ރާއްޖެއާއި ސަޢުދީ ޢަރަބިއްޔާއާއި ގުޅިގެން ފަތުރުވެރިކަން ކުރިއެރުވުމަށް މަޝްވަރާކުރައްވައިފިއެވެ.
މި މަޝްވަރާތައް ބާއްވާފައިވަނީ ސަޢުދީ އަރަބިއްޔާގެ ޓޫރިޒަމް މިނިސްޓަރ އަހްމަދު އަލް ޚަތީބުއާއެކު ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހް ބޭއްވެވި މަޝްވަރާގައެވެ.
މި މަޝްވަރާ ބައްދަލުވުން ކުރިއަށްދިޔައީ ޖަރުމަނުވިލާތުގެ ބަރލިންގައި ކުރިއަށްދިޔަ އިންޓަރނޭޝަނަލް ޓޫރިޒަމް ބޯސޭ، އައި.ޓީ.ބީ ފެއަރގައެވެ.
އިންޓަނޭޝަނަލް ޓުއަރިޒަމް އެކްސްޗޭންޖް، އައި.ޓީ.ބީއަކީ ދުނިޔޭގައި ބާއްވާ އެންމެ ބޮޑު ޓުއަރިޒަމް ފެއަރއެވެ. މިފެއަރއަށް ރައީސުލްޖުމްހޫރިއްޔާ ޒިޔާރަތްކުރައްވާ، އެމަނިކުފާނު ވަނީ ސަޢުދީ އަރަބިއްޔާގެ ސްޓޭންޑަށްވެސް ޒިޔާރަތްކޮށްފައެވެ. އަދި އެމަނިކުފާނު ވަނީ ސަޢުދީ އަރަބިއްޔާގެ ޓޫރިޒަމް މިނިސްޓަރ އަހްމަދު އަލް ޚަތީބުއާ ބައްދަލުކުރައްވާފައެވެ.
މި ބައްދަލުވުމުގައި ރައީސް އިބްރާހިމް މުހައްމަދު ޞާލިހް ވަނީ ރާއްޖެއާއި ސަޢުދީ ޢަރަބިއްޔާއިން ގުޅިގެން ފަތުރުވެރިކަން ކުރިއެރުވޭނެ ގޮތްތަކާމެދު މަޝްވަރާކުރައްވާފައެވެ.
سعدت باستقبال فخامة رئيس جمهورية المالديف إبراهيم محمد صَليح والترحيب به في جناح @VisitSaudi على هامش ملتقى #ITBBerlin ، تباحثنا مع فخامته سبل تعزيز التعاون بين البلدين الصديقين ومنها المشاريع التنموية و السياحة المستدامة. pic.twitter.com/wKoep22lvB
— Ahmed Al Khateeb أحمد الخطيب (@AhmedAlKhateeb) March 9, 2023
މި މަޝްވަރާ ބައްދަލުވުންތަކާއި ބެހޭގޮތުން ސަޢުދީ ޢަރައްބިއްޔާގެ ޓޫރިޒަމް މިނިސްޓަރ އަހްމަދު އަލް ޚަތީބު ވިދާޅުވީ، ރައީސް އިބްރާހިމް މުޙައްމަދު ޞާލިޙާއި ބައްދަލުކުރެއްވުމުގެ ފުރުޞަތު ލިބިވަޑައިގަތުމުން އުފާކުރައްވާކަމަށެވެ. އަދި ދެ ޤައުމުން ގުޅިގެން ތަރައްޤީގެ މަޝްރޫއުތަކާއި، ދެމެހެއްޓެނިވި ގޮތެއްގައި ފަތުރުވެރިކަމުގެ ދާއިރާ ކުރިއެރުވުމަށް މަސައްކަތްކުރެވޭނެ ގޮތްތަކާއިމެދު މަޝްވަރާކުރެއްވިކަމަށް އަހްމަދު އަލް ޚަތީބު ވިދާޅުވިއެވެ.
އައި.ޓީ.ބީ ފެއަރ ބޭއްވުމުގެ މަޤުސަދަކީ، އެކި ޤައުމުތަކުން ފަތުރުވެރިކަމުގެ ދާއިރާގައި ހަރަކާތްތެރިވާ ފަރާތްތައް އެއް ތަނަކުން ބައްދަލުވެ، ވިޔަފާރި މަރކެޓް ކުރުމުގެ ފުރުޞަތު ފަހިކޮށްދިނުމެވެ. މި ފެއަރގައި ރާއްޖޭގެ ފަރާތުން އިސްކޮށް ހަރަކާތްތެރިވަނީ މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން، އެމް.އެމް.ޕީ.އާރް.ސީންނެވެ.