ރަޝިޔާއިން ހަނގުރާމައިގެ ކުށްތަކާއި ޖަރީމާތައް ހިންގަމުންދާކަމަށް އެމެރިކާއިން ތުހުމަތުކޮށްފި

ޔޫކްރެއިނަށް އަރައި ހަނގުރާމަ ކުރަމުންދާ ރަޝިޔާ ސިފައިން އެ ޤައުމުގެ ރައްޔިތުންނާ ދެކޮޅަށް ހަނގުރާމައިގެ ކުށްތަކާއި ލާއިންސާނީ ޖަރީމާތައް ހިންގަމުންދާ ކަމުގައި އެމެރިކާގެ ނައިބު ރައީސް ކަމަލާ ހެރިސް ތުހުމަތު ކުރައްވައިފިއެވެ. ރަޝިޔާގެ ރައީސް ވްލަޑިމިޔަރ ޕުޓިންއަށް ފާޑުވިދާޅުވެ ހެރިސް ވާހަކަފުޅު ދައްކަވާފައި މި ވަނީ، މިހާރު ޖަރުމަނު ވިލާތުގައި ކުރިއަށްދާ މިޔުނިކް ސެކިޔުރިޓީ ކޮންފަރެންސްގައި ތަޤުރީރު ކުރައްވަމުންނެވެ.

1963 ވަނަ އަހަރުން ފެށިގެން ކޮންމެ އަހަރަކު ބާއްވާ މި މަހާސިންތާގެ މައިގަނޑު ބޭނުމަކީ، ދުނިޔޭގެ ސުލްޙަމަސަލަސް ކަމަށް އޮތް ހުރަސްތަކާއި ނުރައްކާތަކާ މެދު މަޝްވަރާކޮށް، އެ ކަންކަން ހައްލުކުރަން މަސައްކަތް ކުރުމެވެ. މި އަހަރުގެ ސަމިޓަށް ރަޝިޔާގެ އިސްވެރިންނަށް ދަޢުވަތު ދީފައެއް ނުވެއެވެ.

ރަޝިޔާއިން އިންސާނިއްޔަތާ ޚިލާފު ހަނގުރާމަ ކުށްތައް ހިންގަމުންދާ ކަމަށް ހެރިސް ވިދާޅުވެފައިވާއިރު، މިއީ ރަޝިޔާއިން ޔޫކްރެއިނުގެ ރައްޔިތުންނާ ދެކޮޅަށް ހިންގަމުންދާ އަމަލުތަކަކީ ހަނގުރާމައިގެ ކުށްތައް ކަމުގައި އެމެރިކާއިން ފާޅުގައި ބުނެފައިވާ ފުރަތަމަ ފަހަރެވެ. އަދި، ޕުޓިންއާ ދެކޮޅަށް ފާޅުގައި އެ ފަދަ ތުހުމަތެއް ކުރި ފުރަތަމަ ފަހަރެވެ.

"ޔޫކްރެއިނުގެ ޢާންމު ރައްޔިތުންނާ ދެކޮޅަށް ރަޝިޔާ ސިފައިން އިންސާނިއްޔަތާ ޚިލާފު އަމަލުތަކާއި ހަނގުރާމައިގެ ކުށްތައް ހިންގަމުންދާ ކަމަށް އެމެރިކާއިން ރަސްމީކޮށް ގަބޫލުކުރަން. އެއީ، މުޅި އިންސާނިއްޔަތާ ދެކޮޅަށް ހިންގާ ކުށްތަކެއް. ރަޝިޔާ ސިފައިން ދަނީ ރާވައިގެން ޔޫކްރެއިނުގެ ޢާންމު ރައްޔިތުންނާ ދެކޮޅަށް ލާއިންސާނީ އަމަލުތައް ހިންގަމުން،" ހެރިސް ވިދާޅުވިއެވެ.

ރަޝިޔާ ސިފައިން ޔޫކްރެއިނަށް ފޮނުވައިގެން ޕުޓިން ހަނގުރާމަ ފަށާފައި ވަނީ މީގެ އަހަރެއްހާ ދުވަސް ކުރިން، 2022 ވަނަ އަހަރުގެ ފެބުރުވަރީ މަހުގެ 24 ވަނަ ދުވަހުއެވެ. މި ހަނގުރާމައިގެ ތެރެއިން ރަޝިޔާ ސިފައިން އަތްގަދަކުރި ބައެއް ސަރަޙައްދުތަކުގެ ރައްޔިތުންނަށް ލާއިންސާނީ އަނިޔާތައް ދެމުންދާ ކަމަށް ޔޫކްރެއިނުގެ އިތުރުން ބައިނަލްއަޤުވާމީ މުޖުތަމަޢުން ވެސް ދަނީ ތުހުމަތު ކުރަމުންނެވެ.

ރަޝިޔާ ސިފައިން އަތްދަށުން މިނިވަންކޮށްފައިވާ ބައެއް ސަރަޙައްދުތަކުން، ގިނަ ޢަދަދެއްގެ ބަޔަކު މެރުމަށްފަހު، ވަޅުލާފައިވާ ވަޅުގަނޑުތައް ވަނީ ފެނިފައެވެ. މަރާފައިވާ މީހުންގެ ތެރޭގައި ގިނަ ޢަދަދެއްގެ ޢާންމުން ހިމެނެއެވެ. އަދި، އަންހެނުންނާއި، އުރުމުން ދުވަސްވީ މީހުންގެ އިތުރުން ކުޑަކުދިންގެ ހަށިތައް ވެސް ވަނީ ފެނިފައެވެ.

ރަޝިޔާ ސިފައިން ޔޫކްރެއިނުގައި ކުރަމުންދާ ހަނގުރާމައިގައި އެ ޤައުމުގެ ރައްޔިތުންނާ ދެކޮޅަށް ބޮޑެތި ޖަރީމާތަކެއް ހިންގާފައިވާ ކަމުގައި އ.ދ.ގެ އިންސާނީ ހައްޤުތަކާ ބެހޭ އިދާރާއިން އެކުލަވައިލި އިންކުއަރީ ކޮމިޝަނުން ވެސް ވަނީ ބުނެފައެވެ.

އެ ކޮމިޝަނުން ފާހަގަކޮށްފައިވާ ބައެއް ކުށްތަކުގެ ތެރޭގައި ޢާންމުން ދިރިއުޅޭ ހިސާބުތަކަށް ބޮން އެޅުމާއި، ގަތުލު ކުރުމާއި، އަސީރުންނަށް އަނިޔާކުރުމުގެ އިތުރުން ޖިންސީ އަނިޔާ ހިމެނެއެވެ. ނަމަވެސް، އިންސާނިއްޔަތާ ޚިލާފު ކުށްތައް ހިންގާފައިވާ ކަމުގައި ކަށަވަރުކޮށް ބުނަން އަދި އަވަސް ކަމުގައި އެ ކޮމިޝަނުން ބުނެފައިވެއެވެ.

މި ފަދަ ކުށްތަކާއި ޖަރީމާތަކުގެ މައްސަލަ ބެލުމަށް ބައިނަލްއަޤުވާމީ އިދާރާއެއް ހެދުމަށް ވިލާތުގެ އިއްތިހާދު (އީ.ޔޫ)އާއި ޔޫކްރެއިނުން ވަނީ މަސައްކަތް ފަށާފައެވެ. ބައިނަލްއަޤުވާމީ ޖިނާއީ ކޯޓު (އައި.ސީ.ސީ)އިން މިހާރު ވެސް ދަނީ، ރަޝިޔާ ސިފައިން ޔޫކްރެއިނުގައި ހިންގާފައިވާ ހަނގުރާމައިގެ ކުށްތަކާއި ޖަރީމާތައް ތަހުޤީޤު ކުރަމުންނެވެ. އަދި، އިންސާނިއްޔަތާ ދެކޮޅަށް ހިންގާފައިވާ ކުށްތައް ވެސް ތަހުޤީޤު ކުރަމުންނެވެ.