"ހައުސިންގ"ގެ ނަމުގައި އެސްއެމްއެސްއާއި ކޯލުތަކެއްގެ އިތުރުން އޮންލައިން ޕޭޖުތަކުން އޮޅުވާލައިގެން ފައިސާ ހޯދަން މަސައްކަތްކުރަމުންދާތީ ބެންކް އޮފް މޯލްޑިވްސް، ބީއެމްއެލްއިން ސަމާލުވާން އިލްތިމާސްކޮށްފިއެވެ.
ބީއެމްއެލްއިން ބުނީ މިދުވަސްވަރު ހައުސިންގެ ނަމުގައި ފޯނުކޯލާއި އެސްއެމްއެސް މެދުވެރިކޮށް އޮޅުވާލައިގެން ކަސްޓަމަރުންގެ މައުލޫމާތު ހޯދުމަށް މަސައްކަތް ކުރަމުން އަންނަ ކަމަށެވެ. އަދި މިފަދަ ބައެއް ކޯލްތަކުގައި އެދޭ މައުލޫމާތު ދީގެން ބައެއް ކަސްޓަމަރުން އަތުން ފައިސާ ހޯދާފައިވާކަމުގެ ޝަކުވާވެސް ބޭންކް އޮފް މޯލްޑިވްސްއަށް ލިބެމުންދާކަމަށް އެބޭންކުން ހާމަކުރެއެވެ.
މިކަމާއި ބެހޭ ގޮތުން ބީއެމްއެލްގެ ޕަބްލިކް ރިލޭޝަންސް މެނޭޖަރު މުހައްމަދު ސައީދު ވަނީ ކާކުކަން ނޭގޭ ފަރާތްތަކާއެކު ފައިސާގެ މުއާމަލާތް ނުކުރުމަށް އިލްތިމާސްކުރައްވާފައެވެ.
" މިހަފްތާގައި ހުށަހެޅިފައިވާ މައްސަލަތަކަށް ބަލާއިރު ފޭސްބުކް ޕޭޖްތަކުން މުދާ ގަތުމަށް ފައިސާ ދެއްކުމުން އެ މުދަލެއް ނުދީ، ފައިސާ ފޮނުވި ފަރާތް ބްލޮކްކޮށް އިތުރު އެއްވެސް މުއާމަލާތެއް ނުކުރާ ކަމުގެ ޝަކުވާ ލިބޭ. މިކަން ހިނގާގޮތަށް ބަލާއިރު ފައިސާ ފޮނުވާ ފަރާތަށް އެ ޕޭޖާ ގުޅޭ އިތުރު އެއްވެސް މައުލޫމާތެއް ނުހުރޭ. އެހެންކަމުން ކާކުކަން ނޭގޭ ފަރާތްތަކާއެކު ފައިސާގެ މުއާމަލާތް ނުކުރުމަށް އިލްތިމާސްކުރަން." ސައީދު ވިދާޅުވިއެވެ.
ބީއެމްއެލްއިން ބުނީ މި ދުވަސްވަރު ފްލެޓެއް ލިބިފައިވާ ކަމަށް ބުނެ އެކި އިދާރާތަކުގެ ނަމުގައި އޮޅުވާލައިގެން ކަސްޓަމަރުންނަށް ގުޅަމުންދާ ކަމަށެވެ. އަދި ކާކުކަން ނޭގޭ ފަރާތްތަކާއެކު ޑޮލަރުގެ މުއާމަލާތްކޮށްގެން ފައިސާ ނުލިބޭކަމުގެ ޝަކުވާވެސް އެބޭންކުގެ ކަސްޓަމަރުން ހުށަހަޅަމުން އަންނަ ކަމަށް ބޭންކުން ހާމަކުރެއެވެ.
އެކި ނަންނަމުގައި ގުޅައިގެން، ޒާތީ މައުލޫމާތު ހޯދާ ފައިސާ ފޭރެމުންދާތީ އެފަދަ މައުލޫމާތު ހިއްސާ ނުކުރުމަށް ބޭންކް އޮފް މޯލްޑިވްސްއިން ތަކުރާރުކޮށް ދަނީ އެދެމުންނެވެ.