މަރޗްމަހުގެ 23ވާ ބުރާސްފަތި ދުވަހަކީ މިއަހަރުގެ ރަމަޟާންމަހުގެ ފުރަތަމަ ދުވަސްކަމުގައި އިސްލާމިކް މިނިސްޓްރީއިން ކަނޑައަޅައިފިއެވެ.
ބުރާސްފަތި ދުވަހަކީ މިއަހަރުގެ ރަމަޟާންމަހުގެ ފުރަތަމަ ދުވަސްކަމުގައި ކަނޑައަޅާފައިވަނީ އިސްލާމިކް މިނިސްޓްރީން ބޭއްވި ހަނދު ސާބިތުކުރުމުގެ ރަސްމިއްޔާތުގައި އިއްވެވި ބަޔާނުގައެވެ.
ހަނދާބެހޭ ގޮތުން ނިންމި ގޮތުގެ ބަޔާން އިއްވަވައިދެއްވީ މިނިސްޓަރ އޮފް އިސްލާމިކް އެފެއާޒް ޑރ.އަހުމަދު ޒާހިރު އަލީއެވެ.
ބަޔާން އިއްވަވަމުން މިނިސްޓަރ ވިދާޅުވި 21 މަރޗްވީ އަންގާރަ ދުވަހު ރާއްޖޭގެ އެއްވެސް ހިސާބަކަށާއި އިސްލާމީ ގިނަ ޤައުމުތަކަށްވެސް 1444 ވަނަ އަހަރުގެ ރަމަޟާންމަހުގެ ހަނދު ފެންމަތިވެފައި ނުހުންނާނޭ ކަމަށް އިތުބާރު ހުރި ފަލަކީ ހިސާބުން ކަށަވަރުވާތީ އާއި ދުނިޔޭގެ އެއްވެސް އިސްލާމީ ޤައުމަކަށް މިއަހަރުގެ ރަމަޟާންމަހުގެ ހަނދު ސާބިތުވެފައިވާ ކަމުގެ ރަސްމީ މަޢުލޫމާތެއް ލިބިފައި ނުވާތީ ރަމަޟާންމަހާއި ޝައްވާލު މަހުގެ ހަނދު ސާބިތުކުރަން ދިވެހިރާއްޖޭގައި އަމަލުކުރުމަށް ހަމަޖެހިފައިވާ އުސޫލުގައިވާ ގޮތުގެ މަތިން 22 މަރޗްވާ ބުދަދުވަހަކީ 1444 ވަނަ އަހަރުގެ ޝައުބާން މަހުގެ 30 ވަނަ ދުވަސް ކަމަށާއި މިހަރުގެ ރަމަޟާން މަހުގެ ފުރަތަމަ ދުވަހަކީ 23 މަރޗްވާ ބުރާސްފަތިދުވަސް ކަނޑައަޅުއްވާ ކަމަށެވެ.
މިނިސްޓަރުގެ ބަޔާނުގައިވަނީ ރަމަޟާން މަހުގެ ރޯދައިގެ ފަރުޟު އަދާކުރުމަށް ފަރުވާތެރިވުމަށާޢި މާތްﷲގެ ރުއްސެވުމާއި މަޣުފިރަތަށް އެދި ހެޔޮއަމަލު ގިނަ ކުރުމަށް ރާއްޖޭގެ ރައްޔިތުންނަށް ނަސޭހަތްތެރިވެ ވަޑައިގަންނަވާފައެވެ.