ސިވިލް ކޯޓުގެ ޤާޟީ އާދަމް އިބްރާހިމް އިސްމާޢީލާއި ގުޅޭގޮތުން ޖުޑީޝަލް ސާރވިސް ކޮމިޝަން، ޖޭއެސްސީން ބެލި ސުލޫކީ މައްސަލަ ސާބިތުނުވާކަމަށް ކަނޑައަޅައިފިއެވެ.
ސިވިލް ކޯޓުގެ ޤާޟީ އާދަމް އިބްރާހިމް އިސްމާޢީލާއި ގުޅޭގޮތުން ޖޭއެސްސީ ބެލީ ފަނޑިޔާރުންގެ މަސްއޫލިއްޔަތު އަދާކުރުމުގައި ފަރުވާ ކުޑަކުރިކަމަށް ތުހުމަތުކުރެވޭ މައްސަލައެކެވެ. 2021 ޑިސެމްބަރު 13 ވަނަ ދުވަހު ބަލަން ފެށި އެ މައްސަލަ ސާބިތުނުވާކަމަށް ޖޭއެސްސީން ނިންމާފައިވަނީ މިމަހުގެ 15 ވަނަ ދުވަހުކަމަށް އެ ކޮމިޝަނުން ވިދާޅުވިއެވެ.
މީގެ އިތުރުން ފަނޑިޔާރުން އަމިއްލައަށް އެދިގެން މަސައްކަތް ކުރަމުންއައި ކޯޓާ އެއް ދަރަޖައެއްގެ އެހެން ކޯޓަކަށް ބަދަލުކުރުމުގައި ޢަމަލުކުރާނެ ގޮތުގެ ގަވާއިދުގެ ދަށުން، ތ.ހިރިލަންދޫ މެޖިސްޓްރޭޓް ކޯޓުގެ އިސްމެޖިސްޓްރޭޓް އަލްއުސްތާޛު ޢަބްދުﷲ ޙުސައިން، ތ.ކިނބިދޫ މެޖިސްޓްރޭޓް ކޯޓުގެ އިސްމެޖިސްޓްރޭޓްގެ މަޤާމަށް ބަދަލުކުރުމަށް ނިންމާފައިވާކަމަށްވެސް ޖޭއެސްސީން މިއަދު ވިދާޅުވިއެވެ.