ރ. ފުއްގިރި ކުއްޔަށް ދޫކުރުމުގެ ޚިޔާނާތުގައި މައްސަލާގައި ދަޢުވާ ކޮށްފައިވާ ފަރާތްތަކުން އެދިފައިވާ ހެކި ރައްކާތެރިކުރުމުގެ ޢަމުރުތައް ނެރެނުދިނުމަށް ނިންމައިފިއެވެ.
ފުއްގިރީގެ މައްސަލައިގައި ދައުލަތުން ރައީސް ޔާމީންގެ މައްޗަށް އުފުލާފައިވަނީ ރިޝްވަތު ޤަބޫލުކުރުމާއި މަނީ ލޯންޑަރިންގގެ ދައުވާއެވެ. އެގޮތުން ރިސޯޓެއްގެ ގޮތުގައި ރ. ފުއްގިރި ތަރައްޤީކުރަން ކުއްޔަށް ދޫކުރުމުގެ މުޢާމަލާތުގައި މަޤާމުގެ ނުފޫޒު ބޭނުން ކުރައްވައި 1.1 މިލިއަން ޑޮލަރު ހޯއްދަވާފައިވާކަމަށް ދަޢުލަތުން ތުހުމަތުކުރެއެވެ. މި މައްސަޅާގައި ރައީސް ޔާމީންގެ އިތުރުން މއ.ކުރިކީލަހިޔާ އަޙްމަދު ކްރިކް ރިޒާއާއި، ސަން ކޮންސްޓްރަކްޝަން އިންޖިނިއަރިން ޕްރައިވެޓް ލިމިޓެޑާއި، ސަން އިންވެސްޓްމެންޓް ޕްރައިވެޓް ލިމިޓެޑް ބޭނުންކޮށް އެ ފައިސާ ލޯންޑަކުރުމަށް ފަށަލަކޮށްފައިވާކަމަށް ތުޙުމަތުކޮށްފައިވެއެވެ.
މި މައްސަލާގައި ކްރިކް ރިޒާ އަދި ސަންގެ ދެކުންފުނީގެ ފަރާތުންވެސް ހެކި ރައްކާތެރިކޮށްދިނުމުގެ ޢަމުރަކަށް އެދިފައިވެއެވެ. މި މައްސަލާގައި މިއަދު ބޭއްވި އަޑުއެހުމުގައި ހެކި ރައްކާތެރިކުރަންވީ އަދި ދައުލަތަށް ސިއްރުކުރަންވީ ސަބަބެއް ކިޔައިދެވިފައިނުވާކަމަށް މައްސަލަ ބައްލަވާ ޤާޟީ ޢަލީ ނަދީމް ވިދާޅުވިއެވެ.
ކްރިކް ރިޒާގެ ފަރާތުން ހެކި ރައްކާތެރިކޮށްދިނުމުގެ ޢަމުރަކަށް އެދިފައިވަނީ، ތަހްގީގުގެ ބޭރުން ކުރީގެ އެސިސްޓަންޓް ކޮމިޝަނަރ އޮފް ޕޮލިސް މުޙައްމަދު ރިޔާޒާއި ކްރިކް ރިޒާއާއި ބައްދަލުކޮށް ދައްކާފައިވާ ވާހަކަތައް ހިމެނޭ އޯޑިއޯއެއް ސިއްރުކޮށްދިނުމަށެވެ.
މީގެއިތުރުން ސަން ކުންފުނިން އެދިފައިވަނީ އެތެރޭގެ ތަހްގީގަކަށް އެކުންފުނީގެ ވެރިޔާ ދ.މީދޫ ދާއިރާގެ މެންބަރު އަޙްމަދު ސިޔާމް މުޙައްމަދު ދިން ބަޔާނަކާއި، އެކުންފުނީގެ ބައެއް ބިދޭސީންނާއި ޑިރެކްޓަރުންގެ ބޯޑުގެ ބައެއް ޤަރާރުތަކަށް އެ ޢަމުރު ނެރެދިނުމަށެވެ.
މީގެ އިތުރުން ދައުލަތުންވެސް ހެކި ރައްކާތެރިކޮށްދިނުމުގެ ޢަމުރަކަށް އެދިފައިވެއެވެ. ނަމަވެސް އެ ޢަމުރު ނެރެދިނުމުގެ ބަދަލުގައި މައްސަލަ ބައްލަވާ ޤާޟީ ނިންމެވީ ޒާތީ މަޢުލޫމާތާއި، ތަހްގީގަށް ހުރަސްއެޅޭފަދަ މަޢުލުމާތުތައް އުނިކުރުމަށްފަހު ދިފާޢުތަށް ދޫކުރުމަށެވެ.
މިއަދުގެ އަޑުއެހުމުގައި ޤާޟި ވަނީ އިފްތިތާހީ ބަޔާން އިއްވުމާއި ދައުލަތުން ހުށައެޅި ހެކިވެރިންގެ ބަސް ނަގާނެ ދުވަސް ހިމެނޭ ތައާވަލެއް ދެއްވާފައެވެ. އެގޮތުން އިފްތިތާހީ އަޑުއެހުމުގެ 3 އަޑުއެހުމެއް ބާއްވަން ޤާޟީ ނިންމަވާފައިވެއެވެ. ދައުލަތް އަދި ސަންގެ ދެ ކުންފުނީގެ އިފްތިތާހީ އަޑުއެހުން ތައާވަލުކޮށްފައިވަނީ މާޗް 9 ވަނަ ދުވަހަށެވެ. އަދި ކްރިކް ރިޒާގެ ބަޔާން އިއްވުމުގެ އަޑުއެހުން ބާއްވަން ތަޢާވަލުކޮށްފައިވަނީ މާޗް 12އަށެވެ. އަދި ރައީސް ޔާމީންގެ ބަޔާން އިއްވުން މާޗް 13އަށް ތަޢާވަލުކޮށްފައިވެއެވެ. އެއަށްފަހު، މާޗު 16، 20، 22، 26، 27، 28، 29 އަދި 30 ގައި ޖެހިޖެހިގެން ހެކިބަސް ނެގުމުގެ އަޑުއެހުންތައް ބާއްވާނެކަމަށް ޤާޟީ ވިދާޅުވިއެވެ.
އިފްތިތާހީ ބަޔާނަކީ ޝަރީޢަތް ފެށުމުގެ ގޮތުން ހުރިހާ ޚަސްމުން އިއްވާ ބަޔާނެކެވެ.
ރ. ފުއްގިރީގެ މައްސަލައިގައި ރައީސް ޔާމީންގެ މައްޗަށް ދައުލަތުން ދަޢުވާ އުފުލާފައިވާއިރު، ވ. އާރަށުގެ މައްސަލައިގައި ދައުލަތުން ރައީސް ޔާމީންގެ މައްޗަށް އުފުލި ދެ ދައުވާއެއް ސާބިތުވުމާއި ގުޅިގެން އެމަނިކުފާނުގެ މައްޗަށް 11 އަހަރުގެ ޖަލު ހުކުމެއް މިދިޔަ ޑިސެމްބަރު މަހުގެ 25 ވަނަ ދުވަހު ކްރިމިނަލް ކޯޓުން ވަނީ އިއްވަވާފައެވެ. އަދި އެމަނިކުފާނު މިވަގުތު ހުންނެވީ ހުކުމް ތަންފީޒުކުރުމަށް ކ. މާފުށީ ޖަލުގައެވެ.
މިހާރު އުފުލާފައިވާ ދައުވާތައް ސާބިތުވެއްޖެ ނަމަ، މަދުވެގެން ފަސް އަހަރުގެ ޖަލު ހުކުމާއެކު، ޖޫރިމަނާގެ ހުކުމެއް އަންނާނެއެވެ.