ހުޅުމާލޭގައި ވަޅިން ހަމަލާދީ ގއ.ދާންދޫ ގޯލްޑް ލީފް، ހާރިސް އަބްދުލް ޣަފޫރު މަރާލި މައްސަލާގައި ދައުލަތުން ދައުވާ އުފުލި ޔާމިން ރަޝީދުގެ މައްޗަށް ކުށް ސާބިތު ނުވާކަމަށް ކްރިމިނަލް ކޯޓުން ހުރި ހުކުމް، ދައުލަތުން ހައިކޯޓުގައި އިސްތިއުނާފްކޮށްފިއެވެ.
މިމައްސަލާގައި ދައުލަތުން ޏ.ފުވައްމަލައް، ހިލްޓަން ޔާމީން ރަޝީދުގެ މައްޗަށް އުފުލާފައިވަނީ ތޫނު އެއްޗެއް ބޭނުން ކޮށްގެން ގަސްތުގައި މީހަކު މެރުމުގެ ކުށުގެ ދައުވާއެވެ. ކްރިމިނަލް ކޯޓުން މިދައުވާ ސާބިތު ނުވާކަމަށް ހުކުމް ކުރުމުން، ދައުލަތުން ވަނީ މިމައްސަލަ ހައިކޯޓުގައި އިސްތިއުނާފް ކޮށްފައިކަމަށް ޕްރޮސެކިއުޓާ ޖެނެރަލް އޮފީހުން ވަނީ ވިދާޅުވެފައެވެ.
މިމައްސަލާގައި ކްރިމިނަލް ކޯޓުން ކޮށްފައިވާ ހުކުމުގައި ބުނެފައިވަނީ ޔާމީނަށް ހަމަލާ ދެނިކޮށް ފެނިފައިވާ ކަމަށް ޝަރީއަތުގައި ހެކިބަސް ދިން އެއްވެސް ހެކިވެރިޔަކު ބުނެފައި ނުވާކަމަށެވެ.
މައްސަލައިގައި ހެކިބަސްދިން ފުލުހަކު ވަނީ މީގެ ކުރިން އެދެމީހުންގެ މެދުގައި މާރާމާރީއެއް ހިނގިކަން ފާހަގަކޮށްފައެއްވެ. އަދި އޭނާ ދިރިއުޅެމުން ދިޔަ ގެ ބަލައި ފާސްކުރިއިރު، އެ ގޭގެ އަލަމާރިއަކުން ބޮނޑިކޮށްފައި އޮތް ޖިންސެއްގެ ތެރެއިން ލޭ ކަމަށް ޝައްކުކުރެވޭ އެއްޗެއް ފެނިފައި ވެއެވެ. ޖިންސުން ޔާމީންގެ ލޭ ފެނި، ހާދިސާ ހިނގި ސަރަހައްދުން ފެނުނު ފައިވާނުން ވެސް ޔާމީނުގެ ޑީއެންއޭ ލިބިފައިވީނަމަވެސް، ޖިންސުން ފެނުނު ލެއަކީ އޭގެ ކުރިން ހިނގި މާރާމާރީގެ ލެއަށްވުމުގެ ފުރުސަތު އޮތްކަމަށް ހުކުމުގައި ވަނީ ބުނެފައެވެ.
ހާރިސް އޭރު ގެންދިޔައީ މަސްތުވާތަކެތީގެ މައްސަލައެއްގައި ތިން އަހަރުގެ ޖަލު ހުކުމެއް ތަންފީޒު ކުރަމުންނެވެ. އެ ހުކުމް އިއްވުމުގެ ކުރިން ހާރިސް އާއި ޔާމީން ރަޝީދާ ދެމެދު 2015 ވަނަ އަހަރު ތެރޭ މާރާމާރީއެއް ހިންގި ކަމުގެ ރެކޯޑްވެސް ފުލުހުގައި އޮތެވެ.