މިއަދު މާލެއަށް ކުރި ވިއްސާރައިގައި ގެއްލުންވި ބައެއް ގޭބިސީތަކަށް ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ، އެން.ޑީ.އެމް.އޭއިން އެހީތެރިކަން ފޯރުކޮށްދީފިއެވެ. އެން.ޑީ.އެމް.އޭއިން ވަނީ ވިއްސާރައިގައި ގެއްލުންވުމުގެ ސަބަބުން ރިޕޯޓުކުރި 3 ގޭބިސީއަކަށް ބޭނުންވާ އެހީތެރިކަން ފޯރުކޮށްދީފައެވެ.
މިއަދު ހެނދުނު ގާތްގަނޑަކަށް 7 ޖެހިއިރުން ފެށިގެން ވެހެންފެށި ވާރޭ 2 ގަޑިއިރަށް ދެމިގެންދިޔައެވެ. ބޯކޮށް ވެހެމުންދިޔަ ވާރޭގެ ސަބަބުން މާލޭގެ މަގުތަކުގައި ފޫޓަކަށްވުރެ ބޮޑަށް ބައެއް ސަރަޙައްދުތަކުގައި ވަނީ ފެންބޮޑުވެފައެވެ.
ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީއިން ވިދާޅުވީ، ބޯކޮށް ވިއްސާރަވެހުމުގެ ސަބަބުން ބައެއް ގޭބިސީތަކަށް ފެންވަދެ ފަރުނީޗަރާއި ހިފާގެންގުޅޭ ތަކެތިވަނީ ހަލާކުވެފައިވާކަމަށެވެ. އަދި، ބައެއް ގެތަކުގެ ތެރެއަށް ނަޖިސް ބޭރުވުމުގެ މައްސަލަތައް ރިޕޯޓުކޮށްފައިވާކަމަށް އެން.ޑީ.އެމް.އޭއިން ވިދާޅުވެއެވެ. މިގޭބިސީތަކަށް ބޭނުންވާ އެހީތެރިކަން ފޯރުކޮށްދީފައިވާކަމަށް އެން.ޑީ.އެމް.އޭއިން ވިދާޅުވެއެވެ.
މާލެއަށް ކުރި ވިއްސާރައިގެ ސަބަބުން ޢާއްމުންނަށް އެކިވަރުގެ ގެއްލުންތައް ވަމުންދިޔުމާއި ގުޅިގެން އެން.ޑީ.އެމް.އޭއިންވަނީ އެމަރޖެންސީ އޮޕަރޭޝަންގެ މަސައްކަތް ފަށާފައިކަމަށް އެއޮތޯރިޓީއިން ވިދާޅުވެއެވެ.
މިއޮޕަރޭޝަންގެ ތެރެއިން ފެން ބޮޑުވި ސަރަޙައްދުތަކުގައި އެން.ޑީ.އެމް.އޭއިންވަނީ ވެލިބަސްތާ ޖެހުމުގެ މަސައްކަތް މާލެ ސިޓީ ކައުންސިލާއި ގުޅިގެން ކޮށްފައެވެ. މާލެއަށް މިއަދުކުރި ވިއްސާރައިގައި 88 މިލިމީޓަރުގެ ވާރޭ ވެހިފައިވާކަމަށް މޫސުމާއި ބެހޭ ޤައުމީ އިދާރާއިން ހާމަކުރެއެވެ. މާލެއަށް ވާރޭވެހި ފެންބޮޑުވުމުގެ ސަބަބުން ފެން ހިންދުމުގެ މަސައްކަތް ސަލާމަތީ ބާރުތަކުންވަނީ ކޮށްފައެވެ.