އެމެރިކާއިން ފޮނުވި ގިނަ ޢަދަދެއްގެ ޖާސޫސީ ބެލޫން ނުވަތަ ޖާސޫސީ އާލަތްތައް ހަރުކޮށްފައިވާ ފުއްޕާހަންތައް ޗައިނާގެ ވައިގެ ސަރަޙައްދަށް ވަދެފައިވާ ކަން ޗައިނާއިން ހާމަކޮށްފިއެވެ. ޗައިނާއިން ފޮނުވި އެ ފަދަ ފުއްޕާހަމެއް އެމެރިކާގެ ވައިގެ ސަރަޙައްދަށް ވަނުމުން، އޭތި ވައްޓައިލި މައްސަލައިގައި ދެ ޤައުމުގެ ދެމެދުގައި ވަނީ ނުތަނަވަސްކަން އުފެދި، ބަހުގެ ހަމަލާތައް އިތުރުވެފައެވެ.
އެމެރިކާގެ އަމަލުތަކަށް ފާޑުކިޔަމުން ޗައިނާގެ ޚާރިޖީ ވުޒާރާއިން ބުނީ، 2022 ވަނަ އަހަރު އެމެރިކާއިން ފޮނުވި 10 ފުއްޕާހަން ޗައިނާގެ ސަރަޙައްދުގެ ތެރެއަށް ވަދެ، ޗައިނާގެ މަތިން ދަތުރުކޮށްފައިވާ ކަމުގައެވެ. ޗައިނާގެ ޖާސޫސީ ފުއްޕާހަން އެމެރިކާގެ ސަރަޙައްދަށް ވަދެފައި ވަނީ ފެބްރުވަރީ މަހުގެ ކުރީކޮޅެވެ. އަދި، މޮންޓާނާގެ މަތިން ދަތުރުކުރި އެ ފުއްޕާހަން، އެމެރިކާގެ އަސްކަރީ މަތިންދާބޯޓަކުން ވަނީ ވައްޓައިލާފައެވެ.
އޭގެ ފަހުން ވެސް އެ ފަދަ ފުއްޕާހަންތަކެއް އެމެރިކާއާއި ކެނެޑާގެ ވައިގެ ސަރަޙައްދުން ފެނި، އެ ތަކެތި ވަނީ ވައްޓައިލާފައެވެ. ނަމަވެސް، ފަހުން ފެނިފައި ވަނީ ޗައިނާގެ ފުއްޕާހަންތަކެއް ކަން އެ ޤައުމުން ކަށަވަރުކޮށްދީފައެއް ނުވެއެވެ. އަދި، އެއީ ޗައިނާގެ އެއްޗެހިތަކެއް ކަމަށް ކުރާ ތުހުމަތުތަކަށް އެއްބަސްވެފައެއް ނުވެއެވެ.
މި ކަމާ ގުޅިގެން ދެ ޤައުމުގެ ދެމެދުގައި ބަހުގެ ހަމަލާތައް ބަދަލުކުރަމުންދާއިރު، ޗައިނާއިން ބުނީ 2022 ވަނަ އަހަރުގެ ޖަނަވަރީ މަހުން ފެށިގެން މިހާތަނަށް، އެމެރިކާގެ 10 އަށްވުރެ ގިނަ އެ ފަދަ ޖާސޫސީ ފުއްޕާހަން ޗައިނާގެ ވައިގެ ސަރަޙައްދަށް ވެސް އެތެރެވެފައިވާ ކަމުގައެވެ. އަދި، މިއީ ޢާންމުންކޮށް އެމެރިކާއިން ވެސް ހިންގާ އަމަލެއް ކަމުގައި ޗައިނާގެ ޚާރިޖީ ވުޒާރާގެ ތަރުޖަމާނު ވޮންގް ވެންބިން ވިދާޅުވިއެވެ.
"ފާއިތުވި އަހަރެއްހާ ދުވަހުގެ ތެރޭގައި އެމެރިކާގެ 10 ޖާސޫސީ ފުއްޕާހަން ޗައިނާގެ ވައިގެ ސަރަޙައްދަށް ވަނީ ވަދެފައި. އެ ތަކެތި އެމެރިކާއިން ފޮނުވާފައި ވަނީ ޗައިނާގެ ހުއްދައަކާ ނުލައި. އަދި، ޗައިނާގެ ސަރަޙައްދަށް އެތެރެވެފައި ވަނީ ވެސް ނަގަންޖެހޭ ހުއްދަތަކާ ނުލައި،" ވެންބިން ވިދާޅުވިއެވެ.
އެ ހާލަތްތަކުގައި ޗައިނާއިން އަމަލުކޮށްފައި ވަނީ ވަރަށް "ޕްރޮފެޝަނަލްކޮށް" ކަމުގައި ވިދާޅުވެ، ވެންބިން ވަނީ، ޗައިނާގެ ޖާސޫސީ ފުއްޕާހަން ވައްޓައިލި މައްސަލައިގައި އެމެރިކާއަށް ވަރަށް ބޮޑަށް ފާޑުވިދާޅުވެފައެވެ. އަދި، އެއާ ގުޅޭ އިތުރު މަޢުލޫމާތު ސާފުކުރަން ނޫސްވެރިން މަސައްކަތް ކުރުމުން، އެ މަޢުލޫމާތު އެމެރިކާއިން އޮޅުންފިލުވުމަށް އޭނާ ނޫސްވެރިން ގާތު އެދިވަޑައިގެންނެވިއެވެ.
ޗައިނާގެ ޖާސޫސީ ފުއްޕާހަން އެމެރިކާގެ ވައިގެ ސަރަޙައްދަށް ވަދެ، އެމެރިކާގެ ރަށްތަކުގެ މަތިން ދަތުރުކުރަން ފެށުމާ އެކު ދެ ޤައުމުގެ ދެމެދު މިހާރު ވެސް އޮތް ހީނަރުވެފައިވާ ގުޅުމަށް ނުރަނގަޅު އަސަރުތަކެއް ކުރިއެވެ. މި ކަމާ މެދު ނުރުހުން ފާޅުކުރުމުގެ ގޮތުން އެމެރިކާގެ ޚާރިޖީ ވަޒީރު އެންތަނީ ބްލިންކަން ޗައިނާއަށް ކުރައްވަން ހަމަޖެހިފައި އޮތް ދަތުރުފުޅެއް ވެސް ވަނީ ފަސްކޮށްފައެވެ.
އެ ފުއްޕާހަން ވައްޓައިލާފައި ވަނީ، އެމެރިކާގެ އަސްކަރިއްޔާގެ އެފް-22 މަރުކާގެ މަތިންދާބޯޓަކުން ދިން ހަމަލާއެއްގައެވެ. އޭތި ވެއްޓުނީ ދެކުނު ކޮރެލައިނާ ސްޓޭޓްގެ އައްސޭރިފަށުގެ ތިލަ ސަރަޙައްދަކަށް ކަމުގައި ޕެންޓަގަންއިން ވަނީ ބުނެފައެވެ. އަދި، އެ ފުއްޕާހަމުގައި ހަރުކޮށްފައިވާ ޖާސޫސީ އާލާތްތައް މިހާރު ހުރީ އެ ޤައުމުގެ ކަމާގުޅޭ އިދާރާތަކުގެ ބެލުމުގެ ދަށުގައެވެ.
އެންމެ ފުރަތަމަ ޗައިނާއިން ވަނީ އެ ފުއްޕާހަމަކީ އެ ޤައުމުގެ އެއްޗެއް ކަމަށް އެއްބަސްވާން ދެކޮޅު ހަދާފައެވެ. ނަމަވެސް، އެއީ ޗައިނާގެ އެއްޗެއް ކަމަށް ފަހުން އެއްބަސްވިއެވެ. އަދި، އެއީ ޖާސޫސީ ފުއްޕާހަމެއް ނޫން ކަމަށާއި، އޭގައި ޖާސޫސީ އާލާތްތައް ނުހުންނާ ކަމަށް ޗައިނާގެ ޚާރިޖީ ވުޒާރާއިން ބުންޏެވެ. އަދި، އެ ފުއްޕާހަމަކީ މަދަނީ ބޭނުންތަކަށް ދިރާސާ ކުރަން ބޭނުންކުރާ އެއްޗެއް ކަމުގައި ވެސް އެ ވުޒާރާއިން ބުންޏެވެ.
އަދި، ފުއްޕާހަން އެމެރިކާގެ ވައިގެ ސަރަޙައްދަށް ފޮނުވާފައި ވަނީ ގަސްދުގައި ނޫން ކަމުގައި ބުނެ، އެ ކަމާ ހިތާމަކުރާ ކަމަށް ވެސް ޗައިނާގެ ޚާރިޖީ ވުޒާރާއިން ނެރުނު ބަޔާނެއްގައި ބުނެފައިވެއެވެ. އެ ފުއްޕާހަން ފުރަތަމަ އެމެރިކާގެ ސްޓޭޓެއް ކަމުގައިވާ އެލެސްކާގެ ވައިގެ ސަރަޙައްދަށް ވަދެފައި ވަނީ ޖަނަވަރީ 28 ގައެވެ. އެއަށްފަހު، ކެނެޑާގެ ވައިގެ ސަރަޙައްދުގައި އުޅުމަށް ފަހު، އަނެއްކާ ވެސް އެމެރިކާގެ މޮންޓާނާގެ ވައިގެ ސަރަޙައްދަށް ވަނީ އެތެރެވެފައެވެ.
އެ ފުއްޕާހަމަކީ ޖާސޫސް ކުރުމުގެ ބޭނުމުގައި ޗައިނާއިން ފޮނުވާފައިވާ އެއްޗެއްކަން ކަށަވަރުވާ ކަމުގައި ޕެންޓެގަންގެ އޮފިޝަލަކު ވަނީ ވިދާޅުވެފައެވެ. މޮންޓާނާއަކީ، އެހެން ބައްރުތަކުގައިވާ ޤައުމުތަކަށް ހަމަލާދިނުމަށް ބޭނުންކުރާ އިންޓަރކޮންޓިނެންޓަލް ބެލިސްޓިކް މިސައިލް (އައި.ސީ.ބީ.އެމް) ސައިލޯތަކާއި ނިއުކްލިޔަރ ހަތިޔާރު ރައްކާކޮށްފައި ހުންނަ ސްޓޭޓެކެވެ. މީގެ އިތުރުން، އެ ޤައުމުގެ ދިފާޢީ ވުޒާރާއާއި އަސްކަރިއްޔާގެ މަރުކަޒުތައް ވެސް އެ ސްޓޭޓްގައި ހުރެއެވެ.