އިންޑޮނީޝިޔާގެ ނަތޫނާ ސަރަޙައްދުގެ ރަށެއް ކަމުގައިވާ ސެރާސަންގައި ހިނގި ނުރައްކާތެރި ބިންގަނޑު ކަނޑައިގެން ދިޔުމުގެ ހާދިސާއެއްގައި 15 މީހުން މަރުވެއްޖެވެ. އެ ޤައުމުގައި ވަކިން އޮންނަ އެ ރަށުގައި ހިނގި މި ހާދިސާގައި ފޭބި ކިސަޑުތަކުގެ ދަށުގެ ގިނަ ޢަދަދެއްގެ ބަޔަކު ގެއްލިފައިވާ ކަމުގައި އޮފިޝަލުން ވިދާޅުވެއެވެ. އެ މީހުން ހޯދުމަށް އޮފިޝަލުން ދަނީ މަސައްކަތް ކުރަމުންނެވެ.
ސެރާސަންއަކީ 8,000 މީހުންގެ އާބާދީއެއް އޮންނަ ރަށެކެވެ. ބޯކޮށް ވާރޭވެހުމުގެ ސަބަބުން އެ ރަށުގައި ހިނގި ބިންގަނޑު ކަނޑައިގެން ދިޔުމުގެ ހާދިސާގައި، އެ ރަށުން މުވާސަލާތީ ޚިދުމަތްތައް ވަނީ ކެނޑިފައެވެ. އަދި، ހުއްޓުމެއްނެތި ބޯކޮށް ވާރޭވެހުމުގެ ސަބަބުން، ކިސަޑުތަކުގެ ދަށުވެފައިވާ ކަމަށް ބެލެވޭ މީހުން ހޯދައި، އެ މީހުން ސަލާމަތް ކުރުމަށް ކުރަމުންދާ މަސައްކަތްތަކަށް ވަނީ ހުރަސްއެޅިފައެވެ.
މި ހާދިސާގައި އެ ރަށުގެ ގިނަ ޢަދަދެއްގެ ޢިމާރާތްތަކާއި މަގުތަކަށް ވަނީ ބޮޑެތި ގެއްލުންތަކެއް ލިބިފައެވެ. އަދި، ބައެއް ސަރަޙައްދުތަކުގައި ގިނަ ޢަދަދެއްގެ ގަސްގަހާގެހި ވެއްޓިފައިވާއިރު، ބޯ ވިއްސާރައާއެކު ޖެހެމުންދިޔަ ބާރު ވައިގެ ސަބަބުން ގިނަ ޢަދަދެއްގެ ޢިމާރާތުގެ ފުރާޅު ވަނީ އެއްލައިލާފައެވެ.
އިންޑޮނީޝިޔާގެ ކާރިސާތަކާ ބެހޭ އިދާޜާ (ބީ.އެން.ޕީ.ބީ)ގެ ތަރުޖަމާނު ޢަބްދުލް މުހާރީ ވިދާޅުވީ، މިހާތަނަށް 15 މީހެއްގެ ހަށިގަނޑު ފެނިފައިވާ ކަމަށާއި، އެ މީހުންގެ ޖަނާޒާ ބޭއްވުމުގެ އިންތިޒާމުތައް ހަމަޖެއްސުމަށް މަސައްކަތް ކުރަމުންދާ ކަމުގައެވެ. ނަމަވެސް، ބައެއް މީހުންގެ ހަށިތައް އަދި މިހާތަނަށް ދެނެގަނެވިފައި ނުވާ ކަމަށް ވެސް އޭނާ ވިދާޅުވިއެވެ.
ބިންގަނޑު ކަނޑައިގެން ގޮސް ކިސަޑު ފޭބުމުގެ ހާދިސާގައި ކިސަޑުތަކާއި ޢިމާރާތްތަކުގެ ދަށުވެ 42 މީހުން ގެއްލިފައިވާ ކަމަށް ބެލެވޭ ކަމުގައި ވެސް މުހާރީ ވިދާޅުވިއެވެ. އަދި، ކުރިން ބައެއް މީހުން ފެނިފައިވާ ކަމަށާއި، އޭގެ ތެރެއިން ބައެއް މީހުން ވަރަށް ބޮޑަށް ޒަޚަމުވެ، ހޮސްޕިޓަލުގައި ފަރުވާދޭން ޖެހިފައިވާ ކަމުގައި ވެސް އޭނާ ވިދާޅުވިއެވެ. އޭގެ ތެރެއިން ހަތަރު މީހެއްގެ ހާލު ސީރިޔަސް ކަމުގައި ޞިއްޙީ އޮފިޝަލުން ވިދާޅުވެއެވެ.
މި ހާދިސާގައި 30 ގެއެއް ކިސަޑުތަކުގެ ދަށުވެފައިވާ ކަމަށް ބެލެވޭ ކަމުގައި އޮފިޝަލުން ވިދާޅުވެއެވެ. މި ހާދިސާގައި މަގުމަތިވެ ހާލުގައި ޖެހިފައިވާ މީހުންނަށް އިންސާނީ އެހީތެރިކަން ފޯރުކޮށްދޭން މަސައްކަތް ކުރަމުންދާއިރު، އެ މީހުން ވަގުތީ ހިޔާވަހިކަން ފޯރުކޮށްދިނުމަށް ޓެންޓާއި ކާބޯތަކެތި ފޯރުކޮށްދެމުންދާ ކަމުގައި އޮފިޝަލުން ވިދާޅުވެއެވެ.
އިންޑޮނީޝިޔާގެ ސަރަޙައްދުތަކަށް ކުރަމުންދާ ވިއްސާރައިގައި، ބޯނިޔޯގައިވާ ބަންޖަރު ޑިސްޓްރިކްޓުގައި ވަނީ ފެންބޮޑުވެފައެވެ. ފެންބޮޑުވުމުގެ ސަބަބުން 17,000 އަށްވުރެ ގިނަ ގެއަށް ވަނީ ގެއްލުން ލިބިފައެވެ. އިންޑޮނީޝިޔާއާ އިންވެގެން އޮތް މެލޭޝިޔާއަށް ވެސް ދަނީ ފެންބޮޑުވުމުގެ އަސަރު ކޮށްފައެވެ.
ފެންބޮޑުވުމާ ގުޅިގެން މެލޭޝިޔާގައި ހިނގާފައިވާ އެކި ހާދިސާތަކުގައި ހަތަރު މީހުން މަރުވެފައިވާއިރު، 41,000 އަށްވުރެ ގިނަ މީހުން ވަނީ ރައްކާތެރި ހިސާބުތަކަށް ބަދަލުކޮށްފައެވެ. ފަހުގެ ތާރީޚެއްގައި އިންޑޮނީޝިޔާއަށް ކުރިމަތިވި އެންމެ ނުރައްކާތެރި ފެންބޮޑުވުމުގެ ހާދިސާ ހިނގާފައި ވަނީ 2020 ވަނަ އަހަރުއެވެ. އެ އަހަރު ފެންބޮޑުވުމާ ގުޅިގެން ހިނގި އެކި ހާދިސާތަކުގައި 67 މީހުން މަރުވިއެވެ.