ޕެރޫގެ ދެކުނާއި މެދުތެރޭގެ ސަރަޙައްދުތަކަށް ބޯކޮށް ވާރޭވެހި ހިނގި ބިންގަނޑު ކެނޑުމާއި ކިސަޑު ފޭބުމުގެ ހާދިސާތަކުގައި މަރުވި މީހުންގެ ޢަދަދު 18 އިން މައްޗަށް އަރައިފިއެވެ. ބިންގަނޑު ކަނޑައިގެން ގޮސް، ކިސަޑު ފައިބާފައިވާ އާރޭކީޕާ ސަރަޙައްދުގެ ޢިމާރާތްތަކާއި މަގުތަކަށް ވަނީ ވަރަށް ބޮޑެތި ގެއްލުންތައް ލިބިފައެވެ.
ބައެއް ޢިމާރާތްތައް ބޭނުންކުރުން ރައްކާތެރި ނޫން މިންވަރަކަށް ގެއްލުން ލިބިފައިވާ ކަމުގައި އެ ޤައުމުގެ އޮފިޝަލުން ބުނެއެވެ. މި ހާދިސާގައި މަރުވި މީހުންގެ ތެރޭގައި އެއް އަހަރުގެ ތުއްތު ކުއްޖަކާއި 10 އަހަރުގެ ކުޑަ ކުއްޖަކު ވެސް ހިމެނެއެވެ.
ޕެރޫގެ ނޭޝަނަލް އިންސްޓިޓިއުޓް އޮފް ސިވިލް ޑިފެންސްއިން ބުނީ، ކިސަޑު ފޭބުމުގެ ހާދިސާގައި 27 މީހަކު ޒަޚަމުވެފައިވާ ކަމުގައެވެ. އަދި، އިތުރު 20 މީހަކު އަދިވެސް ނުފެންނަ ކަމަށާއި، އެ މީހުން ހޯދުމަށް މަސައްކަތް ކުރަމުންދާ ކަމުގައެވެ. އާރޭކީޕާ ސަރަޙައްދުގެ ބިންގަނޑު ކަނޑައިގެން ގޮސްފައި ވަނީ އެ ސަރަޙައްދަށް ހުއްޓުމެއް ނެތި ބޯކޮށް ވާރޭވެހުމާ ގުޅިގެންނެވެ.
އާރޭކީޕާގެ އިތުރުން، މެދުތެރޭގައިވާ އެންޑިއާން ސަރަޙައްދާއި ކަމާނާ ޕުރޮވިންސުގައި ވެސް ބިންގަނޑު ކަނޑައިގެން ގޮސް ކިސަޑު ފޭބުމުގެ ހާދިސާތައް ވަނީ ހިނގާފައެވެ. އެންޑިއާންގައި ހިލައާއި ކިސަޑު ފޭބުމުގެ ސަބަބުން އެއްގަމު އުޅަނދެއް ވަޅުލެވި، އޭގައި ތިބި ފަސިންޖަރުންގެ ތެރެއިން އެކަކު މަރުވި ކަމުގައި ނޭޝަނަލް އިންސްޓިޓިއުޓް އޮފް ސިވިލް ޑިފެންސްއިން ބުންޏެވެ. އެ ހާދިސާގައި އިތުރު ދެ މީހަކު ޒަޚަމުވިއެވެ.
އާރޭކީޕާގެ ކަމާނާ ޕުރޮވިންސުގައި ގިނަ ޢަދަދެއްގެ ގެދޮރުގެ އިތުރުން މަގުތަކާއި، ސްކޫލްތަކާއި، ޞިއްޙީ މަރުކަޒަށް ވެސް ވަނީ ބޮޑެތި ގެއްލުންތަކެއް ލިބިފައެވެ. އެ ސަރަޙައްދަކީ، ގިނަ ޢަދަދެއްގެ މައިންތައް ހުންނަ ސަރަޙައްދެކެވެ. އަދި، ބިންގަނޑު ކަނޑައިގެން ދިޔުމަށް މަގުފަހިވެފައި ވަނީ، މައިންތަކުގެ ސަބަބުން ކަމަށް ބެލެވޭ ކަމުގައި އެ ޤައުމުގެ އިދާރާތަކުން ބުނެއެވެ.