދިންނާއި ދެ ފިރިހެން ކުދިންނެވެ. އެއީ އުމުރުން ތިން އަހަރާއި ފަސް އަހަރާ ދެމެދުގެ ކުދިންނެވެ. އެ ކުދިންނަށް މިހާރު ހޮސްޕިޓަލުގައި ފަރުވާދެމުންދާއިރު، އެ ކުދިންގެ ހާލު ރަނގަޅުވަމުން އަންނަ ކަމުގައި ބްލޫމެނާއޫގެ އޮފިޝަލުން ވިދާޅުވެއެވެ.
މި ހަމަލާގެ ފަހަތުގައިވާ މީހަކީ މީގެ ކުރިން ވެސް ހަތަރު ފަހަރެއްގެ މަތިން ހައްޔަރުކޮށްފައިވާ މީހެކެވެ. އޭގެ ތެރެއިން އެއް ފަހަރު އޭނާ ހައްޔަރުކޮށްފައި ވަނީ، އޭނާގެ ދޮންބައްޕައަށް ވަޅިއަކުން ހަމަލާދިނުމުގެ ކުށުގައެވެ. ސްކޫލު ކުދިންތަކަށް ދިން ހަމަލާގައި އިތުރު މީހެއްގެ ބައިވެރިވުން ނެތް ކަމުގައި ބްލޫމެނާއޫގެ އޮފިޝަލުން ވިދާޅުވެއެވެ.
ބްލޫމެނާއޫއަކީ 360,000 މީހުންގެ އާބާދީއެއް އޮންނަ ރަށެކެވެ. ސްކޫލު ކުދިންނަށް ދިން ހަމަލާއާ ގުޅިގެން އެ ރަށުގެ ސްކޫލްތައް ބަންދުކޮށްފައިވާއިރު، މަރުވި ކުދިންގެ ހަނދާނުގައި ހިތާމަފާޅުކުރުމުގެ ގޮތުން 30 ދުވަސް ވަނީ ކަނޑައަޅާފައެވެ.
ބްރެޒިލްގެ ސްކޫލްތަކުގައި ދޭ މި ފަދަ ހަމަލާތައް ފަހަކަށް އައިސް އިތުރުވެފައިވާ ކަން ފާހަގަކުރެވެއެވެ. ހުސްވި ހަފުތާގައި ސައު ޕައުލޯގެ ސްކޫލެއްގައި 13 އަހަރުގެ ކުއްޖަކު ވަނީ ވަޅިއަކުން ހަމަލާދީ އޭނާގެ ޓީޗަރެއް މަރައިލާފައެވެ. ހުސްވި 2022 ވަނަ އަހަރުގެ ނޮވެންބަރު މަހު 16 އަހަރުގެ ކުއްޖަކު ވަނީ ބަޑިން ހަމަލާދީ ހަތަރު މީހުން މަރައިލާ، އިތުރު 10 މީހުން ޒަޚަމުކޮށްލާފައެވެ. އެ ހާދިސާ ހިނގާފައި ވަނީ ބްރެޒިލްގެ އިރުދެކުނުގައިވާ އެރަކްރޫޒްގައެވެ.
ބްރެޒިލްގެ ސްކޫލެއްގައި ހިނގާފައިވާ މި ފަދަ އެންމެ ހިތާމަވެރި ހާދިސާ ހިނގާފައި ވަނީ 2011 ވަނަ އަހަރުއެވެ. ރިއޯ ޑި ޖެނެއިރޯގެ އެލެމެންޓަރީ ސްކޫލަކަށް ދިން ބަޑީގެ ހަމަލާތަކުގައި 12 ދަރިވަރުން މަރުވިއެވެ. މީގެ އިތުރުން ޕްރީސްކޫލްތަކުގައި ހިނގާ މި ފަދަ ހާދިސާތައް ވެސް ފަހަކަށް އައިސް ވަނީ އިތުރުވެފައެވެ.