ޖުމްހޫރީ ޕާޓީއާއެކު ކޯލިޝަން ހަދައިގެން ރިޔާސީ އިންތިހާބުގައި ވާދަކުރަން ބޭނުން ނުވާކަމަށް އިދިކޮޅު ޕީޕީއެމްއާއި އެމްއެންޕީ އަދި އަމިއްލަގޮތުން ވާދަކުރަން ނިންމާފައިވާ ބައެއް ބޭފުޅުން ވިދާޅުވެއްޖެއެވެ.
ޖުމްހޫރީ ޕާޓީން ރިޔާސީ އިންތިހާބުގައި ވާދަކުރަން ނިންމާފައިވާތީ އެ ޕާޓީން ވަނީ އިސްވެ ކޯލިޝަން ހެދުމަށް ބައެއް ފަރާތްތަކަށް ދައުވަތު ފޮނުވާފައެވެ. އެގޮތުން ދައުވަތު ފޮނުވާފައިވަނީ ޕީޕީއެމް، އެމްއެންޕީ، އެމްއާރުއެމް، އަދި އަމިއްލަގޮތުން ވާދަަކުރާނެކަން އިއުލާންކޮށްފައިވާ ކުރީގެ ހޯމް މިނިސްޓަރ އުމަރު ނަސީރާއި ކުރީގެ ބަންޑާރަ ނާއިބު ޑރ.މުހައްމަދު މުނައްވަރަށެވެ.
ޖޭޕީން ކޯލިޝަން ހެދުމުގެ ދައުވަތަށް އެމްއާރުއެމް ފިޔަވައި ހުރިހާ ފަރާތަކުން މިހާރު ވަނީ ޖަވާބުދީފައެވެ. އެގޮތުން ޕީޕީއެމް، އެމްއެންޕީ އަދި އުމަރު ނަސީރާއި ޑރ.މުހައްމަދު މުނައްވަރުވެސް ވަނީ ޖޭޕީގެ ދައުވަތު ޤަބޫލުނުކުރާނެކަން ހާމަކޮށްފައެވެ. އެ ހުރިހާ ފަރާތަކުންވެސް މައިގަނޑު ގޮތެއްގައި ބުނަނީ ޖޭޕީގެ ފަހަތަށް ނާރާނެކަމަށެވެ.
ޕީޕީއެމްއާއި އެމްއެންޕީން ވަނީ އެ ދެ ޕާޓީން އިންތިހާބުގައި ވާދަކުރާނެކަމަށާއި، އަދި އެ ޕާޓީތަކުގެ ފަހަތަށް ޖުމްހޫރީ ޕާޓީ އެރުމަށްވެސް ގޮވާލާފައެވެ.
ޕީ.ޕީ.އެމް/ޕީ.އެން.ސީ ކޯލިޝަނަކުން އެހެން އެއްވެސް ޕާޓީ އެއްގެ ރިޔާސީ ކެނޑިޑޭޓަކަށް ތާއީދެއް ނުކުރާނެ.މިކޯލިޝަންގެ ރިޔާސީ ކެނޑިޑޭޓަކީ ރައީސް ޔާމީން.ގައުމަށް ހެޔޮ އެދި ވަޑައިގަންނަވާ ބޭފުޅުން މިކޯލިޝަނާ ގުޅިވަޑައިގަންނަވާ.އެއީ ގައުމާ ރައްޔިތުންނަށް އެންމެ ފައިދާ ހުރި ގޮތް #RY2023
— Abdul Raheem Abdulla (@Banafsaa) April 3, 2023
ރިޔާސީ އިންތިޚާބުގައި އަމިއްލަގޮތުން ވާދަކުރެއްވުމަށް ނިންމަވާފައިވާ ޑރ.މުނައްވަރު ވިދާޅުވީ ޖުމްހޫރީ ޕާޓީއާއެކު ކޯލިޝަން ހެދުމުގެ ވިސްނުމެއް ނެތްކަމަށާއި، ރިޔާސީ އިންތިޚާބުގައި ވާދަކުރައްވަން ނިންމެވީވެސް ކޯލިޝަން ހެދުމުން ޤައުމަށް ގެއްލުންވަމުންދާތީކަމަށެވެ.
މީގެ އިތުރުން ކުރީގެ ހޯމް މިނިސްޓަރ ޢުމަރު ނަސީރުވެސް ވިދާޅުވީ، ގާސިމް އިބްރާހިމާއެކު ކޯލިޝަން ހެދުމުގެ ވިސްނުމެއް ނެތް ކަމަށެވެ.
ކޯލިޝަން ހަދަން ދިން ދައުވަތަށް މިހާތަނަށް އެމްއާރުއެމްއިން ޖަވާބެއް ނުދެއެވެ.
2023 ގެ ރިޔާސީ އިންތިޚާބުގައި ޖުމްހޫރީ ޕާޓީ އިސްވެ ހަރަކާތްތެރިވާ ސިޔާސީ ކޯލިޝަނެއް ހެދުމަށް އެޕާޓީއިން މޯލްޑިވްސް ނެޝަނަލް ޕާޓީއަށް ފޮނުއްވި ދައުވަތާގުޅޭhttps://t.co/5XOuax2hMv pic.twitter.com/X06rnCeCX3
— Maldives National Party (@MNP_Secretariat) April 4, 2023
ޖުމްހޫރީ ޕާޓީން އިސްވެ އޮވެ ރިޔާސީ އިންތިހާބަށް ނުކުތީ އެމްޑީޕީއާއެކު އިންތިހާބުގައި ވާދަކުރުމަށް ދައުވަތު ދީފައިވަނިކޮށެވެ.
ޖުމްހޫރީ ޕާޓީއާއެކު ކުރިއަށްދިއުމަށް މިހާތަނަށް އެއްވެސް ޕާޓީއަކުން ނިންމާފައިނުވާއިރު، އެޕާޓީއާއެކު ކޯލިޝަން ހެދުމުގެ މަޝްވަރާތައް ކުރަމުންދަނީ އެމްޑީޕީގެ ޕްރައިމަރީން ނާކާމިޔާބީއާ ކުރިމަތިލާންޖެހިވަޑައިގަތް އެމްޑީޕީގެ ރައީސް އަދި ކުރީގެ ރައީސް މުހައްމަދު ނަޝީދު އެކަންނެވެ.
ގާސިމް އިބްރާހިމް ވަނީ 2008 އަދި 2013 ވަނަ އަހަރުގެ ރިޔާސީ އިންތިހާބުގައިވެސް ވާދަކުރައްވާފައެވެ. ނަމަވެސް އެ ދެ އިންތިޚާބުގައިވެސް ދެވަނަ ބުރަކަށް ދާން ބޭނުންވާ ވަރަށް ގާސިމަށް ވޯޓު ލިބިވަޑައިގެންފައެއްނުވެއެވެ.