މިދިޔަ ޑިސެމްބަރުމަހު ގުޅީފަޅުގައި އަލިފާނުގެ ޙާދިސާ ހިނގި އެފްކޮން ކުންފުނީގެ ސައިޓުން ފެނުނު ހަށިގަނޑަކީ އެތަނުން ގެއްލުނު މީހާގެ ހަށިގަނޑުކަމަށާއި ހަށިގަނޑު އެމީހާގެ ޤައުމަށް ފޮނުވާލާފައިވާކަމަށް ފުލުހުން ވިދާޅުވެއްޖެއެވެ.
ފުލުހުން ވިދާޅުވީ ގުޅީފަޅު އަލިފާނުގެ ހާދިސާ ހިނގި ތަނުން ފެނުނު އިންސާނެއްގެ ހަށިގަނޑަކީ އެތަނުން ގެއްލުނު މީހާގެ ހަށިގަނޑުކަމަށް ކަށަވަރުކޮށްފައިވާކަމަށެވެ. އަދި އެ ހަށިގަނޑު އާއިލާއަށް ހަވާލުކުރުމަށް މިހަފްތާގެ ތެރޭގައި އިންޑިއާއަށް ފޮނުވާފައިވާކަމަށް ފުލުހުން ވިދާޅުވެއެވެ.
މިދިޔަ ޑިސެމްބަރު މަހުގެ 15 ވަނަ ދުވަހުގެ ދަންވަރު ގުޅީފަޅުގައި އަލިފާނުގެ ހާދިސާ ހިނގީ، ގުޅީފަޅުގައި ހުރި ބިދޭސީންގެ އެކަމަޑޭޝަން ބްލޮކެއްގައެވެ. އެއީ ތިލަމާލެ ބްރިޖްގެ މަސައްކަތް ކުރާ އެފްކޮންސްގެ މުވައްޒަފުން ބައިތިއްބާފައި ތިބި އެކަމަޑޭޝަން ބްލޮކެކެވެ.
މި ޙާދިސާއާއި ގުޅިގެން 78 މީހަކަށް އެކިވަރުގެ އަނިޔާ ލިބިގެން ހޮސްޕިޓަލަށް ފަރުވާއަށް ގެންގޮސްފައިވެއެވެ.