އުތުރު ކޮރެޔާއިން ދާދިފަހުން ހެދި މިސައިލް ޓެސްޓުތަކާ ގުޅިގެން އ.ދ.އިން އެ ކުށްވެރި ކުރުމުން، އުތުރު ކޮރެޔާއިން އެ ކަމަށް ފާޑުކިޔައިފިއެވެ. ފާއިތުވި ތިން ދުވަހުގެ ތެރޭގައި އުތުރު ކޮރެޔާއިން ވަނީ ބެލިސްޓިކް މިސައިލް ޓެސްޓުތައް ތިން ފަހަރެއްގެ މަތިން ހަދައި، ސަރަޙައްދީ ހަމަޖެހުން ނަގައިލާފައެވެ.
ފެބްރުވަރީ 18 ވަނަ ދުވަހު އުތުރު ކޮރެޔާއިން އަޖުމަ ބަލާފައި ވަނީ އިންޓަރކޮންޓިނެންޓަލް ބެލިސްޓިސް މިސައިލް (އައި.ސީ.ބީ.އެމް)އެކެވެ. އެ މިސައިލް ވެއްޓިފައި ވަނީ ޖަޕާނުގެ ޚާއްޞަ އިޤުތިޞާދީ ސަރަޙައްދަށެވެ. މި ކަމާ ގުޅިގެން އ.ދ.އިން ވަނީ ކަންބޮޑުވުން ފާޅުކޮށް، މިސައިލް ޓެސްޓު ކުށްވެރިކޮށްފައެވެ. އަދި، ސެކްރެޓަރީ ޖެނެރަލް އެންޓޯނިޔޯ ގުތެރޭޝް ވަނީ ހަމަޖެހުން ނަގައިލުމަށް ހިންގާ މި ފަދަ އަމަލުތައް ވަގުތުން ހުއްޓައިލުމަށް އުތުރު ކޮރެޔާއަށް ގޮވައިލައްވާފައެވެ.
ގުތެރޭޝްގެ ބަޔާނަށް ފާޑުކިޔުމުގެ ގޮތުން އުތުރު ކޮރެޔާއިން ބުނީ ގުތެރޭޝްގެ ބަޔާނަކީ އިންސާފުވެރި ބަޔާނެއް ނޫން ކަމުގައެވެ. އަދި، އުތުރު ކޮރެޔާއަށް ލިބިގެންވާ އަމިއްލަ މިނިވަންކަމާއި ސިޔާދަތު ދިފާޢުކުރުމުގެ ހައްޤާ މެދު ގުތެރޭޝް ވިސްނަވާފައި ނުވާ ކަމުގައި ވެސް އުތުރު ކޮރެޔާއިން ވަނީ ތުހުމަތު ކޮށްފައެވެ.
"ގުތެރޭޝްގެ ބަޔާނާ މެދު ވަރަށް ބޮޑަށް ހިތްހަމަނުޖެހޭ. އަދި، ބޭއިންސާފުން ފުރިގެންވާ އެ ބަޔާން އެންމެ ހަރުކަށި އިބާރާތުން ކުށްވެރިކުރަން،" އުތުރު ކޮރެޔާގެ ޚާރިޖީ ވަޒީރުގެ ނައިބު ކިމް ސޮންގް ގްޔޮންގް ވިދާޅުވިއެވެ. އަދި، އެމެރިކާއާއި ދެކުނު ކޮރެޔާއިން ހިންގަމުންދާ "ނުރައްކާތެރި" އަސްކަރީ ތަމްރީނުތަކާ މެދު އ.ދ.އިން ފަރުވާލެއް ނުބަހައްޓާ ކަމުގައި ވެސް އޭނާ ތުހުމަތު ކުރެއްވިއެވެ.
އަދި، އިންސާފުވެރި ގޮތަކަށް ވާނީ، އެމެރިކާއާއި ދެކުނު ކޮރެޔާގެ އަސްކަރީ ތަމްރީނުތައް ވެސް ކުށްވެރުކުރުން ކަމަށާއި، އުތުރު ކޮރެޔާގެ މިސައިލް ޓެސްޓުތަކަކީ، އެ ތަމްރީނުތަކާ ވިދިގެން ހިންގަމުންދާ ޓެސްޓުތަކެއް ކަމުގައި އޭނާ ވިދާޅުވިއެވެ. އޭނާ އިޝާރާތް ކުރައްވާފައި ވަނީ، އެމެރިކާއާއި ދެކުނު ކޮރެޔާއިން ގުޅިގެން ބޮންއަޅާ މަތިންދާބޯޓުތައް ބޭނުންކޮށްގެން ދާދިފަހުން ހަދާފައިވާ އަސްކަރީ ތަމްރީނުތަކަށެވެ.
އުތުރު ކޮރެޔާގެ ޒައީމް ކިމް ޖޮންގް އުންގެ އަންހެން ކޮއްކޮ ކިމް ޔޯ ޖޮންގް ވެސް ދާދިފަހުން ވަނީ އެމެރިކާއާއި ދެކުނު ކޮރެޔާއިން ގުޅިގެން ހިންގަމުންދާ އަސްކަރީ ތަމްރީނުތަކުގެ މައްސަލަ އުތުރު ކޮރެޔާއިން ވަރަށް ގާތުން ބަލަމުންދާ ކަމަށް ވިދާޅުވެ، އެމެރިކާއިން އެ ސަރަޙައްދުގައި ބާރުގަދަ އަދި ނުރައްކާތެރި ހަތިޔާރު ގާއިމުކުރަން މަސައްކަތް ކުރަމުންދާ ކަމަށް ތުހުމަތު ކުރައްވާފައެވެ.
ކިމް ޔޯ ޖޮންގްއަކީ އުތުރު ކޮރެޔާގައި ވަރަށް ނުފޫޒާއި ބާރުގަދަ މީހެއް ކަމަށް މަސްރަޙު ދިރާސާކުރާ ފަރާތްތަކުން ޤަބޫލުކުރެއެވެ. އަދި، އެމެރިކާއާއި ދެކުނު ކޮރެޔާގެ އަމަލުތަކަށް ބަލައި، ޕެސިފިކް ކަނޑުގެ ސަރަޙައްދަކީ އުތުރު ކޮރެޔާގެ ހަތިޔާރު ޓެސްޓުކުރާ މައިދާނަކަށް ބަދަލުކޮށްލާނެ ކަމުގެ އިންޒާރު ވެސް އޭނާ ދެއްވިއެވެ.
އުތުރު ކޮރެޔާއިން ހަދާފައިވާ އައި.ސީ.ބީ.އެމް. ޓެސްޓާ ގުޅިގެން އެމެރިކާއާއި ދެކުނު ކޮރެޔާގެ އިތުރުން ޖަޕާނުން ވަނީ ޖަޕާނު ކަނޑުގެ ސަރަޙައްދަށް އަސްކަރީ މަނަވަރުތައް ފޮނުވައި، ތަމްރީނުތަކެއް ފަށާފައެވެ. މި ތަމްރީނުތަކުގައި މިސައިލް ހަމަލާތައް ދިފާޢުކުރުމުގެ ގާބިލިއްޔަތުކަން ލިބިފައިވާ މަނަވަރުތައް ދަނީ ބޭނުން ކުރަމުންނެވެ.
އުތުރު ކޮރެޔާއިން ހަދާފައިވާ އައި.ސީ.ބީ.އެމް. ޓެސްޓާ ގުޅިގެން ޖަޕާނުން ވަނީ ކަންބޮޑުވުން ފާޅުކޮށްފައެވެ. އަދި، އެއީ ބައިނަލްއަޤުވާމީ މުޖުތަމަޢުގެ ސުލްޙަމަސަލަސްކަން ނަގައިލަން ހިންގާފައިވާ އަމަލެއްގެ ގޮތުގައި ދެކޭ ކަމުގައި ޖަޕާނުން ބުނެފައިވެއެވެ.