މިދިޔަ ހުކުރު ދުވަހުގެރޭ މާލޭ ފިހާރައެއްގެ ތެރެއަށް ވަދެ ވަޅިން ހަމަލާދީ ޒަޚަމްކޮށްލި ޒުވާނާ ނިޔާވެއްޖެއެވެ.
ވަޅިން ހަމަލާދީ ޒަހަމްކޮށްލި ޒުވާނާއަށް ވަނީ ބޮޑެތި ޒަޚަމްތަކެއް ވެފައެވެ. އޭނާ ހޮސްޕިޓަލަށް ގެންދިޔަތާ ގިނަ އިރުތަކެއް ނުވަނީވެސް ފަރުވާދޭން ފަށާފައިވަނީ ވެންޓިލޭޓަރުގައެވެ.
އައިޖީއެމްއެޗްގެ މީޑިއާ އޮފިޝަލް ވިދާޅުވީ އޭނާއަށް ފަރުވާ ދެމުން ދަނިކޮށް މިއަދު ހެނދުނު 6:45 ގައި ނިޔާވެފައިވާކަމަށެވެ. މާލޭގެ މާފަންނު ބީޖީ ގަރާޖު ކައިރީގައި ހުރި ފިހާރައަކަށްވަދެ ހިންގި މާރާމާރީގައި ޒަޚަމްކޮށްލާފައިވަނީ އުމުރުން 30 އަހަރުގެ ދިވެހި ފިރިހެނަކަށް ކަމަށް ފުލުހުން ވިދާޅުވެފައިއެވެ.
ވަޅިން އޭނާއަށް ހަމަލާދިން މައްސަލާގައި 20 އަހަރުގެ ދިވެހި ފިރިހެނެއް ހައްޔަރުކޮށްފައިވާކަމަށް ފުލުހުން ވިދާޅުވެފައިވެއެވެ. މިމައްސަލަ ފުލުހުން ދަނީ ތަހުގީގް ކުރަމުންނެވެ.
މާލޭގައި ފަހަކަށް އައިސް ހިނގާފައިވާ މާރާމާރިތަކަކީ ގޭންގުތަކެއްގެ މެދުގައި ހިނގަމުން އަންނަ މާރާމާރިތަކެއްކަމަށް ފުލުހުން ވިދާޅުވެފައިވެއެވެ.