މަގުމަތީގެ ސަލާމަތާއި ރައްކާތެރިކަމަށް އާންމުންދޭ ސަމާލުކަން މިހާރަށްވުރެ އިތުކޮށް، އެކްސިޑެންޓްތައް މަދުކުރުމަށް އެންމެން އެކުގައި މަސައްކަތްކުރުމަށް ރައީސުލްޖުމްހޫރިއްޔާގެ ނާއިބު ފައިޞަލް ނަސީމް ގޮވާލައްވައިފިއެވެ. އައިލެންޑް އޭވިއޭޝަންގެ ސްޓާފް ނައިޓްގައި ވާހަކަދައްކަވަމުން، ރައީސުލްޖުމްހޫރިއްޔާގެ ނާއިބު ވަނީ ނުރައްކާތެރި އެކްސިޑެންޓްތައް އިތުރުވުމުގެ ކަންބޮޑުވުން ފާޅުކުރައްވާފައެވެ.
ރައީސުލްޖުމްހޫރިއްޔާގެ ނާއިބު ފައިޞަލް ނަސީމް ވިދާޅުވީ، މާލެއާއި އަތޮޅުތަކުގައި މަގުތައް ޒަމާނީ ފެންވަރަށް ތަރައްޤީކުރަނީ، ޢާންމު ދުއްވާ އުޅަނދުތަކަށާއި، އާންމު ރައްޔިތުންގެ ފަސޭހައަށްކަމަށެވެ.
ނަމަވެސް އުޅަނދު ދުއްވުމުގައި ފަރުވާކުޑަވެ، ބަލަންޖެހޭ މިންވަރަށް ނުބެލުމުގެ ސަބަބުން އޭގެ ގެއްލުން އެތަށް ބަޔަކަށް ވަމުންދާކަން ފާހަގަކުރައްވަމުން ރައީސުލްޖުމްހޫރިއްޔާގެ ނާއިބު ވަނީ، ގިނަ އެކްސިޑެންޓަކަކީ ޤަވާއިދަށް ބެލުމެއް ނެތި، ދުއްވާ މީހުންގެ އިޙުމާލުން ހިނގަ އެކްސިޑެންޓުތަކެއްކަމަށް ވިދާޅުވެފައެވެ. އޭގެ ސަބަބުން، އެކްސިޑެންޓްގައި ފުރާނަ ގެއްލޭ ނުވަތަ އަނިޔާވާ މީހާގެ އިތުރުން، އެބައެއްގެ އާއިލާއިންވެސް އޭގެ ހިތާމަ ތަޙައްމަލުކުރަންޖެހޭ ބޮޑު މައްސަލައެއްގެ ގޮތުގައި ރައީސުލްޖުމްހޫރިއްޔާގެ ނާއިބު ސިފަކުރެއްވިއެވެ.
"ކޮންމެވެސް މީހެއްގެ މަންމަ ބައްޕަ ނޫނީ އާއިލާގެ މެންބަރެއް. މިފަދަ ކަމެއް ކުރިމަތިވީމަ އޭގެ ހިތްދަތިކަން އެނގޭނީ. މިދިޔަ ހަފްތާގައިވެސް އެއަރޕޯޓް ހިމެނޭ ސަރަޙައްދުގައި ނުރައްކާތެރި އެކްސިޑެންޓެއް ހިނގި. އެހެންވީމަ މިކަމަށް ވަރަށް ބޮޑަށް ސަމާލްކަން އެބަ ދޭންޖެހޭ." ރައީސުލްޖުމްހޫރިއްޔާގެ ނާއިބު ވިދާޅުވިއެވެ.
އެމަނިކުފާނު ވިދާޅުވީ މަގުމަތީގެ ސަލާމަތާއި ރައްކާތެރިކަން އިތުރުކުރުމަށް، ސަރުކާރުންވެސް ގިނަ މަސައްކަތްތައް ކުރަމުންދާކަމަށެވެ. އެގޮތުން 2019ވަނަ އަހަރުން ފެށިގެން ހޭލުންތެރިކުރުމުގެ ގިނަ ހަރަކާތްތަކެއް، ހިންގަމުން އަންނަކަމަށް ވިދާޅުވިއެވެ. އަދި ޓީވީއާއި ސޯޝަލް މީޑިއާގައިވެސް އެކިކަހަލަ ޕްރޮގްރާމްތައް ހިންގަމުންދާކަމަށާއި، މީގެތެރޭގައި އަތޮޅުތަކުގައިވެސް ގިނަ ޕްރޮގްރާމްތައް ހިންގާފައިވާކަމަށް ރައީސުލްޖުމްހޫރިއްޔާގެ ނާއިބު ވިދާޅުވިއެވެ.
އެމަނިކުފާނު ވިދާޅުވީ ކަމާ ގުޅުންހުރި ފަރާތްތަކުން ހިންގާ ޕްރޮގްރާމްތަކުގެ ނަތީޖާ ފެންނާނީ، އާއްމުން އެކަންކަމަށް ދޭ ސަމާލުކަން އިތުރުކޮށްގެންކަމަށެވެ.