އުތުރު ކޮރެޔާގެ އަސްކަރީ ހަރަކާތްތަކާއި އަސްކަރީ ތަމްރީނުތައް އިތުރުކުރޭނެ ކަމުގައި އެ ޤައުމުން ބުނެފިއެވެ. އުތުރު ކޮރެޔާއިން މިހާރު ދަނީ އަސްކަރީ ޕެރޭޑެއް ބާއްވައި، އަސްކަރިއްޔާގެ ބާރު ދައްކައިލަން ތައްޔާރުވަމުންނެވެ. މި ކަން ވިލަރެސްކުރުމަށް އެ ޤައުމުގެ ލީޑަރު ކިމް ޖޮންގް އުން ވަނީ އަސްކަރިއްޔާގެ އިސްވެރިންނާ ބައްދަލު ކުރައްވާފައެވެ.
އުތުރު ކޮރެޔާއަށް ބިރުދެއްކުމުގެ ގޮތުން ދެކުނު ކޮރެޔާއާއި އެމެރިކާއިން ގުޅިގެން ދާދިފަހުން ވަނީ ވައިގެ ސިފައިންގެ ބާރުވެރިކަން ދައްކައިލުމަށް ތަމްރީނުތަކެއް ބާއްވާފައެވެ. އެމެރިކާގެ ބޮންއަޅާ މަތިންދާބޯޓެއް ހިމެނޭހެން، ދެ ޤައުމުގެ އަސްކަރީ މަތިންދާބޯޓުތައް ވަނީ އުތުރު ކޮރެޔާ ކައިރިން ރީނދޫ ކަނޑު ހުރަސްކޮށް ދަތުރުކޮށްފައެވެ. އެއީ، މި އަހަރު އެ ދެ ޤައުމުން ގުޅިގެން ހިންގާފައިވާ މި ފަދަ ފުރަތަމަ ތަމްރީނުތަކެވެ.
އަސްކަރީ ތަމްރީނުތަކުގައި ބޭނުންކޮށްފައި ވަނީ އެމެރިކާގެ "ބީ-1 ބީ" މަރުކާގެ ބޮންއަޅާ މަތިންދާބޯޓަކާއި، "އެފް-22" މަރުކާއާއި "އެފް-35ބީ" މަރުކާގެ އަސްކަރީ މަތިންދާބޯޓުތަކެވެ. އަދި، ދެކުނު ކޮރެޔާގެ "އެފް-35 އޭ" މަރުކާގެ އަސްކަރީ މަތިންދާބޯޓުތަކެވެ. މީގެ ތެރެއިން "އެފް-35ބީ" އަކީ ސްޓެލްތް ނުވަތަ ރާޑަރަށް ފިލައިގެން ދަތުރުކުރުމުގެ ގާބިލުކަން ލިބިފައިވާ މަތިންދާބޯޓުތަކެކެވެ.
މީގެ އިތުރުން، އެމެރިކާގެ ދިފާޢީ ވަޒީރު ލޮއިޑް އޮސްޓިން ވަނީ ހުސްވި ހަފުތާގެ ތެރޭގައި ދެކުނު ކޮރެޔާއަށް ވަޑައިގަންނަވައި، އެ ޤައުމުގެ އިސްވެރިންނާ ބައްދަލުކުރައްވާފައެވެ. އަދި، ދެ ޤައުމު ގުޅިގެން ހިންގާ އަސްކަރީ ހަރަކާތްތައް އިތުރުކުރުމާ ގުޅޭ ގޮތުން މަޝްވަރާ ކުރައްވާފައެވެ. އެ ދެ ޤައުމުން ހިންގާ ތަމްރީނުތަކަކީ، އުތުރު ކޮރެޔާއަށް އަރައި، އެ ޤައުމު ހިފުމަށް ވަމުންދާ ތައްޔާރީތަކެއް ކަމުގައި އެ ޤައުމުން ދެކެއެވެ.
މި ކަމަށް ރައްދުދިނުމުގެ ގޮތުން އުތުރު ކޮރެޔާއިން ވެސް ވަރުގަދަ ތަމްރީނުތަކެއް ބާއްވައި، އަސްކަރީ ހަރަކާތްތައް އިތުރުކުރަން ނިންމާފައިވާ ކަމުގައި އެ ޤައުމުގެ އަސްކަރިއްޔާގެ އިސް އޮފިޝަލަކު ވިދާޅުވިއެވެ. އަދި، އެ ޤައުމުގެ އަސްކަރިއްޔާގެ އަހަރީ ދުވަސް ފާހަގަކުރުމަށް ފެބްރުވަރީ 8 ވަނަ ދުވަހު ބާއްވާ ޕެރޭޑުގައި، އެ ޤައުމުގެ އަސްކަރިއްޔާގެ ކުޅަދާނަކަން ދުނިޔެއަށް ދައްކައިލާނެ ކަމުގައި އެ ޤައުމުން ބުނެއެވެ. ބޭނުމަކީ، ހަނގުރާމައަކަށް އެ ޤައުމުން ތައްޔާރުވެފައިވާ މިންވަރު ހާމަކޮށްދިނުން ކަމުގައި ވެސް އޮފިޝަލަކު ވިދާޅުވިއެވެ.
އުތުރު ކޮރެޔާއިން އަސްކަރީ ތަމްރީނުތައް ބޭއްވުމުގެ ނަމުގައި ކުރަމުންދާ މަސައްކަތަކީ ހަނގުރާމައަށް ތައްޔާރުވުން ކަމުގައި މަސްރަޙު ދިރާސާކުރާ ފަރާތްތަން ގަބޫލުކުރެއެވެ. އަދި، އުތުރު ކޮރެޔާގެ ނިއުކްލިޔަރ ހަތިޔާރުތަކުގެ ޢަދަދު އިތުރު ކުރުމަށް ދާދިފަހުން ކިމް ވަނީ އެ ޤައުމުގެ އަސްކަރިއްޔާއަށް އަމުރު ކުރައްވާފައެވެ. އަދި، މި އަހަރުގެ ތެރޭގައި އެ ޤައުމުގެ އަސްކަރިއްޔާ އިތުރަށް ފުޅާކޮށް، ބާރުވެރިކުރުވާނެ ކަމުގައި ވެސް ކިމް ވަނީ ވިދާޅުވެފައެވެ.