ދުބާއީގައި ކުރިއަށްދިޔަ ޑައިވް މެނާ އެކްސްޕޯގައި ރާއްޖޭގެ ލިވަބޯޑްތަކާއި ޑައިވް އިންޑަސްޓްރީ ޕްރޮމޯޓްކޮށްފިއެވެ. މިއިވެންޓްގައި ރާއްޖެ ޕްރޮމޯޓްކުރުމަށް އެމްއެމްޕީއާރުސީން ވަނީ ނޭޝަނަލް ބޯޓިންގ އެސޯސިއޭޝަން އޮފް މޯލްޑިވްސް ސްޕޮންސަރކޮށްފައެވެ.
ޑައިވް މެނާ އެކްސްޕޯއަކީ 2008 ވަނަ އަހަރުން ފެށިގެން މިސަރަހައްދުގައި ބާއްވާ މުހިންމު ޑައިވް އިވެންޓްތަކުގެ ތެރެއިން އެއް އިވެންޓެވެ. 5 ދުވަހުގެ މުއްދަތަށް ކުރިއަށްދިޔަ މި އިވެންޓްގައި އުފެއްދުންތެރިންނާއި ސަޕްލައިކުރާ ފަރާތްތަކާއި ޑައިވް އަދި ލިވަބޯޑުގެ ތަޖުރިބާތައް ހޯދަން ބޭނުންވާ ކަސްޓަމަރުން ބައިވެރިވެއެވެ.
އެމްއެމްޕީއާރުސީން ޑައިވް މެނާ އެކްސްޕޯ 2023 އަށް އެންބީއޭއެމް ސްޕޮންސަރ ކޮށްފައިވަނީ ރާއްޖޭގެ ޑައިވް އަދި ލިވަބޯޑު އިންޑަސްޓްރީގެ ޚިދުމަތްދޭ ފަރާތްތަކުން އެ ފަރާތްތަކުގެ އުފެއްދުންތަކާއި ޚިދުމަތްތައް ދުނިޔޭގައި އިޝްތިހާރުކުރުމަށްޓަކައެވެ.
މި އިވެންޓަކީ ރާއްޖޭގެ ލިވަބޯޑްތައް އިޝްތިހާރުކޮށް ޕްރޮމޯޓްކުރުމަށާއި ރާއްޖޭގައި ފަތުރުވެރިންނަށް ބައިވެރިވެވޭނެ ތަފާތު ޑައިވް އެކްސްޕީރިއަންސްތައް ކިޔައިދީ، ބްރޭންޑް އެވެއަރނަސް އިތުރުކުރުމަށް ބާއްވާ އިވެންޓެކެވެ. މި ހަރަކާތުން އެންބީއޭއެމްގެ މެމްބަރުންނަށް އެމީހުންގެ އުފެއްދުންތަކާއި ޚިދުމަތްތައް ޕްރޮމޯޓް ކުރުމަށް ސީދާ މަގެއް އުފެއްދުމަށް އެހީތެރިވެދޭނެއެވެ.
މެދުއިރުމައްޗަކީ ރާއްޖެއަށް މުހިންމު މާކެޓްތަކެއް ހިމެނޭ ސަރަހައްދަކަށެވެ. މިގޮތުން މިދިޔަ 2022 ވަނަ އަހަރު ރާއްޖެއަށް މި މާކެޓުގެ ޤައުމުތަކުން ވަނީ 1،675،303 އަށް ވުރެ ގިނަ ފަތުރުވެރިން ޒިޔާރަތްކޮށްފައެވެ. މި މާކެޓުގައި ރާއްޖޭގެ މަޤުބޫލުކަން ދަމަހައްޓާ އިތުރުކުރުމަށް އެމްއެމްޕީއާރުސީން ދަނީ ގިނަ މަސައްކަތްތަކެއް ކުރަމުންނެވެ. މިގޮތުން، މިހާރު ކުރިއަށްދާ ހަރަކާތްތަކުގެ ތެރޭގައި ކޮޒްމޯ ޓްރެވަލް ކެމްޕޭނާއި އެމިރޭޓްސް އޭޖެންޓްސް އިންސެންޓިވް ކެމްޕޭން ފާހަގަކޮށްލެވެއެވެ.
މި އަހަރަށް އެމްއެމްޕީއާރުސީން މެދުއިރުމަތީގެ ގައުމުތަކަށް އިތުރު ހަރަކާތްތަކެއް ކުރިއަށް ގެންދިއުމަށް ރާވާފައިވާއިރު، އޭގެ ތެރޭގައި މީޑިއާ ފެމިލިއަރައިޒޭޝަން ދަތުރުތަކާއި ޕްރިންޓް އެޑްވަޓައިޒްމަންޓްތަކާއި ޓުއަރ އޮޕަރޭޓަރުންނާއެކު ހިންގާ ކެމްޕޭންތަކުގެ އިތުރުން، އައުޓްޑޯ ކެންޕެއިންތައް ހިމެނެއެވެ.