ހުޅުމާލޭގައި އެކްސިޑެންޓެއް ހިނގައި މީހަކު ނިޔާވެއްޖެއެވެ.
ފުލުހުން ވިދާޅުވީ، ހުޅުމާލޭ ފޭސް 2 އެމްޕީއެލް ފްލެޓް ކައިރިން ޕިކަޕަކާއި ސައިކަލެއް ޖެހި ހިނގި އެކްސިޑެންޓް ވެފައިވާކަމުގެ މަޢުލޫމާތު މިއަދު 09:56 ހާއިރު ފުލުހުންނަށް ރިޕޯޓްކޮށްފައިވާކަމަށެވެ.
މި އެކްސިޑެންޓުގައި އަނިޔާވެފައިވަނީ 59 އަހަރުގެ ފިރިހެނަކަށް ކަމަށް ފުލުހުން ވިދާޅުވިއެވެ. އަދި އެމީހާއަށް ހުޅުމާލެ ހޮސްޕިޓަލުގައި ފަރުވާދެމުން ދަނިކޮށް ނިޔާވެފައިވާކަމަށް ހޮސްޕިޓަލުން މަޢުލޫމާތު ދީފައިވާކަމަށްވެސް ފުލުހުން ވިދާޅުވިއެވެ. މި އެކްސިޑެންޓުގައި ނިޔާވެފައިވަނީ ޢުމުރުން 59 އަހަރުގެ ޢަބްދުﷲ ރަޝީދު ނަމަކަށް ކިޔާ މީހެކެވެ. ޕީއެސްއެމްނިއުސްއަށް އެނގިފައިވާގޮތުގައި މިޙާދިސާގައި ނިޔާވެފައިވަނީ އަރބަންކޯގައި މަސައްކަތް ކުރަމުން ދިޔަ މީހެކެވެ. އެކުންފުނީގައި ދިގު މުއްދަތެއްގައި ޚިދުމަތްކޮށްފައިވާ މީހެއްގެ އިތުރުން އޭނާއަކީ ހުޅުމާލޭގައި އެންމެ ފުރަތަމަ މީހުން އާބާދުވީއިރު ހުޅުމާލެއަށް ދިރިއުޅުން ބަދަލުކޮށްފައިވާ މީހެއްވެސްމެއެވެ.
މިޙާދިސާގައި ޢަބްދުﷲ ރަޝީދު ނިޔާވެފައިވަނީ ހުޅުމާލެ ހޮސްޕިޓަލުގައި ފަރުވާދެމުން ދަނިކޮށްކަމަށް ހޮސްޕިޓަލާއި ޙަވާލާދީ ފުލުހުން ވިދާޅުވިއެވެ.
މި މައްސަލަ ފުލުހުން ދަނީ ތަހްގީގްކުރަމުންނެވެ.