ޖަލުތަކުގައި ހިނގާފައިވާ އަނިޔާތަކާ ގުޅޭ އަޑުއެހުންތައް ފަށައިފި

ރާއްޖޭގެ ޖަލުތަކުގައި ލާއިންސާނީ ދަށު ދަރަޖައިގެ ޢަމަލުތައް ހިންގާ އަނިޔާތައް ކޮށްފައިވާ ކަމަށް ބުނެ ހުށައަޅާފައިވާ މައްސަލަތަކާއި ގުޅިގެން އިންތިޤާލީ އިންސާފުގެ އޮމްބަޑްސްޕަރސަންގެ އޮފީހުން ޢާންމުކޮށް ހުޅުވާނުލައި ކުރިއަށްގެންދާ އަޑުއެހުންތައް މިއަދު ފަށައިފިއެވެ.

އެއޮފީހުން އަޑުއެހުންތައް ކުރިއަށް ގެންދަނީ 01 ޖަނަވަރީ 1953 އިން ފެށިގެން 17 ނޮވެންބަރު 2018ގެ ނިޔަލަށް ދިވެހިރާއްޖޭގެ ޖަލުތަކުގައި ހިނގާފައިވާ ކަމަށް ބުނެ ހުށައަޅާފައިވާ އިންސާނީ ޙައްޤުތަކާ ޚިލާފު ޢަމަލުތަކާއި، ލާއިންސާނީ ދަށުދަރަޖައިގެ ޢަމަލުތަކާއި އަނިޔާތަކާ ބެހޭގޮތުންނެވެ.

އިންތިޤާލީ އިންސާފުގެ އޮމްބަޑްސްޕަރސަންގެ އޮފީހުން މިއަދުން ފެށިގެން އަންނަ މަހުގެ 4 ގެ ނިޔަލަށް ކ. މާފުށީ ޖަލުގައި ބާއްވާ މި އަޑުއެހުންތައް ފެށުމުގެ ރަސްމިއްޔާތުގައި ވާހަކަދައްކަވަމުން ޗީފް އޮމްބަޑްސްޕަރސަން، އަލްއުސްތާޛް ޢަބްދުއްސަލާމް ޢާރިފް ވިދާޅުވީ މި އަޑުއެހުންތައް ބޭއްވުމުގެ މައިގަނޑު މަޤްޞަދުތަކަކީ، އަނިޔާ ލިބިފައިވާ ފަރާތްތަކުގެ ވާހަކަތައް ޢާންމުކޮށް ހާމަކުރުމާއި، އަނިޔާ ލިބިފައިވާ ފަރާތްތަކަށް އިންސާފު ހޯދައިދިނުމަށް ކަމާބެހޭ އިދާރާތަކަށް ބާރުއެޅުންކަމަށެވެ.

އަދި މާޒީގައި ހިނގާފައިވާ އިންސާނީ ޙައްޤުތަކާއި އަސާސީ މިނިވަންކަމާއި ޚިލާފު މައްސަލަތަކުގެ ޙަޤީޤަތް ހާމަކުރުމާއި، މުޖުތަމަޢުގެ ޢާންމު މަޞްލަޙަތާއި ގުޅިފައިވާ މައްސަލަތަކުގެ މަޢުލޫމާތު ޢާންމުންނާ ހިއްސާކުރުމާއި، އިންސާނީ ޙައްޤުތަކާ ޚިލާފު ޢަމަލުތަކަށް ޢާންމުން ހޭލުންތެރިކުރުވުމުގެ އިތުރުން އޮފީހުން ތަޙުޤީޤުކުރާ މައްސަލަތަކަށް މަޢުލޫމާތު ހޯދުމަކީވެސް މިއަޑުއެހުންތައް ބޭއްވުމުގެ މަޤްސަދެކެވެ.

މިއަޑުއެހުންތައް ކުރިއަށްގެންދާނީ ދެ ދަންފަޅިއަކަށް ބަހާލައިގެންނެވެ. އެއީ ހެނދުނުގެ ދަންފަޅިއާއި މެންދުރުފަހުގެ ދަންފަޅިއެވެ. މިގޮތުން މިއަދުގެ އަޑުއެހުންތަކުގައި ހަތަރު ފަރާތެއްގެ ބަޔާން ވަނީ ނަގާފައެވެ. މި އަޑުއެހުންތަކުގެ ތެރެއިން އިންތިޤާލީ އިންސާފުގެ އޮމްބަޑްސްޕަރސަންގެ އޮފީހަށް ހުށައަޅާފައިވާ މައްސަލަތަކާ ގުޅިގެން އެއޮފީހުގެ އިޚްތިޞާޞްގެ މުއްދަތުގެ ތެރޭގައި ހައްޔަރުކޮށް ބަންދުކުރުމުގެ އެކި މަރުޙަލާތަކުގައި ނިޒާމީ ސިފައެއްގައި ރާވައިގެން ހިންގާފައިވާ ޢަމަލުތަކުގެ ސަބަބުން، އިންސާނީ ޙައްޤުތަކާއި އަސާސީ މިނިވަންކަން ނިގުޅައިގަނެފައިވޭތޯއާއި، އަނިޔާ ކުރުމުގެ ޢަމަލުތައް ހިނގާފައިވޭތޯއާއި، އެފަދަ ޢަމަލުތައް ހިނގާފައިވާ މިންވަރު ބަލާނެއެވެ.