މޯލްޑިވްސް ބްރޯޑްކާސްޓިން ކޮމިޝަންގެ ހުސްވެފައިވާ މެންބަރުކަމުގެ މަޤާމަށް ކުރިމަތިލެއްވި ފަސް މީހެއްގެ ނަން، ދިރާސާކުރުމަށް ކޮމިޓީއަށް ފޮނުވައިފިއެވެ.
ބްރޯޑްކާސްޓިންގ ކޮމިޝަންގެ މެންބަރެއްގެ، މެންބަރުކަމުގެ މަޤާމު ހުސްވީ، އެ ކޮމިޝަންގެ ނާއިބު ރައީސްގެ މަޤާމުގައި ހުންނެވި އަޙްމަދު ޤައިސް، މިދިޔަ މަހުގެ 8 ވަނަ ދުވަހު މަޤާމުން އިސްތިުފާދެއްވުމުންނެވެ. ބްރޯޑްކޮމްގެ ހުސްވެފައިވާ މެންބަރުކަމުގެ މަޤާމަށް ހުޅުވާލުމުން، އެ މަޤާމަށް ކުރިމަތިލެއްވި ފަސް މީހެއްގެ ނަން ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް އިސްކަންދެއްވާ ތަރުތީބުން ވަނީ މަޖިލީހަށް ފޮނުއްވާފައެވެ.
ބްރޯޑްކޮމްގެ މެންބަރުކަމަށް އައްޔަންކުރެއްވުމަށް ފޮނުއްވި ނަންތައް
1- އައިމިނަތު ނުޒުހާ، ރިވޯޑް، ހއ. ހޯރަފުށި
2- ހުސެއިން އަމްރު، ވ. ރޯޝަން
3- ޝާން ސޯލިހު މުހައްމަދު، ފިނިވާދީ، ދ. ކުޑަހުވަދޫ
4- މަރިޔަމް ނަރީމާން ޝަރީފް، މުޝްތަރީގޭ، ގދ. ތިނަދޫ
5- މަރިޔަމް މުނާ، ބޯގަންވިލާ، ސ. ފޭދޫ
މި ފަސް މީހުންގެ ނަން ދިރާސާކުރުމަށް ފޮނުވާފައިވަނީ މިނިވަން މުއައްސަސާތަކުގެ ކޮމިޓީއަށެވެ.
7 މެންބަރުންގެ މައްޗަށް އެކުލެވޭ ބްރޯޑްކާސްޓިންގ ކޮމިޝަންގައި މިހާރު ތިއްބެވީ، އެކޮމިޝަންގެ ރައީސާ މަރްޔަމް ވަޙީދާއާއި، ނާއިބު ރައީސް މުޙައްމަދު ފަޒީންގެ އިތުރުން ކޮމިޝަންގެ މެންބަރުން ކަމަށްވާ އަމްޖަދު ވަހީދާއި، އަލީ ޔޫސުފާއި، އާމިނަތު އަމީނާއާއި، ޝިފްލާ އިބްރާހީމްއެވެ.