ފެބްރުރައީ 6 ވަނަ ދުވަހު ތުރުކީވިލާތާއި ސޫރިޔާއަށް ބާރުގަދަ ބިންހެލުމެއް އައި ވަގުތު ޢަބްދުލްބާސިތު ޚަލީލް ހުރީ އޭނާ މަސައްކަތް ކުރާ ހޮސްޕިޓަލުގައެވެ. އެއީ، ބިންހެލުމުގައި ބޮޑެތި ގެއްލުންތަކެއް ލިބުނު ސޫރިޔާގެ އިދްލިބްގެ ޙާރިމް ކިޔާ ސަރަޙައްދެއްގައި ހުންނަ ކުޑަ ހޮސްޕިޓަލެކެވެ. އެ ތަނުގައި އޭނާ އަދާކުރަނީ ނަރުހެއްގެ ވަޒީފާއެވެ.
ބިންހެލުމާ އެކު ހޮސްޕިޓަލަށް ބޮޑެތި ލޮޅުންތަކެއް އެރިއެވެ. އެ ވަގުތު ހޮސްޕިޓަލުގައި ތިބި އެންމެ ބޭރަށް ނިކެތެވެ. އަދި، ޚަލީލް އަވަސްވެގަތީ، ހޮސްޕިޓަލާ މާ ދުރުނޫން ހިސާބެއްގައި ހުންނަ އޭނާ ދިރިއުޅޭ އެޕާޓްމަންޓަށް ދިޔުމަށެވެ. އެ ތަނުގައި، އޭނާގެ އަންހެނުންނާއި ކުޑަ ދެ އަންހެން ދަރިން ތިބީ ނިދާފައެވެ.
އޭނާ ދިރިއުޅޭ ޢިމާރާތާ ހަމައަށް ދެވުމުން އޭނާއަށް ފެނުނީ ހިތަށް ނަގައިގަންނަން ވެސް އުނދަގޫ މަންޒަރެކެވެ. އޭނާ ދިރިއުޅޭ ޢިމާރާތް ކުރިން ހުރި ތަނުގައި މިހާރު އޮތީ ބޮޑު ކޮންކްރީޓް ފުންޏެކެވެ. އޭނާ ދިރިއުޅޭ ޢިމާރާތް އޮތީ ސުންނާފަތިވެ، ބިމާ ހަމަވެފައެވެ. އަންހެނުންނާއި ދެ ދަރިން ވީ ކޮންކްރީޓްތަކާއި ގައުކުނޑިތަކާއި ފާރުތަކުގެ ދަށުގައެވެ. އެ ވަގުތު އޭނާއަށް ހަދާނެ ގޮތް ހުސްވިއެވެ. ކުރެވުނީ ހަތަރު އުދަރެސްފެނުޖެހުނު ފަދަ އިހުސާސްތަކެކެވެ.
އެ މީހުން ސަލާމަތްކޮށްދޭން 50 އަހަރުގެ ޚަލީލަށް އެ ވަގުތު ކުރެވޭނެ މާ ބޮޑު ކަމެއް ނެތެވެ. އެހެންވެ، އެނބުރި އޭނާ ހިނގައިގަތީ ހޮސްޕިޓަލާ ދިމާލަށެވެ. އެނބުރި ގޮސް ހޮސްޕިޓަލަށް ވަދެވުނު އިރު، މީހުންތައް ކޮޅުކޮޅަށް ދުވަނީއެވެ. އެއް ބަޔަކު ދިޔައީ ޒަޚަމުވެފައިވާ ބަލިމީހުން ހޮސްޕިޓަލަށް ވައްދަމުންނެވެ. އަނެއް ބަޔަކު މަރުވެފައިވާ މީހުންގެ ހަށިތައް ގޮވައިގެންނެވެ. މަރުވި މީހުންގެ ތެރޭގައި ހޮސްޕިޓަލުގެ އިސްވެރިޔާއާއި އިސް ނަރުސް ވެސް ހިމެނެއެވެ.
އަންހެނުންނާއި ދަރިން ސަލާމަތް ކުރަން ކުރާނެ އަދި ކުރެވޭނެ އިތުރު ކަމެއް ނުފެނުމުން އޭނާ ދެން އަވަސްވެގަތީ ހޮސްޕިޓަލް ފުރައިލާފައިވާ ބަލި މީހުންނަށް އެހީތެރިވުމުގެ މަސައްކަތެވެ. އެ މީހުންނަށް ފަރުވާ ކުރުމަށް ކުރެވެން ހުރި މަސައްކަތެއް ކުރުމެވެ. ނަރުހެއްގެ ޒިންމާ އެންމެ ފުރިހަމައަށް އަދާކުރުމުގެ މަސައްކަތެވެ.
"އަހަރެން ހުރީ ހަދާނެ ގޮތް ހުސްވެފައި. ހިތް ފަޅައިގެން ހިނގައިދާނެއޭ ވެސް ހީވި. އެ ކަމުގައި 50 އަހަރު ފާއިތުވީހެން ވެސް ހީވި. ނަމަވެސް، ކުރިމަތީގައި ފެންނަން ތިބީ ޒަޚަމުވެފައިވާ މީހުން. ދެން އަވަސްވެގަތީ އެ މީހުންނަށް އެހީތެރިވެދޭން،" ޚަލީލް ކިޔައިދިނެވެ. ވަގުތުން އޭނާ ފެށީ، ޒަޚަމުވެފައިވާ މީހުންނަށް ފަރުވާ ކުރާށެވެ. ޒަޚަމުވެފައިވާ ތަންތަން ސާފުކޮށް، އެ ތަންތަނުގައި ބޭސް އަޅައިދިނުމުގެ މަސައްކަތެވެ.
ވެއްޓިފައިވާ ޢިމާރާތުގެ ދަށުން ޚަލީލްގެ އަންހެނުންނާއި ކުޑަ ދެ ދަރިންގެ ހަށިގަނޑު ފެނުނީ، ބިންހެލުމުގެ ދެ ދުވަސް ފަހުންނެވެ. ފެބްރުއަރީ 8 ވަނަ ދުވަހުއެވެ. ޢިމާރާތުގެ ދަށުން ފެނުނީ، އެ މީހުންގެ ފުރާނަ ނެތް މަސްގަނޑެވެ. އެ މީހުންނަށް ވެފައިވާ ގޮތް ފެނިފައި، އޭނާގެ ނިދި ގެއްލުނެވެ. މާޔޫސްވިއެވެ. ދުނިޔެ މަތިން ފޫހިވިއެވެ. ނަމަވެސް، ނަރުހެއްގެ ހިތުގައި އޮންނަ ކުލުނަކަށް ބަދަލެއް ނާންނެއޭ ހިތަށް އަރައި، ހޮސްޕިޓަލުގެ ޒިންމާތައް އަދާ ކުރުމުގައި ދެމި ހުރުމަށް އޭނާ އަޒުމު ކަނޑައެޅިއެވެ.
ތުރުކީވިލާތާއި ސޫރިޔާއަށް އައި ބިންހެލުމުގައި މަރުވި މީހުންގެ ޢަދަދު މިހާރު ވަނީ 35,000 އަށްވުރެ އިތުރުވެފައެވެ. މީގެ ތެރެއިން 3,581 މީހުންނަކީ ސޫރިޔާއިން މަރުވި މީހުންނެވެ. ޚަލީލްގެ ޢާއިލާގެ މެންބަރުން ފަދަ އެހެން މީހުންނެވެ. މައިންނާއި ބަފައިންނެވެ. އަދި، އުމުރުން ދުވަސްވީ މީހުންނާއި ޅަދަރިންނެވެ.
ބިންހެލުމުގެ ކުޑަ ވަގުތުކޮޅެއް ފަހުން އެމްބިޔުލާންސްތައް ގޮސް، ޚަލީލް މަސައްކަތް ކުރާ ހޮސްޕިޓަލުގެ ދޮރުމަތި ފުރައިލިއެވެ. މަރުވެފައިވާ މީހުންގެ ހަށިތަކާއި، ޒަޚަމުވެފައިވާ އެތަކެއް ސަތޭކަ މީހުން ގޮވައިގެންނެވެ. އެ ހޮސްޕިޓަލުގެ ޖެނެރަލް ސަރޖަން މުޙައްމަދު އަލް-ބަދުރު ވިދާޅުވީ، ޢާންމު ގޮތެއްގައި އެ ހޮސްޕިޓަލަކީ އެއް ފަހަރާ އެންމެ 30 މީހުންނަށް ފަރުވާދޭ ތަނެއް ކަމުގައެވެ. ނަމަވެސް، ބިންހެލުމަށް ފަހު، އެ ތަނުން މިހާތަނަށް 2,500 އަށްވުރެ ގިނަ މީހުންނަށް ފަރުވާދީފައިވާ ކަމުގައި އޭނާ ވިދާޅުވިއެވެ. މީގެ ތެރެއިން 390 މީހުންގެ ފުރާނަ ވަނީ ގެއްލިފައެވެ.